Kwamamaza

Mu myaka itanu, ingaruka z’ihindagurika ry’ibihe ntizizaba ari ikibazo gitunguranye

Yanditswe kuya 17-11-2016 saa 19:38' na Nsengimana Evariste


Ikigo cy’Igihugu gishinzwe kubungabunga ibidukikije(REMA), kivuga ko mu myaka itanu iri imbere ingaruka ziterwa n’ihindagurika ry’ibihe no kubungabunga ibidukikije bitazaba bikiri ikibazo gitunguranye kuko bizajya biba byariteguwe kandi byaranateganyirijwe amafaranga yo kubikemura.

Ibi byatangarijwe mu mahugurwa y’umunsi umwe yahawe abayobozi bashinzwe igenamigambi n’urwego rw’ibidukikije mu turere, yateguwe ku bufatanye bw’iki kigo n’Umushinga urwanya ubukene no kurengera ibidukikije, PEI (Poverty Environment Initiative), agamije gukangurira izi nzego gushyira ibi bibazo mu mihigo n’igenamigambyi yazo.

Umuyobozi ushinzwe kwigisha no kwinjiza ibidukikije muri gahunda z’iterambere muri REMA, Rachael Tushabe, avuga ko nta terambere ryabaho mu gihe ibidukikije bititaweho, bityo ngo hakenewe ubukangurambaga kugeza no ku rwego rwa buri rugo.

Avuga ko hari urwego rushimishije igihugu kimaze kugeraho mu guhangana n’ingaruka ziterwa n’imihindagurikire y’ikirere, gusa ngo intego bafite ni ukongera baharanira ko mu myaka itanu iri imbere izo ngaruka zizajya ziba zariteguwe.

Ati “Dukurikije raporo dufite n’umwihariko wa buri karere na za Minisiteri, bose bageze ku kigereranyo cya 50% ariko turifuza 70%. Noneho uko tugenda dukora igenamigambi ryiza ryita ku bidukikije no guhangana n’imihindagurikire y’ibihe, turifuza ko tuzageza no ku 100%, aho guhangana na byo bitazongera kuba ikibazo kitugwiririye ahubwo biba ari ibintu twateguye noneho n’ibitugwiririye tukabona uburyo duhangana na byo. Ibyo ni intego y’imyaka itanu.”

Yakomeje avuga ko icyifuzo bafite ari uko iryo genemigambi ryahera ku rwego rw’umudugudu ndetse na buri rugo.

Murenzi Nyonga Augustin, umukozi ushinzwe kurengera ibidukikishe mu Karere ka Gakenke, avuga ko aya mahugurwa azabafasha mu gutegura igenamigambi ryo guhangana n’izo ngaruka mu rwego rwo kugera ku iterambere rirambye.

Yavuze ko nubwo asanzwe akora imirimo ijyanye no kubungabunga ibidukikije, ngo aya mahugurwa azamufasha kunononsora ibyo yakoraga.

Aba bayobozi basabwe kwita ku bidukikije mu gihe hatezwa imbere ibikorwaremezo by’umwihariko bita ku bisanzweho, banahanga ibishya bakanakangurira abaturage gutekesha gaz kuko ibidukikije byinshi byangizwa hashakwa inkwi zo kwifashisha mu ngo.

Ku ngamba zo guhangana n’ikibazo cy’izuba rigira ingaruka ku musaruro w’ibikomoka ku buhinzi, Tushabe yavuze ko bakangurira abahinzi kuhira imyaka cyane mu bice bikunda kwibasirwa n’izuba rikabije n’amapfa.

Aya mahugurwa aje akurikiye andi y’abakozi ba Ministeri y’Imari n’Igenamigambi, abakora muri za Minisiteri zitandukanye bashinzwe igenamigambi, ibigo bikora imirimo ishobora kwangiza ibidukikije (ibyubaka imihanda, ibicukura amabuye y’agaciro...) n’ibigo byigenga, na yo yari afite intego imwe n’aya.

Muri uyu mwaka, u Rwanda rwahuye n’ingaruka z’imihindagurikire y’ibihe, aho Minisiteri ishinzwe gucyura impunzi no gukumira ibiza, MIDIMAR, yatangaje ko hagati ya Mutarama na Nzeri 2016, ibyangirijwe n’ibiza bitandukanye biturutse ku mvura nyinshi bibarirwa muri miliyari 27 z’amafaranga y’u Rwanda.

Ibyangiritse birimo inzu 4 611 zasenyutse na hegitari 5 388 z’ibihingwa. Mu bindi byagizweho ingaruka n’ibiza byibasiye igihugu, harimo amatungo 1882 yapfuye, imihanda 26 yatengutse, ibiraro 41 n’ibyumba by’amashuri 47 byarasenyutse.

Hagati aho ingo 59,854 zagezweho n’amapfa cyane mu Ntara y’u Burasirazuba.

Abitabiriye aya mahugurwa bibukijwe kurushaho kubungabunga ibidukikije mu rwego rwo guhangana n'ingaruka z'ihindagurika ry'ibihe
Tushabe avuga ko mu myaka itanu iri imbere ingaruka zituruka ku mihindagurikire y'ibihe zizaba zitagitungurana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved