Kwamamaza

Mu myaka itanu,BDF yashoye miliyari zirenga 62 mu mishinga mito n’iciriritse

Yanditswe kuya 31-08-2016 saa 14:20' na Cyprien Niyomwungeri


Ikigega BDF cyashyizweho ku bufatanye bwa Guverinoma y’u Rwanda na Banki Itsura Amajyambere (BRD), ngo gifashe abagore n’urubyiruko kwiteza imbere binyuze mu kubafasha kubona ingwate ku nguzanyo baka mu mabanki, kimaze gushoramo miliyari zirenga 62 z’amafaranga y’u Rwanda mu myaka itanu.

Mu kiganiro n’abanyamakuru kuri uyu wa 31 Kanama, ikigega BDF cyagaragaje ko mu myaka itanu kimaze gifatanya n’ibigo by’imari kwita ku byiciro by’abasigajwe inyuma muri serivisi z’imari, kimaze gushyira mu bikorwa gahunda 16 zigamije kuzamura ibyo byiciro.

Umuyobozi wa BDF, Innocent Bulindi, yatangaje ko bamaze gushora miliyari 62,689,952,320 zafashije imishinga y’ubucuruzi mito n’iciriritse 23,411, mu guhanga imirimo ibihumbi 145,222. Muri zo izigera kuri miliyari 50 zatanzweho ingwate zifasha abantu kubona inguzanyo ya miliyari 174,965,270,853 z’amafaranga y’u Rwanda.

Kugeza ubu urubyiruko rurenga 9000 n’abagore barenga 7000 bamaze guterwa inkunga na BDF muri gahunda zirimo guhabwa ingwate, ubujyanama n’ibindi.

Bulindi akomeza avuga ko uyu ari umusaruro mwiza bamaze kugeraho ariko hakiri imbogamizi y’abantu benshi bafata ibyo BDF ikora nk’inkunga ndetse rimwe na rimwe n’amabanki ntashyire imbaraga mu gukurikirana inguzanyo aba yatanze kuko aba yizeye ko afite ingwate.

Yagize ati “Nubwo gahunda zashyizweho usanga ari nziza ushingiye uko zatekerejwe, nka Hanga umurimo n’ibindi, akenshi usanga abantu bazihindura gahunda za politiki aho kuba iz’ubucuruzi ku buryo bamwe batishyura inguzanyo ibyo bikatuzanira ibihombo.”

Muri rusange, 11% by’inguzanyo BDF yishingiye ikaziha ingwate ntizishyurwa neza. Imishinga 392 mu irenze 4800 yatewe inkunga yahombeyemo miliyari eshanu zikirimo kugaruzwa ku bufatanye n’amabanki n’ibindi bigo by’imari izo nguzanyo zafashwemo.

Zimwe mu mpamvu BDF isanga zituma imishinga ihomba ngo ni amasoko, aho abenshi bahanga imirimo ariko ibyo bakora bakabura abaguzi. Ikindi kigarukwaho ni ubushobozi n’ubuzobere bwa ba nyiri mishinga n’imihindagurikire y’ibihe cyane cyane ku mishinga y’ubuhinzi n’ubworozi.
Muri BDF imishinga y’Ubuhinzi n’Ubworozi ntijya irenza ingwate ya miliyoni 500 kuri buri mushinga, mu gihe iyindi mishinga itari iy’ubuhinzi n’ubworozi itarenza miliyoni 300.

Ubu BDF irakorera mu Turere twose tw’igihugu. Ifitanye amasezerano n’ibigo by’imari bigera kuri 503.

Umuyobozi wa BDF, Innocent Bulindi

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 9 Ukuboza 2016
Copyright © 2009 -2014 - IGIHE Ltd - All Rights Reserved