Mu myaka itandatu ishize, abagabo barenga ibihumbi bine bifungishije urubyaro burundu

Yanditswe na Ishimwe Israel
Kuya 28 Ukwakira 2016 saa 01:34
Yasuwe : XX
0

Imibare yashyizwe hanze igaragaza ko kuva mu mwaka wa 2010, abagabo barenga ibihumbi bine bamaze kwifungisha burundu mu gihugu cyose, mu rwego rwo kurushaho kwitabira gahunda yo kuboneza urubyaro.

Ibi byagarutsweho kuri uyu wa Gatanu, tariki ya 28 Ukwakira 2016 mu birori byo kwizihiza Umunsi Mpuzamahanga wahariwe kuboneza urubyaro byabereye mu Kigo Nderabuzima cya Mata, mu Karere ka Muhanga.

Uyu munsi usanzwe wizihizwa tariki ya 26 Nzeri buri mwaka, mu Rwanda wahujwe n’Umunsi Mpuzamahanga wo kuboneza urubyaro ku bagabo, uba ku itariki ya 18 Ugushyingo.

Imibare yashyizwe hanze n’Ikigo cy’Igihugu cy’Ibarurishamibare mu Rwanda (NISR), igaragaza ko abagabo 0.2% aribo bamaze kwitabira kuboneza urubyaro, mu gihe abagore ari 0.8%.

Minisiteri y’Ubuzima yagaragaje ko n’ubwo umubare w’abagabo bagenda bitabira kuboneza urubyaro binyuze mu kwifungisha burundu ukiri hasi, ubona ko bagenda babyitabira kuko kuva mu 2010 kugeza mu 2015, abasaga ibihumbi bine bifungishije.

Umuryango wa Basabose Protégéne na Mujawamariya Florence, wabyaranye abana batatu, nyuma bakaza guhitamo ko umugabo yifungisha batanze ubuhamya bavuga ko nta mpungenge bibateye ahubwo ko byatumye barushaho kubana neza.

Basabose yagize ati “Mu myaka irindwi tumaze nifungishije burundu nta ngaruka byagize ku buzima bwacu busanzwe. No ku bijyanye no gutera akabarariro, igikorwa kirushaho kugenda neza kuko tubikora tudahangayitse tutikanga ko hashobora kuvuka inda itateguwe.”

Umuyobozi w’Ishami ry’Umuryango w’Abibumbye ryita ku baturage, UNFPA,mu Rwanda, Jozef Maerien, yavuze ko kuboneza urubyaro ari ingenzi cyane kuko bigira uruhare mu gutuma urugo rutera imbere ndetse bikagabanya amakimbirane mu miryango.

Yakomeje avuga ko bidakwiye guharirwa abagore gusa, ahubwo n’abagabo bagomba kubigira ibyabo bakitabira nabo kwifungisha kugira ngo baruhure abo bashakanye.

Maerien yongeyeho ko UNFPA izakomeza gufasha u Rwanda kugeza ku baturage uburyo bwo kuboneza urubyaro bwa kizungu aho muri uyu mwaka bateganya gushoramo agera kuri miliyoni ebyiri z’amadorali ya Amerika.

Umunyamabanga wa Leta muri Minisiteri y’Ubuzima, Dr Ndimubanzi Patrick yavuze ko umunsi wo kuboneza urubyaro wizihizwa mu rwego rwo guharanira ko nta mukobwa cyangwa umugore utwara inda itateguwe.

Ati “Kugira ubumenyi kuri serivisi z’ubuzima bw’imyororokere bituma habaho igabanuka ry’imfu z’abana n’ababyeyi, bikagabanya n’igipimo cy’inda zitateguwe. Leta y’u Rwanda yakomeje gushyira imbaraga muri gahunda yo kwegereza abaturage serivisi zo kuboneza urubyaro.”

Mu mwaka wa 2014-2015, umubare w’ababoneje urubyaro wari 53%, muri bo 48% bakoresha uburyo bwa kizungu harimo ibinini ndetse n’inshinge, naho abagera kuri 6% bagakoresha uburyo bwa kamere.

Mu Rwanda kandi habarizwa ibigo nderabuzima bisaga 500 bitangirwaho serivisi zo kuboneza urubyaro n’abajyanama b’ubuzima bagera ku bihumbi 45 batangira izi serivisi mu midugudu.

Indi nkuru wasoma: Rulindo: Abagabo 282 bamaze kwifungisha urubyaro burundu

Basabose Protégéne n'umugore we Mujawamariya Florence batanga ubuhamya bw'icyo kwifungisha burundu k'umugabo byabagejejeho
Abaturage b'ingeri zitandukanye bari baje kumva ibyiza byo kuboneza urubyaro
Ibirori byari byitabiriwe n'Abajyanama b'Ubuzima bakorera mu Murenge wa Muhanga
Umunyamabanga wa Leta muri Minisiteri y'Ubuzima, Dr Ndimubanzi Patrick
Umuyobozi w'Ishami ry'Umuryango w'Abibumbye ryita ku baturage, UNFPA, mu Rwanda, Jozef Maerien
Ababyifuza bahitaga bahabwa serivisi zo kuboneza urubyaro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza