Mu mujyi wa Kigali, 50 % y’ibishanga byataye umwimerere wabyo

Yanditswe na Ferdinand Maniraguha
Kuya 6 Gashyantare 2018 saa 08:42
Yasuwe :
0 0

Ikigo cy’Igihugu gishinzwe kurengera Ibidukikije (REMA) cyatangaje ko 50 % by’ibishanga biri mu Mujyi wa Kigali byataye imiterere byari bifite kubera ibikorwa bibyangiza bikorerwamo.

Ibarura ry’ibishanga mu Mujyi wa Kigali REMA yakoze muri Nyakanga 2017 ryagaragaje ko ibikorwa bigera kuri 20178 bikorerwa mu bishanga.

Bimwe muri ibyo bikorwa harimo insengero, amasoko, amagorofa, gare, ubucuruzi n’ibindi.

Itegeko Ngenga ryo kubungabunga ibidukikije ryashyizweho mu 2005 rigena ko ubutaka bw’ibishanga bwose ari ubwa Leta kandi ko inyubako n’ibindi bikorwa byose bishyirwa muri metero 20 uvuye ku gishanga.

REMA itangaza ko kuvana abantu mu bishanga bigamije kubungabunga Umujyi wa Kigali, hirindwa ibura ry’amazi n’ingaruka z’imihindagurukire y’ibihe.

Tariki 2 Gashantare ubwo hizihizwaga Umunsi Mpuzamahanga wahariwe ibishanga, Umuyobozi Mukuru Wungirije wa REMA, Munyazikwiye Faustin, yavuze ko kwangiza ibishanga mu Mujyi nka Kigali bifite ingaruka zikomeye.

Yagize ati “Ibishanga bigomba kugaragara nk’ubuhumekero bwa buri mujyi. Nta mujyi ushobora gukura udakeneye amazi, uko iterambere riza uko umubare w’abaturage wiyongera ni nako gukenera umutungo kamere w’amazi byiyongera. Ibyo bishanga bidufasha kuyungurura amazi yanduye ariko binadufasha gufata amazi bikaba byakongera amasoko dufite.”

Kuva muri Nyakanga umwaka ushize REMA yatangiye gufunga bimwe mu bikorwa byakorerwaga mu bishanga.

REMA itangaza ko ibikorwa birenga 205 bimaze gukurwa mu bishanga, ibitaravamo nabyo ngo byahawe igihe.

Munyazikwiye yagize ati “Hari ahari ibikorwa byoroshye bigomba guhita bivamo hari n’ahandi hari ibikorwa biremereye bisaba umwanya n’ibiganiro icyakora biri kugenda neza. Igihe ntarengwa cyagiye gitandukana bitewe n’ibikorwa birimo.”

Kugeza ubu, 50 % by’abatuye Isi batuye mu mijyi, biteganyijwe ko mu 2050 bazaba bageze kuri 66% . Ku Isi hose kandi ibishanga birenga 64% y’ibyari bihari mu 1900 bimaze kuzimira.

Umuyobozi Mukuru Wungirije wa REMA, Munyazikwiye Faustin,yavuze ko kwangiza ibishanga mu Mujyi nka Kigali bifite ingaruka zikomeye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza