Mu mezi umunani hagarujwe umutungo wa leta usaga miliyoni 616 Frw

Yanditswe na Evariste Nsengimana
Kuya 1 Kamena 2018 saa 08:02
Yasuwe :
0 0

Minisiteri y’Ubutabera (Minijust) yatangaje ko kuva muri Nyakanga 2017 kugera muri Werurwe uyu mwaka, hagarujwe amafaranga arenga miliyoni 616 z’amafaranga y’u Rwanda yari yaranyerejwe, angana na 52% by’ayanyerejwe yose, agomba kugaruzwa mu mwaka w’ingengo y’imari 2017/18.

Iyi mibare Minijust yayigagaje kuri uyu wa 31 Gicurasi 2018, mu nama y’itsinda ry’abafatanyabikorwa b’urwo rwego, yari igamije kurebera hamwe ibyo rwagezweho muri uwo mwaka n’ibindi.

Imibare igaragaza ko muri rusange mu mezi umunani, hagarujwe 616,688,568 Frw y’umutungo wa Leta wanyerejwe, ungana na 52% bya 1,187,235,012 Frw, agomba kugaruzwa mu mwaka w’ingengo y’imari wa 2017/18 wose.

Minijust kandi ivuga ko kuva muri Nyakanga 2017 kugera Werurwe uyu mwaka, hakiriwe ibirego 1038 byiganjemo ibimunga ubukungu bw’igihugu nko kunyereza umutungo wa Leta, kuwukoresha nabi n’ibifitanye isano nabyo, ibingana na 572 bishyikirizwa inkiko, 290 muri byo biraburanishwa birarangira naho 176 bikaba bikiburanishwa, biteganyijwe ko bizarangirana n’uyu mwaka w’ingengo y’imari.

Mu byaha bya ruswa, yatangaje ko hagati ya Nyakanga 2016 na Werurwe 2017, Urwego rw’Umuvunyi rwasesenguye ibirego byayo n’ibifitanye isano nayo 47 ndetse ko 66% byabyo bingana na 31 byarangijwe mu gihe bari bihaye intego yo kugera kuri 70%.

Uretse ibyo, ku banyereje umutungo wa Leta, Minijust yatangaje ko ku rubuga rwayo, imaze gushyiraho urutonde rw’abantu barenga 760 bafitiye umwenda Leta bagomba kwishyura.

Umuhuzabikorwa w’urwego rw’ubutabera muri Minijust, Nabahire Anastase, yavuze ko u Rwanda rwashyizeho gahunda zitandukanye zo kurwanya ruswa n’abanyereza umutungo w’igihugu.

Yakomeje agira ati “Ubu rero mu ngamba dufite, murabizi ko twubatse uburyo bw’ikoranabuhanga bunyuzwamo ibibazo by’amategeko cyangwa ibijya mu nkiko, bukaba bwaramaze guhuzwa n’ubundi dufite mu gihugu ariko tuzakomeza ku buryo bizahuzwa n’ibyo mu kigo cy’igihugu gishinzwe irangamuntu, ibyo muri Banki, ibireba iby’umutungo kamere n’ibireba uwo abantu bitunzeho, iy’ikigo cy’imisoro n’amahoro.”

“Uretse no kubasha gufasha gufunga ya mitungo igihe umuntu agiye mu kibazo na Leta, bizanahindura n’imitekerereze y’abantu batangire gutinya ibya Leta. Mu gihe gito uketsweho ibyaha runaka, adafungirwa uburenganzira ku mitungo ahubwo abuzwe kuba yayigurisha cyangwa yayihisha.”

Kugaruza imitungo yanyerejwe ku bahamwe n’ibyaha ni umwe mu myanzuro yafatiwe mu mwiherero wa 14 w’abayobozi bakuru b’igihugu wabaye kuva 25 Gashyantare kugeza ku wa 2 Werurwe 2017.

Kuva mu 2014/2015 kandi Guverinoma y’u Rwanda yashyizeho ingamba zo gukurikirana no kugaruza imitungo ya Leta iba yaranyerejwe n’abantu batandukanye, baba abahamijwe ibyaha, abagaragajwe n’ubushinjacyaha cyangwa Umugenzuzi Mukuru w’imari ya Leta.

Mu ntangiriro z’uyu mwaka, Minisiteri y’ubutabera yavuze ko guhera mu 2014/2015 hamaze kugaruzwa 1, 645, 377,533 Frw n’amadolari 6 943, agera kuri miliyari 6 Frw.

Umuhuzabikorwa w'Urwego rw'Ubutabera muri Minijust, Nabahire Anastase, yavuze ko u Rwanda rwashyizeho gahunda zitandukanye zo kurwanya ruswa n’abanyereza umutungo w’igihugu
Abantu batandukanye bari bitabiriye inama yo kurebera hamwe ibyo urwego rw'ubutabera rwagezeho muri uyu mwaka

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza