Mu mezi ane ya 2017 hafashwe toni irenga y’urumogi, mu wabanje hafatwa toni 4.5

Yanditswe na Evariste Nsengimana
Kuya 13 Kamena 2018 saa 10:01
Yasuwe :
1 0

Imibare yerekana ikoreshwa n’icuruzwa ry’ibiyobyabwenge mu Rwanda, igaragaza ko nibura mezi ane ya mbere y’umwaka ushize wa 2017 hafashwe toni 1.8 y’urumogi mu gihe mu mwaka wose wa 2016 hafashwe toni 4.5.

Iyi mibare yashyizwe ahagaragara kuri uyu Kabiri mu nama yahurije hamwe inzego za leta, Polisi, abanyamadini n’abandi, igamije kuvugutira umuti ikoreshwa ry’ibiyobyabwenge mu Rwanda.

Inagaragaza ko mu 2016 hafashwe litiro ibihumbi 18.2 za kanyanga, ibiro 4.1 bya Heroine (mugo) ibiro 6 bya mayirungi n’ibindi. Naho urebye mu mezi ane ya mbere ya 2017, hafashwe ibiro 1887 by’urumogi, litiro 3299 za kanyanga, ibiro bine bya mugo n’ibindi.

Ubushinjacyaha bw’u Rwanda buvuga ko abaregwa gukoresha no gucuruza ibiyobyabwenge bafatwa, ku buryo guhera muri Nyakanga 2017 kugera muri Gicurasi uyu mwaka, bwakiriye amadosiye 4724.

Imibare igaragaza ko muri ibyo birego, Ubushinjacyaha bwashyikirije inkiko amadosiye 4233, agera 4479 ararangizwa naho 245 ntaraburanishwa ngo arangire.

Urebye mu yindi myaka mike ishize, mu mwaka w’ingengo y’imari wa 2014/15 hakiriwe amadosiye 4308, mu 2015/16 hakirwa 4715 naho mu mwaka wa 2016/17 hakirwa 5659.

Umushinjacyaha Mukuru, Mutangana Jean Bosco, yavuze ko nubwo ayo madosiye yose atari ko yagiye ashyikirizwa inkiko, ayazishyikirijwe bwayatsinze hagati ya 97.8% na 95.9% kuko ibimenyetso biba byigaragaza.

Mutangana yakomeje agira ati “Umuntu ubikora arabifatanwa cyangwa se murabizi ko dufite laboratwari ipima ibintu byose bakabigusanga mu maraso cyangwa ukabifatarwa. Ni ukuvuga ngo ni icyaha ufatanwa ikimenyetso.”

Ingaruka z’ibiyobyabwenge zirigaragaza

Uretse ibigaragarira benshi nko mu tubari, amakimbirane yo mu ngo aterwa n’ikoreshwa ry’ibiyobyabwenge agenda yiyongera ndetse hari n’abantu usanga mu bitaro hirya no hino ari byo bazira.

Minisiteri y’ubuzima ivuga ko mu bitaro bivura indwara zo mu mutwe bya Ndera, hakiriwe abarwayi 994 mu 2010, mu 2015 hakirwa 1432, mu 2016 hakirwa 2804 naho mu mu mu 2017 hakirwa 1960.

Mu kigo ngororamuco cya Huye naho mu 2017 hakiriwe abagera kuri 209 bafite ibibazo bituruka ku ikoreshwa ry’ibiyobyabwenge naho mu bitaro by’uturere hakirwa abagera kuri 448.

Abahanga mu by’ubuzima bagaragaza ko hari ingaruka nyinshi z’ibiyobyabwenge harimo nk’uburwayi bw’umwijima, umutima, ubwonko, imyakura n’ubumuga bushobora kubikomokaho, ubw’urwungano ngogozi, ubuhumekero, kanseri, gutakaza ubudahangara bw’umubiri mu kurwanya indwara, Sida n’izindi.

Umuyobozi w’Ishami rishinzwe indwara zo mu mutwe mu kigo cy’Igihugu gishinzwe Ubuzima RBC, Dr. Yvonne Kayiteshonga, yavuze ko ari ikibazo gikomeye kandi Leta yashyizeho ingamba zikomeye zigamije kugica burundu.

Yagize ati “Gukoresha ibiyobyabwenge bifite ingaruka nyinshi zikomeye ku bukungu bw’igihugu, ndetse zikomeye no ku babikoresha zirimo n’urupfu.”

Yavuze ko kurwanya ikoreshwa ry’ibiyobyabwenge ari inshingano za buri munyarwanda wese haba abayobora amashuri, ababyeyi, urubyiruko, abayobozi b’amadini n’abandi.

Ubwo bushake ngo buzunganirwa na gahunda leta ishyiraho zirimo gukumira icuruzwa ry’ibinyobwa bitemewe nka Shisha no gushyiraho ibigo bishinzwe igororamuco bifasha ababaswe n’ibiyobyabwenge.

Minisiteri y’ubuzima ivuga ko ubushakashatsi buheruka bwerekanye ko nibura urubyiruko ruri hagati yimyaka 14 na 35 bangana na 52.4% bakoresheje rimwe cyangwa kenshi ibiyobyabwenge. Muribo 7.46% babaswe n’inzoga, 4.8% babaswe n’itabi.

Umuyobozi w'Ishami rishinzwe indwara zo mu mutwe mu kigo cy'Igihugu gishinzwe Ubuzima RBC, Dr. Yvonne Kayiteshonga, yavuze ko ari ikibazo gikomeye kandi Leta yashyizeho ingamba zikomeye zigamije kugishakira umuti
Inzego zitandukanye zahuriye hamwe ziga uko zahangana n'ibiyobyabwenge mu Rwanda
Umushinjacyaha Mukuru, Mutangana Jean Bosco, yavuze ko abantu bacuruza ibiyobyabwenge bakomeza kubihanirwa
Inzego zitandukanye ziyemeje guhangana n'ibiyobyabwenge

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza