Mu mafoto 80: Ibyishimo by’igisagirane ubwo Perezida Kagame yahaga abasirikare 320 ipeti rya Sous-Lieutenant

Yanditswe na Rabbi Malo Umucunguzi
Kuya 17 Ugushyingo 2019 saa 12:32
Yasuwe :
0 0

Wari umunsi udasa n’indi ku basirikare 320 bari barangije imyitozo n’amasomo bya gisirikare, bari bategereje gushyirwa mu rwego rwa Ofisiye na Perezida Paul Kagame, Umugaba w’Ikirenga w’Ingabo z’u Rwanda.

Bari bamaze igihe mu masomo n’imyitozo, kuko mu basoje amasomo harimo abakoze amasomo ya gisirikare umwaka umwe, abize imyaka ine batahanye ‘Bachelor’s Degree in Social and Military Sciences’ na bane barangije amasomo mu bihugu bitandukanye.

Mu bahawe amasomo bose hamwe kuri uyu wa Gatandatu mu Ishuri rya Gisirikare rya Gako mu Karere ka Bugesera, harimo abakobwa 29.

Ababyeyi bari babukereye urukumbuzi ari rwose, banyotewe no kubona abana babo mu mpuzankano y’Ingabo z’u Rwanda (RDF), bamwe bitwaje impano nini ndetse abandi bitwaza indabyo.

Ni ibirori byari byizihiye amaso, uhereye ku buryo itsinda ry’abasirikare ryateguwe ryagiye kwakira ibendera ry’igihugu hamwe n’irya RDF, uburyo abasirikare babitojwe bayagejeje imbere y’abasirikare bari bakereye akarasisi, n’uburyo abagakoze batahushaga cyangwa ngo basobanye mu ntambwe, bagendera ku mabwiriza yatangwaga na Major Sam Gahigi, wari wungirijwe na Capt Judithe Kampire.

Akarasisi kizihiye abakereye ibi birori, maze bishimangirwa n’umukuru w’igihugu watanze ipeti rya Su-Liyetona (Sous-Lieutenant), ribanziriza andi mu rwego rwa ofisiye.

Perezida Kagame yavuze ko Ingabo z’u Rwanda zifite amateka yihariye kuko zafatanyije n’abaturage mu kubohora igihugu no gukomeza kucyubaka, kugeza aho kiri uyu munsi, ati “niko bizakomeza, kugira ngo igihugu kigere aho cyifuza.”

Yongeyeho ati “Izo ngabo zirinda ibyubakwa n’abanyarwanda kandi nazo zirimo. Niwo murimo w’ibanze, niwo murimo wa mbere. Ingabo zikubaka kandi zikarinda n’amahoro, umutekano, igihugu gikenera, ibihugu byose bikenera kugira ngo amajyambere n’ibindi bishobore kuboneka.”

Uyu muhango uhumuje amarangamutima yari menshi ku basirikare bashya ba RDF, bahise bacinya akadiho bishimira intambwe bateye n’ikivi bushije, mbere y’uko bamenya aho bazakomereza ubutumwa mu nzego n’ibice bitandukanye mu gihugu.

Ni nako ababyeyi bagendaga begera abana babo buri umwe atanga impano yitwaje, abafite abana bongera kubabona nyuma y’igihe bari mu masomo n’imyitozo ikarishye.

Umuhango nk’uyu waherukaga ku wa 13 Nyakanga 2018 ubwo Perezida Paul Kagame yayoboraga umuhango wo gusoza amahugurwa ku basirikare 180 bo ku rwego rw’aba ofisiye muri iri shuri ry’i Gako.

Muri Kanama uwo mwaka hasohotse iteka rya perezida rizamura mu ntera abasirikare bose bari ku ipeti rya Sous-Lieutenant muri RDF bahabwa ipeti rya Lieutenant, ku buryo abasoje amasomo kuri uyu wa Gatandatu ari bo ba Sous-Leirutenant kugeza ubu u Rwanda rufite.

Abavandimwe, ababyeyi n'inshuti z'abarangije amasomo bari batumiwe muri ibi birori
Uhereye ibumoso: Umugaba w’Ingabo zirwanira mu kirere, Maj Gen Emmanuel Bayingana; Minisitiri w’Umutekano Gen Patrick Nyamvumba; Umugaba Mukuru w’Inkeragutabara Gen Fred Ibingira n’Umugenzuzi Mukuru w’Ingabo z’u Rwanda Lt Gen Jacques Musemakweli, bagera ahabereye uyu muhango i Gako
Uyu muhango witabiriwe n'abatumirwa bo mu nzego za gisirikare na gisivili
Minisitiri w'Ingabo Maj Gen Murasira Albert aganira na Rtd Gen Romeo Dallaire wari watumiwe muri uyu muhango
Ababyeyi n'imiryango y'abarangije amasomo ya gisirikare bari babukereye
Abasirikare bakuru muri RDF bitabiriye uyu muhango
Minisitiri w'Urubyiruko n'Umuco Rosemary Mbabazi aganira n'abandi bayobozi mbere y'uko umuhango utangira
Minisitiri w'Ubutabera akaba n'intumwa nkuru ya Leta Johnston Busingye aganira n'abayobozi bakuru ba Polisi
Perezida wa Komisiyo y'ububanyi n'amahanga, ubutwererane n'umutekano mu mutwe w'abadepite, Rwigamba Fidèle na Visi Perezida wa Komisiyo ya Sena ishinzwe ububanyi n'amahanga, ubutwererane n'umutekano, Senateri Mukakalisa Jeanne d'Arc bitabiriye uyu muhango
Gen Maj Eric Murokore aganira n'Umuyobozi Wungirije wa Polisi y'u Rwanda Felix Namuhoranye
Perezida Kagame aramutsa abitabiriye umuhango wo gusoza amasomo ku ba ofisiye bashya i Gako
Itsinda ry'abasirikare ryari ricungiye umutekano ibendera ry'igihugu n'irya RDF
Abasirikare bakuru bahaye icyubahiro indirimbo y'igihugu ubwo yaririmbwaga
Perezida Kagame ageze ku kibuga cyabereyeho uyu muhango haririmbwe indirimbo y'igihugu
Perezida Kagame yunamira ibendera ry'igihugu n'irya RDF ubwo yagenzuraga ingabo
Perezida Kagame agenzura abasirikare bashya binjiye muri RDF
Abasoje amasomo bakoze akarasisi, bagenda intambwe ku yindi badasobanya
Abasirikare barangije amasomo bari bagabanyijwe mu masibo atandatu
Akarasisi kari kanogeye ijisho
Umuyobozi Mukuru wa Polisi y'u Rwanda Dan Munyuza yari muri uyu muhango
Abasirikare bashya ba RDF bakoze akarasisi badasobanya
Military Band yasusurukije abitabiriye iki gikorwa mu buhanga bukomeye
Perezida Kagame ashyikiriza ibihembo abasirikare bahize abandi mu masomo
Uyu muhango witabiriwe n'abatumirwa batandukanye
Itsinda ry'abasirikare ryari ryiteguye gutanga ubufasha mu bijyanye n'ubuzima
Byari ibyishimo bikomeye mu nshuti n'imiryango
Abasirikare bato nabo bagize uruhare mu gususurutsa uyu muhango mu karasisi
Mu barangije amasomo harimo abakobwa 29
Umuvugizi wa RDF, Lt Col Innocent Munyengango ni we wari umuhuza w'amagambo
Military Band mu karasisi hamwe n'abandi basirikare
Umugenzuzi Mukuru muri RDF, Lt Gen Jacques Musemakweli aganira na Rtd Gen Romeo Dallaire
Umuyobozi w'Ishuri rya Gako Brig Gen Ephrem Rurangwa yahamije ko aba basirikare bahawe amasomo yo ku rwego rwo hejuru
Abasirikare bane barangirije amasomo mu bihugu bifatanya n'u Rwanda nabo bahawe ipeti rya Sous-Lieutenant
Abasirikare bashya bahawe uburenganzira bwo kwambikana amapeti babikorana ingoga n'ubuhanga
Perezida Kagame ari kumwe n'Umugaba Mukuru w'Ingabo z'u Rwanda Gen Jean Bosco Kazura nyuma yo gufata ifoto n'abofisiye bashya
Perezida Kagame n'abayobozi bakuru b'ingabo bafashe ifoto y'urwibutso hamwe n'abasirikare bashyizwe ku rwego rwa Ofisiye
Perezida Kagame hamwe n'abakuru b'ingabo mu ifoto y'urwibutso n'abasoje amasomo
Akanyamuneza kari kose, bakoma mu mashyi bacinya n'akadiho bishimira gusoza amasomo bamazemo igihe
Perezida Kagame nyuma yo gufata ifoto n'abasirikare bashya
Urugwiro rwari rwose nyuma y'igihe batabonana
Yasabwe n'ibyishimo agwa mu gituza cy'umubyeyi we nyuma y'umuhango yaherewemo ipeti rya Sous-Lieutenant
Ibyishimo byari byose ku basoje amasomo
Umubyeyi yamwakirije ururabo amwifuriza ishya n'ihirwe mu nshingano nshya
Uyu mwana yabonye uwo yari amaze iminsi adaca iryera kubera amasomo, amufata ubutamurekura
Ababyeyi bagiye gusanganira abana babo umuhango uhumuje

Amafoto: Niyonzima Moïse & MINADEF


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza