Mu kwezi kumwe gusa abagera kuri 60% bamaze gutanga mituweli mu mwaka wa 2017/2018

Yanditswe na IGIHE
Kuya 10 Kanama 2017 saa 07:38
Yasuwe :
0 0

Ikigo cy’igihugu cy’ubwiteganyirize mu Rwanda (RSSB) cyatangaje ko muri uyu mwaka w’ingengo y’imari 2017/2018 umaze ukwezi kumwe utangiye Abanyarwanda bagera kuri 60% bamaze gutanga ubwisungane mu kwivuza buzwi nka mituwele (Mutuelle de santé).

Iki kigo gitangaza ko gutanga ubu bwisungane byarenze intego cyari cyateganyije mu kwezi kwa mbere k’umwaka w’ingengo y’imari utangirana na Nyakanga kuko yari 50%.

Umuyobozi Ushinzwe Ubukangurambaga no kwandika abanyamuryango bashya ba Mituelle de santé muri RSSB, Déogratias Ntigurirwa, yabwiye The New Times ko hari intambwe yatewe ishimishije kuko nko muri Kanama umwaka ushize abari baratanze ubwisungane mu kwivuza bari 52%, mu gihe mu kwezi nk’uku kwa 2015 bari 50%.

Yemeza ko iyi ntambwe ituruka ku bukangurambaga bukorwa na RSSB bwo gushishikariza abaturage gutanga Mutuelle de santé mbere y’uko umwaka w’ingengo y’imari mushya utangira.

Yagize ati “Ukwiyongera kw’abiyandikisha mu bwisungane mu kwivuza uturuka ku mbaraga zishyirwa mu bukangurambaga. Twatangiye kwakira amafaranga muri Mutarama.”

RSSB yahawe inshingano zo kwakira no gucunga imisanzu ya Mutuelle de santé muri Nyakanga 2015 kugira ngo yongere ikigero cy’abitabiraga kuyitanga, inahashye imicungire mibi yayirangwagamo. Mu mwaka ushize abatanze iyi misanzu bageze kuri 84.3% ni ukuvuga abagera kuri miliyoni 9.6 biganjemo abatuye mu cyaro.

Ntugurirwa avuga ko mu bukangurambaga bashishikariza abaturage kwishyura imisanzu mbere badategereje ko Kamena irangira.

Yagize ati “Twabonye gutegereza gutanga umusanzu ku munota wa nyuma bituma hatangwa serivisi mbi. Abafite amafaranga bashobora kuyishyura vuba cyane.”

Imisanzu ya mituweli yishyurwa bigendanye n’icyiciro cy’Ubudehe umuturage abarizwamo. Leta yishyurira abari mu cyiciro cya mbere 2000 by’amafaranga y’u Rwanda kuri buri muntu, abari mu cya kabiri na gatatu bakishyura 3000 naho abari mu cya kane bangana na 0.5% by’abatuye igihugu cyose bakishyura 7000.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza