Mu kiganiro kirambuye, Ange Kagame yahishuye byinshi mu buzima bwe bwite

Yanditswe na Shaba
Kuya 10 Kanama 2014 saa 12:03
Yasuwe :
3 2

Ni umwana wa kabiri wa Perezida Paul Kagame na Jeannette Kagame, akaba ari we mukobwa wenyine muri uyu muryango ugwizwe n’abandi bana b’ abahungu batatu.

Nubwo atakunze kujya mu ruhame cyane, mu minsi ishize yagaragaye aherekeje se, aho bakiriwe na Perezida wa Leta Zunze Ubumwe z’Amerika muri White House, mu gihe habaga inama yahuje Leta Zunze Ubumwe za Amerika n’ abayobozi b’ibihugu by’Afurika.

Uwo munsi Ange Kagame yaherekeje se muri White House byatunguye benshi, ifoto yafashwe we na Perezida Kagame bari kumwe na Perezida Obama n’umugore we Michelle yarakwirakwijwe, itangazamakuru rirandika, havugwa byinshi, ndetse bamwe batangira guhuza na politiki uku kugaragara kwa Ange aherekeje umubyeyi we, kugeza aho nyir’ubwite (Ange) yifashishije urubuga Twitter, yanditse avuga ko bitumvikana ukuntu bamwe bahinduye politiki kuba yaraherekeje se muri icyo gikorwa.

Yanditse ati “Ni gute bamwe bahinduye politiki cyangwa ikintu kibi kuba naraherekeje Papa mu musangiro muri White House?[…]”

Ange Kagame akoresha twitter kenshi ku munsi, ndetse ibyo yandika bigakurikirwa cyane. Kuva aho atangiriye kuyikoresha, amaze gushyiraho ubutumwa (tweets) bugera hafi ku bihumbi 8, akurikirwa n’abantu 9.905, we agakurikira abantu 234.

Witegereje ibyo yandika ndetse n’uburyo akoresha Twitter, ntiwashidikanya ko Ange Kagame akunda muzika, siporo n’imyidagaduro muri rusange. Mu bihe bitandukanye akunze kwandika kuri twitter avuga ko indirimbo runaka aba ari kumva imushimishije, kuva ku ndirimbo nka ’Heart of The City’ ya Jay Z kugera kuri ’You Remind Me’ ya Usher, cyangwa se ubwo yanditse agaragaza ko yanyuzwe n’igitaramo cya Lionel Richie.

Naho mu gihe cy’Igikombe cy’Isi cya 2014 cyabereye muri Brazil, Ange yakunze kukivugaho byinshi nk’uwagikurikiraniraga hafi, dore ko yanyuzagamo akagaragaza ko ikipe runaka yabyitwayemo neza.

Nubwo ababyeyi ba Ange bahora bahuze bitewe n’imirimo ikomeye bakora, kimwe n’abandi babyeyi bose bagira urukundo, ntibaburira umwanya abana babo. Igihe kimwe yanditse kuri Twitter agira ati “Mama ni umugore w’igitangaza…muri make ahorana igisubizo kuri buri kintu”, ubundi arongera ati “Papa amaze iminota hagati y’itanu n’icumi ari kumfasha kurambura insokozo y’umusatsi nari najyanye mu bukwe […] urukundo rw’umubyeyi”.

Ikiganiro kirambuye na IGIHE

Mu kiganiro cyihariye yagiranye na IGIHE, Ange Kagame yatunyuriye muri bimwe mu bimwerekeyeho bitari bizwi na benshi:

IGIHE: Ufite imyaka ingahe?

Ange: 21

IGIHE: Ni ayahe magambo atatu wakoresha ugaragaza uwo uri we by’ukuri?

Ange: Ndi inkoramutima (loyal), ngira urukundo kandi mporana icyizere.

IGIHE: Kuri ubu uhugiye kuki, warangije kwiga?

Ange: Ndi mu mwaka wa nyuma muri kaminuza.

IGIHE: Hari ibikorwa waba ufite bijyanye no gufasha abatishoboye?

Ange: Nta bihari by’umwihariko, gusa hari ibyo nakoranye n’Umuryango wa mama (Imbuto Foundation).

IGIHE: Umuntu agusabye kugira icyo uvuga kuri Papa wawe mu magambo make, wamubwira iki?

Ange: Mbaye nshatse kugaragaza uwo Papa ari we mu ijambo rimwe, navuga ko ari umurwanashyaka. Yanyuze mu nzira y’inzitane, ariko byaramwubatse, ntibyamuciye intege. Mwemera nk’umugabo ukomeye mu buryo ntagereranywa.

IGIHE: Naho mama wawe?

Ange: Ni umuntu utikunda, kandi uhamye. Afatiye runini umuryango wacu. Akoresha uko ashoboye ngo abo akunda bagubwe neza.

IGIHE: Wavuga ibintu bitatu ukunda ku Rwanda?

Ange: Ni umuryango wanjye, ikirere, ndetse n’amafunguro yaho.

IGIHE: Mu myidagaduro no mu buzima busanzwe ukunda iki?

Ange: Nkunda kugerageza amafunguro mashya, gusohokera muri resitora nshya ndi kumwe n’inshuti zanjye, gutembera no gukina bowling.

IGIHE: Ukunda ayahe mafunguro?

Ange: Nkunda capati, isombe n’amandazi.

IGIHE: Naho mu mikino by’umwihariko?

Ange: Nkunda umukino wa Basketball, naho ikipe ni Boston Celtics.

IGIHE: Ukunda muzika? Ubu ni iyihe ndirimbo igukora ku mutima?

Ange: Ni “Stay With Me” ya Sam Smith.

IGIHE: Ubaye umushoramari, ni he washora amafaranga yawe mu Rwanda?

Ange: Ni mu bukerarugendo. Kuko u Rwanda rufite ibintu byinshi nyaburanga n’amateka n’umuco ukungahaye cyane. Hari kandi uburezi no kwikorera bisigaye bishyirwamo ingufu n’ urubyiruko, bigatuma rwiteza imbere, dore ko rugize hejuru ya 50% by’abaturage bacu.

IGIHE: Uvuga indimi zingahe?

Ange: Mvuga indimi ebyiri ntategwa, Icyongereza n’Ikinyarwanda, ndetse n’Igifaransa.

IGIHE: Hari ibihe udashobora kwibagirwa wagiranye n’umuryango wawe?

Ange: Sinshobora kwibagirwa ingendo za Noheri dukora. By’umwahariko urwo mu 2013.

IGIHE: Ni iki udashobora kwihanganira kubaho udafite?

Ange: Ni umuryango wanjye.

IGIHE: Ni nde ufataho urugero mu buzima bwawe, kandi kubera iki?

Ange: Ni Papa na Mama. N’ubwo baba bikoreye umutwaro uremereye ute, dore ko bakora n’akazi gafatwa nk’aka mbere kagoranye ku isi, ntibajya babura umwanya na rimwe mu buzima bwanjye n’ubw’abavandimwe banjye, yewe no mu tuntu duto cyane. Abantu benshi bananirwa kwita ku miryango yabo kubera imirimo bakora ariko njye nkunda ukuntu bombi bafatanya kutwitaho, ndetse n’umwe ku giti cye, kandi bakabibasha.

IGIHE: Ni ayahe magambo ugenderaho mu buzima?

Ange: Si byiza kujya mu kintu utagishyizeho umutima wawe wose".

IGIHE: Kwibohora kuri wowe bisobanuye iki?

Ange: Kwizihiza imyaka 20 u Rwanda rwibohoye bisigiye urungano rwacu inshingano zikomeye. Inshungu z’ababyeyi bacu zatumye tuba igisekuru cya mbere kibayeho mu Rwanda rwuje agaciro no kureshya kwa muntu. Ni inshingano zacu kurinda no gusigasira icyo ababyeyi bacu bari biteguye gupfira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza