Mu bana 3915 bapimwe, abagera 118 basanganywe virusi itera Sida

Yanditswe na Ndayikunda Josué
Kuya 22 Kamena 2019 saa 01:06
Yasuwe :
0 0

Umuryango Elizabeth Glaser Pediatric AIDS Foundation (EGPAF), watangaje ko kuva mu 2017 kugeza uyu munsi wapimye abana 3915 bavutse ku babyeyi bafite virusi itera Sida, muri aba basanze 118 aribo bavukanye ubu bwandu mu Rwanda.

Uyu muryango watangiye mu Rwanda mu 2000, wari ufite intego yo kugabanya abana bavukana ubu bwandu, guha imiti ababuvukanye n’ibindi.

Kuwa Kane w’iki cyumweru uyu muryango wavuze ko mu myaka 19 wari umaze mu Rwanda, wakoze ibikorwa birimo kugabanya ubwandu bw’abana bavukaga ku babyeyi banduye. Bitegangijwe ko EGPAF izasoza imirimo yayo tariki ya 25 Nyakanga 2019.

Bimwe mu byo uyu muryango wishimira ko wagezeho mu Rwanda ni uko kuva mu 2017 watangije gahunda yo gupima ababyeyi bafite virusi itera Sida, umwana uvutse kuri uwo mubyeyi agahabwa igisubizo ako kanya bidategereje iminsi iri hejuru ya 30 nk’uko mbere byari bisanzwe.

Umuyobozi Mukuru wa (EGPAF), Dr Angelique Fundi, yabwiye IGIHE ko intego z’uyu muryango zari izo guharanira ko nta mwana uvutse ku mubyeyi wanduye wongera kwandura n’ibindi.

Yavuze ko kimwe mu bibazo bahanganye nacyo, ni nk’aho wasangaga umubyeyi ufite virusi itera Sida ajya kubyarira kwa muganga, kugira ngo bamuhe igusibizo cy’uko umwana we yanduye cyangwa atanduye bigatwara iminsi myinshi.

Yagize ati “Kuva mu 2017 hari gahunda yitwa (Point-of-care) twatangije yo gupima ababyeyi bafite virusi itera Sida kandi ibisubizo by’abana babyaye bikaza ako kanya, ubundi mbere byabonekaga bitinze hejuru y’iminsi 30.”

Ati “Icyo iyi gahunda yaje gufasha ni ukugira ngo niba hari umwana wanduye, ako kanya umubyeyi abimenye ahite amushyira ku miti kuko umwana muto apfa vuba iyo afite ubwandu kurusha umuntu mukuru, ubundi hari igihe hashiraga ukwezi umwana ataramenya niba yaranduye.”

Ku byerekeranye n’uko ibikorwa by’uyu mushinga birangiye bikazagira ingaruka mbi kubo bafashaga, Dr Fundi yavuze ko abanyarwanda badakwiye guhangayika kuko bakoranye na Minisiteri y’ubuzima, ibikoresho byakoreshagwa uko ari 18 mu gihugu bizakomeza gukoreshwa, byaba na ngombwa leta ikongera ibindi mu gihugu.

Minisitiri w’Ubuzima Dr Diane Gashumba yavuze ko uruhare rwa EGPAF mu kugabanya umubare w’abana bavukana ubwandu bwa virusi itera Sida bibaha umukoro wo kubisigasira.

Yagize ati “Uyu ni umukoro uduhamagarira gukora, ni umwanya kandi wo gusubiza amaso inyuma tukareba ibyagezweho tunarebera hamwe uko twabisigasira. Ubusanzwe tuzi ko mbere byatindaga gusuzuma umwana wavukanye ubwandu ariko ubu mu buryo bushya bwateye imbere upima umwana ukivuka ukamenya ibisubizo, icyo byafashije ni uko umwana amenya igisubizo hakiri kare kandi akabasha kuvurwa.”

Yavuze ko uyu munsi u Rwanda ruri mu bihugu ku Isi bigiye kugera ku ntego ivuga ko abantu bagera kuri 95% bafite virus itera Sida bagomba kuba bazi ibipimo byabo.

Umubyeyi ubana n’ubwandu bwa virusi itera Sida watanze ubuhamya, yashimiye gahunda ya ‘Point-of-Care’ EGPAF yazanye, kuko ubu afite umwana w’amezi 10 wavutse ari muzima, akaba yarabimenye uwo munsi akimubyara kuko umwana yahise apimwa n’ibisubizo bigahita bisohoka.

Yagize ati “Ndashimira iyi gahunda kuko abana bacu barimo kubona ibisubizo ako kanya ndetse n’imiti.”

Kugeza ubu abanyarwanda bangana na 3% nibo bafite virusi itera Sida, 91% by’abanyarwanda kandi bazi uko bahagaze naho 92% y’abanduye bari ku miti.

Mu rwego rwo kugabanya virus itera Sida ku bana bavuka ku babyeyi bayifite, ababyeyi 99% nibo bipimisha kandi bagahabwa imiti ifasha kubyara abana batanduye. 1.8% gusa by’aba bana nibo bavukanye ubwo bwandu.

Minisitiri w'Ubuzima yavuze ko u Rwanda rukomeje kugera ku rwego rwiza rwo guhangana n'icyorezo cya Sida
Minisitiri w’Ubuzima Dr Diane Gashumba yavuze ko uruhare rwa EGPAF mu kugabanya umubare w’abana bavukana ubwandu virus itera Sida bibaha umukoro wo kubisigasira
Kugeza ubu abanyarwanda bangana na 3% nibo bafite virus itera SIDA, 91% by’abanyarwanda kandi bazi uko bahagaze naho 92% y’abanduye bari ku miti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza