Moto zirenga 1700 zakoze impanuka, zica abarenga 130 mu mezi 10

Yanditswe na Evariste Nsengimana
Kuya 23 Ugushyingo 2017 saa 05:57
Yasuwe :
0 0

Polisi y’u Rwanda yongeye kugaragaza ko abatwara abantu kuri moto bari mu bateza impanuka nyinshi zihitana ubuzima bw’abantu mu mihanda hirya no hino mu gihugu.

Ubwo kuri uyu wa Kane, Polisi yatangizaga ubukangurambaga hirya no mu mihanda mu gukumira impanuka, yatangaje ko kuva muri Mutarama 2017 kugeza uyu munsi, moto zimaze gukora impanuka ari 1765, zica abamotari n’abagenzi 132 abandi 251 barakomereka bamwe bibaviramo ubumuga budakira.

Polisi y’u Rwanda ishishikariza abakoresha umuhanda barimo abanyamaguru, abamotari n’abashoferi b’imodoka kubahiriza amategeko y’umuhanda no kwirinda icyatuma bashyira ubuzima bwabo n’ubw’abandi mu kaga.

Mu muhanda Kigali-Rwamagana, Umuyobozi wa Polisi y’u Rwanda, IGP Emmanuel K. Gasana, yasobanuriye abanyonzi, abamotari, abanyamaguru n’abashoferi inshingano zabo mu kwirinda impanuka, zirimo kubahiriza amategeko y’umuhanda, kwirinda ingeso ziganisha ku mpanuka nk’ubusinzi, kuvugira kuri telefoni batwaye n’ibindi.

Umuvugizi wa Polisi y’u Rwanda, ACP Theos Badege, yabwiye itangazamakuru ko abayobozi bakuru ba Polisi n’abandi bari hirya noku mihanda mikuru bashishikariza abantu gukumira impanuka.

Asobanura ubutumwa buri gutangwa yagize ati “Turabasaba kubahiriza amategeko. Twayashyize no mu gatabo gato cyane kagaragaza icyo umunyamaguru, umunyegare, uru kuri moto, utwaye imodoka agomba kuzirikana kandi tuzabikomeza no mu miganda. Turagira ngo umunyarwanda wese ukoresha umuhanda amenya ibyo yubahiriza.”

Yasobanuye ko imibare y’impanuka zihitana abantu igaragza ko byibuze ku munsi mu Rwanda hapfa umuntu umwe kandi ko bikwiye kugabanuka, mu minsi iri imbere hakazakazwa n’amategeko ahana.

Ati “Tugiye no kuvugurura n’amategeko ku buryo ibyaha bimwe bikomeye bituma umuntu atazongera no gutwara ikinyabiziga, akamburwa uruhushya ndetse n’igifungo.”

ACP Badege yanaburiye abashoferi bakora amakosa akomeye bajya kugenzuza ibinyabiziga byabo (Control Technic) bagatizanya ibyuma , bamara kumuha icyemezo akongera agasubizamo igishaje.

Abamotari banaherewe ibiganiro kuri Stade Amahoro, basabwa kwitonda no kubahiriza amategeko y’umuhanda, dore ko bari ku mwanya wa kabiri mu bateza impanuka cyane nyuma y’abanyamaguru.

Polisi ivuga ko mu Mujyi wa Kigali habarurwa moto zisaga ibihumbi 20 zikoreshwa umwuga wo gutwara abantu ariko ngo kubera amakosa abazikoresha bakora arimo gutwara nta ruhushya n’andi, hari moto 1012 zambuwe abayakoze n’ubu ikaba itabazi kuko batigeze bazikurikirana.

Umuyobozi wa Polisi y’u Rwanda, IGP Emmanuel K. Gasana mu bukjangurambaga bwo kurwanya impanuka, yatanze ahanditseho ubutumwa bwo kuzirwanya
Umuyobozi wa Polisi y’u Rwanda, IGP Emmanuel K. Gasana akangurira abantu kubahiriza amategeko yo gukoresha imihanda

Niba ushaka kuduha inkuru waduhamagara kuri 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza