Kwamamaza

Mukantabana yavuze ko ushinja impunzi z’Abarundi gushaka gufata intwaro ari umugome

Yanditswe kuya 26-10-2016 saa 19:28' na Mukaneza M.Ange


Minisitiri Ushinzwe Imicungire y’ibiza no kwita ku mpunzi, Mukantabana Seraphine yagereranyije abashinja impunzi z’Abarundi gushaka gufata intwaro ngo batere igihugu cyabo n’abagome batabifuriza kubaho.

Ubwo kuri uyu wa 26 Ukwakira 2016 yitabiraga inama yahuje MIDIMAR n’Abayobozi b’Ishami ry’Umuryango w’Abibumbye ryita ku Mpunzi (UNHCR), barebera hamwe uburyo Abarundi bahungiye mu Rwanda bakwimurirwa mu bindi bihugu, Mukantabana yagaragaje ko nta wukwiye gukinira politiki ku mpunzi.

Aha yakomozaga ku bavuga ko u Rwanda rufasha impunzi z’Abarundi gutera igihugu cyabo aho yashimangiye ko bivugwa n’abashaka kuzikiniraho politiki.

Ati”Nubwo baza kubera ibibazo bya politiki ariko impunzi ni abantu bakeneye gutabarwa, ni abantu bakeneye kwitabwaho no kurengerwa. Ntabwo rero bagombye gukinirwaho politiki.”

Yakomeje yamagana abagenda bashaka impamvu zo kuza kubakiniraho, kubifotorezaho no kubavugiraho amagambo adasobanutse ahamya ko ari abadashaka ko impunzi z’Abarundi zirengerwa.

Ati” Umuntu uri kuzana kiriya kintu cyo kuvuga ngo impunzi z’Abarundi zirashaka gufata intwaro, zirashaka gutera igihugu cyabo uwo ni umugome. Ni nko kuvuga ngo nimuze muzirasire hano ni abanzi b’igihugu.”

Umuyobozi wungirije ushinzwe kurengera impunzi muri UNHCR, Volker Türk na we yagaragaje ko impunzi zitemererwa kujya mu bikorwa bya politiki ndetse banahamya ko ibivugwa ko u Rwanda rufasha Abarundi gutera igihugu cyabo batemera ko ari ukuri.

Ati”Birasobanutse neza, nk’uko nabivuze gutanga ubuhungiro ntabwo ari politiki, ni gikorwa cya kimuntu. Ubugwaneza bw’abanyarwanda na leta y’u Rwanda ni ibyo gushimwa. Nta kimenyetso cy’ibyo umaze kuvuga dufite. Iteka dukorana na leta ku bijyanye n’umutekano w’abari mu buhungiro kandi twishimiye kuba u Rwanda rwarashyizeho ingamba zo kugira ngo bigerweho.”

Ubwo yari yasuye impunzi z’Abarundi ziri mu nkambi ya Mahama mu karere ka Kirehe kandi, Türk yagarutse ku kibazo cyo kugarura amahoro mu Burundi avuga ko politiki itari mu nshingano zabo ariko ko bazakomeza gukora ubuvugizi no kwereka amahanga ko nta wukwiye guhera mu buhungiro.

Mu Rwanda habarurwa impunzi z’Abarundi zigera ku bihumbi 85, ibihumbi 51 muri bo baba mu nkambi ya Mahama.

Minisitiri Mukantabana yavuze ko impunzi zidakwiye gukinirwaho politiki

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved