Minisitiri w’Umuryango wa Djibouti yashimye gahunda yo kwita ku bana bato y’u Rwanda

Yanditswe na Evariste Nsengimana
Kuya 20 Gicurasi 2018 saa 11:35
Yasuwe :
0 0

Minisitiri w’Abagore n’Umuryango wa Djibouti, Moumina Houmed Hassan, yavuze ko gahunda u Rwanda rwashyizeho yo kwita ku bana bato ari nziza ko n’ibindi bihugu bya Afurika bikwiye kuyishyira mu bikorwa.

Yabivuze kuri uyu wa 18 Gicurasi 2018, ubwo intumwa za Djibouti zari ziyobowe na Minisitiri Moumina, zasuraga gahunda yo kwita ku bana bakiri bato binyuze muri gahunda mbonezamikurire y’abana bato, ku irerero rya Nyarugunga riherereye mu Karere ka Kicukiro.

Nyuma yo gusobanurirwa imikorere y’irerero, Minisitiri Moumina yagize ati “Turumva tugiye gutangiza ubu buryo bwo kwita ku bana bato, tugashyiraho uburyo bwo kwita ku mikurire yabo, kubabungabunga mu mikurire yabo. Ndatekereza ko Djibouti atari cyo gihugu cyonyine muri Afurika kizigana ubu buryo bwo kwita ku bana bato, kandi ndashima abanyarwanda, barenze urwego rwo kwita ku kiremwa muntu, none bageze ku rwego rwo gushora imari mu kwita ku bana bakiri bato.”

Minisitiri Moumina n’itsinda babanje kugirana ibiganiro na Minisitiri w’Uburinganire n’Iterambere ry’Umuryango mu Rwanda, Nyirasafari Espérance , berekwa intambwe u Rwanda rumaze gutera mu kwimakaza ihame ry’uburinganire n’ubwuzuzanye no guteza imbere umugore.

Asobanura impamvu z’uruzinduko rwabo, Minisitiri Nyirasafari yagize ati“Bashatse kuza kureba uko twakoze mu gihugu cyacu ku byerekeranye n’uburinganire no kwita ku mwana. Muri iki kigo mbonezamikurire y’abana bato, yaraje kwirebera uburyo ikibazo kiduhangayikishije cyo kuvuga ngo umwana akure neza mu mikurire ye yose, arebe uko tubikora dufatanyije n’ababyeyi. Natwe turishimira ko iki gikorwa tuzagikomeza mu gihugu hose kugira ngo tunarwanye cya kibazo cyo kugwingira n’ababyeyi babigizemo uruhare.”

Banasuye Ikigo cya Polisi y’Igihugu cya Isange One Stop center, gifasha abakorewe ihohoterwa rishingiye ku gitsina, basura urwibutso rwa Jenoside yakorewe abatutsi rwa Kigali ruri ku Gisozi, ikigo cya gGahaya Link, giteza imbere abagore kikanabubakira ubushobozi binyuze mu kudoda uduseke, banasura ingoro y’Inteko Ishinga Amategeko babasha no gutemberera Ingoro y’amateka yo guhagarika Jenoside.

Gahunda y’ikigo mbonezamikurire, ni imwe mu zashyizweho mu rwego rwo guhangana n’ikibazo cy’igwingira ry’abana. Igenzura ryakozwe ku rwego rw’ubuzima bw’abaturage mu Rwanda mu 2015 (DHS), ryerekanye abana bagwingiye bageraga kuri 38%.

Minisitiri w'Uburinganire n'Iterambere ry'Umuryango, Nyirasafari Espérance
Minisitiri w’Abagore n’Umuryango wa Djibouti, Moumina Houmed Hassan
Iri tsinda ryasobanuriwe imikorere y'Inteko Ishinga Amategeko
Basuye urugo mbonezamikurire

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza