Minisitiri w’Uburezi mushya yakirijwe ibibazo birimo ireme ry’uburezi ridashimishije

Yanditswe na Jean Pierre Tuyisenge
Kuya 13 Ukuboza 2017 saa 09:10
Yasuwe :
0 0

Minisitiri w’Uburezi mushya, Dr Mutimura Eugene, yasabwe kuzibanda ku bibazo byugarije urwego rw’uburezi birimo kuba abarimu kugeza ubu bahembwa umushahara muto, amashuri ashaje, ireme ry’uburezi ritaragera ahifuzwa n’ibindi.

Dr Mutimura yagizwe Minisitiri w’uburezi ku wa 6 Ukuboza 2017, asimbuye Dr Musafiri Papias Malimba wari umazeho imyaka ibiri n’igice.

Mu ihererekanyabubasha kuri yu wa Gatatu, Dr Mutimura yajejweho ibibazo birimo kuba abarimu bagihembwa umushahara muto, ikibazo cy’inyubako z’amashuri ashaje akenewe kuvugururwa, ireme ry’uburezi riri hasi n’ibindi agomba kuzitaho.

Umunyamabanga uhoraho muri Mineduc, Mulindwa Sam, yavuze ko urwo rwego rufite ibibazo bigomba gushakirwa umuti kugira ngo uburezi burusheho gutera imbere mu Rwanda.

Yagize ati “Hari imbogamizi zirimo kuba hari ibyumba by’amashuri bikenewe kubakwa, haracyari ibimaze kubwakwa ariko biracyabura, hari kandi n’ibikenewe kuvugururwa, andi mashuri nta ntebe afite.”

Yavuze ko habaruwe ibyumba by’amashuri bigera ku 4000 byagombaga kubakwa bitarenze uyu mwaka none hamaze kubakwa 1000 byonyine.

Yanabwiwe ko kugeza ubu hakiri laboratwari nkeya ugereranyije n’izikenewe, cyane cyane mu mashuri makuru na za kaminuza zimwe na zimwe.

Hari kandi ikibazo cy’ibikoresho bidahagije bikoreshwa mu kumenyereza abakozi umwuga ndetse n’umushahara muto w’abarimu. Aha Mulindwa yagize ati “Abarimu bahembwa amafaranga make cyane, iyo ubagereranyije n’abandi bakozi ba leta usanga abarimu bari hasi cyane.”

Dr Musafiri Papias Malimba yavuze ko nubwo ibibazo bigihari ariko ko hari ibyamaze gukorwa ndetse ngo hari n’izindi ngamba zafashwe zigamije gukemura bimwe muri ibyo bibazo, asaba umusimbuye kuzakora ku buryo Abanyarwanda bagera ku burezi bufite ireme.

Yagize ati “Nubwo dufitemo ibyo bibazo byinshi, hari byinshi tumaze kugeraho abantu bakwiye kwishimira ariko turacyafite urugendo, uyu munsi twishimira ko dufite uburezi budaheza kandi bwageze kuri bose, ariko Abanyarwanda bakeneye ikirenze uburezi kuri bose bakagera ku burezi bufite ireme kandi kuri bose.”

Minisitiri mushya w’Uburezi, Dr Mutimura Eugene, yavuze ko ku bufatanye n’abandi bakozi yizeye ko ibibazo bigihari bizakemuka.

Yagize ati “Dr. Papias yabivuze ngo ntabwo abashinzwe uburezi ari abari aha gusa ariko ndahamya ko ari mwebwe b’ibanze, hari byinshi mwagezeho kandi nidufatanya n’abaminisitiri, abayobozi b’inzego zitandukanye ndetse n’abandi bakora hirya no hino mu turere, ndahamya ko hari byinshi tuzageraho ku bibazo n’imbogamizi zihari.”

Yavuze ko ibyo bitagerwaho n’umuntu umwe ahubwo ko bazafatanya muri byose. Ati “ Niyo mpamvu mbasaba amaboko yanyu kandi mbizeza ko tuzakorana kugira ngo tubigereho.”

Ministiri w'Uburezi mushya, Dr Eugene Mutimura ashyikirizwa ibitabo bya Minisiteri
Minisitiri w’Uburezi mushya, Dr Mutimura Eugene
Dr Musafiri Papias Malimba yavuze ko uburezi bwageze kuri bose ariko ntiburagera ku ireme rikwiye
Umunyamabanga uhoraho muri MINEDUC, Mulindwa Sam

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza