00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri w’Ubuhinzi muri Centrafrique yasuye umupaka w’u Rwanda na Congo

Yanditswe na Mukwaya Olivier
Kuya 18 Nzeri 2021 saa 08:39
Yasuwe :
0 0

Minisitiri w’Ubuhinzi, Ubworozi n’Iterambere ry’Icyaro muri Repubulika ya Centrafrique, Éric Rokosse-Kamot, yasuye umupaka w’u Rwanda na Reupubulika Iharanira Demokarasi ya Congo, ashima ibikorwa by’iterambere bigaragara mu Karere ka Rubavu.

Uyu muyobozi ari mu ruzinduko mu Rwanda, aho ari kwigira ku iterambere iki gihugu kimaze kugeraho mu rwego rw’ubuhinzi, na cyane ko ibihugu byombi bifitanye amasezerano y’imikoranire mu bijyanye n’ubuhinzi.

Minisitiri Éric Rokosse-Kamot yavuze ko yasanze hari byinshi igihugu cye cyakwigira ku Rwanda mu bijyanye no guteza imbere ubuhinzi n’ubwongereza, ndetse avuga ko yasanze ubucuruzi ku mupaka w’ibihugu byombi buteye imbere.

Ati “Ugendeye ku ngano y’ibicuruzwa binyuranamo hagati y’ibihugu bibiri, uhita ubonamo agaciro k’ubuhinzi kuko u Rwanda rufite ubuhinzi buri gutera imbere ku buryo rwohereza bimwe mu bihingwa byarwo muri Congo. Hari ibiribwa byinshi by’ibanze nabonye bigana mu mujyi wa Goma byanshimishije, bigaragaza ko ubuhinzi buhagaze neza kuko aho naciye hose guturuka i Kigali nabonye ahantu hose hahinze ibiribwa bifasha mu guhaza Abanyarwanda.”

Umuyobozi w’Akarere ka Rubavu Wungirije, Ushinzwe Imari n’Iterambere ry’Ubukungu, Nzabonimpa Deogratias, yavuze ko kuba ubuhahirane hagati y’u Rwanda na Congo busigaye bwigirwaho n’ibindi bihugu, byerekana ko buri gutera imbere.

Ati “Yasuye imipaka yose, areba uko ubuhahirane bukorwa hagati y’ibihugu byombi, ariko yibanda ku kureba uko ibikomoka ku buhinzi byambuka bijya muri Congo. Ibi byagaragaje ko abaturage bacu badashimwa n’ubuyobozi gusa, kuko bakurura n’abandi bo mu bindi bihugu.”

Umunyamabanga wa Leta muri Minisiteri y’Ubuhinzi n’Ubworozi, Eng Ngabitsinze Jean Chrysostome, yavuze ko u Rwanda na Centrafrique uru rugendo ruzafasha mu kwerekana ibishobora kwigirwaho, bigateza imbere umubano w’u Rwanda na Centrafrique, bigendanye n’amasezerano ibihugu byombi bifitanye.

Ati “Hari amasezerano twasinyanye yo mu buhinzi n’ubucuruzi bw’ibikomoka ku buhinzi ndetse no mu kubaka inzego kuko igihugu cyabo kivuye mu bibazo. Turi kubafasha kureba uko babona imbuto z’indobanure, tukabaha ubumenyi dufite kugira ngo hatezwe imbere ibihugu byombi. Yanasuye inganda zo mu Rwanda ziri kwitegura gushorayo imari mu rwego rw’ubuhinzi n’ubworozi.”

Centrafrique ni igihugu gifite ubutaka bunini bwo guhingaho kuko gikubye u Rwanda inshuro 20, kandi kikaba gituwe n’abaturage batarenze miliyoni esheshatu gusa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .