Kwamamaza

Minisitiri w’Intebe yatashye Ikigo cy’Icyitegererezo mu guca ihohoterwa

Yanditswe kuya 28-11-2016 saa 13:31' na Cyprien Niyomwungeri


Minisitiri w’Intebe, Anastase Murekezi, Minisitiri w’uburinganire n’iterambere ry’umuryango, Nyirasafari Esperance n’abitabiriye inama nyafurika y’abagore bo mu nzego z’umutekano bagera kuri 250, batashye ku mugaragaro Ikigo cy’Icyitegererezo muri aka Karere, kigamije guca ihohoterwa rikorerwa abagore n’abana.

Uyu muhango wabaye kuri uyu wa Mbere tariki 28 Ugushyingo 2016, ku cyicaro cya Polisi y’u Rwanda ku Kacyiru, ni kimwe mu bikorwa by’inama nyafurika y’abagore bo mu nzego z’umutekano ifite intego igira iti “uruhare rw’umugore mu kubungabunga umutekano”.

Iki kigo cyuzuye gitwaye amafaranga y’u Rwanda miliyoni 745 249 506, kigizwe n’inyubako eshatu zirimo ibiro umunani by’ubuyobozi, ibiro 10 byo gutangiramo amahugurwa n’icyumba kinini cyakira abantu 100.

Kizafasha mu bushakashatsi ku byaha by’ihohoterwa rikorerwa abagore n’abana, gusangira ubumenyi n’ubunararibonye, guhanahana amakuru y’uburyo iryo hohoterwa ryacika no kubaka ubushobozi mu kurihashya.

Iki Kigo kizanakoreramo Ubunyamabanga bw’ Ibyemezo by’Itangazo ry’Inama Mpuzamahanga ya Kigali (KICD), kizafasha mu kwegeranya no guhanahana amakuru, kubika amakuru y’ibikorwa by’indashyikirwa, gutegura neza ibikorwa by’ubufatanye n’abaturage mu kubungabunga umutekano, kunoza imikoranire n’izindi nzego no gufatanya muri gahunda zitandukanye, gushyiraho amategeko no kugena gahunda zifasha ibihugu bigize uyu muryango.

Umuvugizi wa polisi y’u Rwanda, ACP Theos Badege yavuze ko kiriya kigo cya Afurika gishinzwe kubaka ubushobozi bw’inzego zitandukanye kugira ngo zibashe kurwanya ihohoterwa rikorerwa abagore, abakobwa n’abana kizagira akamaro kuko kugeza ubu rikigaragara kuri uyu mugabane.

Yavuze ko ibyaha byo gusambanya abana, guhohotera abagore n’amakimbirane yo mu ngo bikomeje kuza ku isonga y’ibyaha by’ihohoterwa ku Isi.

Yagize ati “Kizakora ubushakashatsi hajye hamenyekana ibyaha bikorwa, impamvu bikorwa n’ingaruka bifite, nyuma y’ibyo higwe ingambwa z’ibyakorwa hanarebwa igihugu gifite imikorere myiza n’ahandi bayigane.”

Mu ijambo yagejeje ku bitabiriye inama, Minisitiri Murekezi yashimiye byimazeyo abagize uruhare mu ishyirwaho rya kiriya kigo by’umwihariko Umuryango w’Abibumbye na Banki y’Isi batanze inkunga zinyuranye.

Yahamagariye ibihugu byose biri mu nama Mpuzamahanga ya Kigali (KICD), kubyaza umusaruro ubunararibonye bifite, bigatanga umusanzu mu mikorere ya kiriya kigo rukumbi ku mugabane wa Afurika.

Yagize ati “Igikorwaremezo cyiza kirabonetse, ubu dukeneye kukibyaza umusaruro ushoboka kugira ngo twizere ko cyagize akamaro cyateganyirijwe. Kizongera imbaraga z’ubufatanye hagati y’inzego z’umutekano mu kurandura ihohoterwa rikorerwa abagore n’abakobwa.”

Muri iyi nama y’abagore bo mu nzego z’umutekano muri aka karere hanashyizwe ku mugaragaro igitabo cya Isange One Stop Center cyitwa «Rwanda’s Holistic Approach to Fighting Gender Based Violence and Child abuse: The Isange One Stop Centre Model".

Iki gitabo kiragaragaza imikorere myiza n’ingamba u Rwanda rwashyizeho mu kurwanya ihohoterwa. Ibindi bihugu birareba uko abaganga, ubutabera na polisi buzuzanya mu kwita ku wahohotewe, guhana uwakoze icyaha n’ibindi.

Kizafasha abandi banyafurika bashaka kubaka cyangwa gushyiraho ibigo nka Isange One Stop Center.

Mu bindi abitabiriye iyi nama y’iminsi ibiri baganira harimo kungurana ibitekerezo ku kamaro ko gushyiraho uburyo umugore yarushaho kugira uruhare mu bikorwa byo kugarura amahoro no kubungabunga umutekano, hagamijwe amahoro n’umutekano birambye.

Bazanaganira birambuye ku buryo bwakoreshwa mu gukumira no kurwanya ihohoterwa rishingiye ku gitsina n’irikorerwa abana, uruhare rw’imiryango y’iterambere mu kwita ku burenganzira bw’umugore, ubw’abakobwa n’ubw’abana muri rusange, banaganire ku buringanire bw’ibitsina byombi hagamijwe umutekano n’iterambere birambye.

Hazaba n’ibiganiro ku ruhare rw’abagore bo mu nzego z’umutekano mu kurwanya ibyaha biri kuvuka muri iki gihe.

Abayobozi batandukanye mu nzego nkuru z'igihugu bari bitabiriye uyu muhango
Minisitiri Murekezi yashimiye byimazeyo abagize uruhare mu ishyirwaho rya kiriya kigo barimo Umuryango w’Abibumbye na Banki y’Isi batanze inkunga zinyuranye
Minisitiri w'Intebe, yavuze ko igisigaye ari ukubyaza umusaruro ushoboka iki kigo kugira ngo kigire akamaro cyateganyirijwe
Umuyobozi w'amashami ya Loni akorera mu Rwanda, Lamin Manneh(wa kabiri ibumoso) mu bitabiriye ifungurwa ry'iki kigo
Abitabiriye iyi nama bazaganira ku buryo bwakoreshwa mu gukumira no kurwanya ihohoterwa rishingiye ku gitsina n’irikorerwa abana

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Monday 5 Ukuboza 2016
Copyright © 2009 -2014 - IGIHE Ltd - All Rights Reserved