Minisitiri w’Intebe yasangije amahanga intambwe y’u Rwanda mu kurandura burundu inzara n’imirire mibi

Yanditswe na Ishimwe Israel
Kuya 28 Ugushyingo 2018 saa 08:45
Yasuwe :
0 0

Minisitiri w’Intebe, Dr Ngirente Edouard, yasobanuye ko guhangana n’ikibazo cy’imirire mibi bisaba by’umwihariko kwita ku bagore batwite n’impinja, gushyiraho gahunda zigamije kwihaza mu biribwa no kugeza amazi meza kuri bose.

Ni ubutumwa yatangiye i Bangkok muri Thailand ku wa 28 Ugushyingo 2018, ubwo hatangizwaga Inama Mpuzamahanga y’iminsi itatu ku “Kwihutisha ingamba zo guca burundu inzara n’imirire mibi.”

Iyi nama yitabiriwe n’abayobozi bakomeye, abakora muri gahunda zo kurwanya inzara, abashakashatsi baturutse ku Isi yose.

Yateguwe n’Ikigo Mpuzamahanga gishinzwe Ubushakashatsi ku biribwa (IFPRI) n’Ishami rya Loni rishinzwe Ubuhinzi n’Ibiribwa ku Isi (FAO).

Ikibazo cy’inzara n’imirire mibi gihangayikishije Isi. Raporo y’Umuryango Mpuzamahanga wita ku Bana (UNICEF) ya 2016, yagaragaje ko mu bana miliyoni 667 ku Isi, abasaga miliyoni 159 bari baragwingiye.

Mu Rwanda, ibarura ryo mu 2015 ryerekanye ko abana 38.5 % bari munsi y’imyaka itanu bagwingiye.

Minisitiri w’Intebe Dr Ngirente yavuze ko mu Cyerekezo 2063 cya Afurika hazitabwa cyane ku kurandura burundu inzara no kwihaza mu biribwa.

Yagize ati “Ibi bizagerwaho binyuze mu kuvugurura ubuhinzi, kubuhuza n’ubucuruzi bw’ibibukomokaho no kongerera umusaruro wabyo agaciro.”

Dr. Ngirente yasangije abitabiriye inama ibisubizo by’umwimerere by’u Rwanda mu kugabanya inzara n’imirire mibi.

Izi gahunda zirimo iyo kuvugurura ubuhinzi, kwihutisha iterambere ry’ubuhinzi mu kongera umusaruro w’ibihingwa ngengabukungu; guhuza ubutaka, kurwanya isuri no kuhira imyaka hagamijwe kongera umusaruro.

Guverinoma y’u Rwanda yanashyize mu bikorwa ingamba zo guhangana n’ikibazo cy’imirire mibi.

Minisitiri w’Intebe, Dr Ngirente ati “Hanogejwe ishyirwa mu bikorwa rya gahunda Mbonezamikurire y’Abana (ECD). Leta yafatanyije n’Inzego z’abikorera mu kongera ishoramari mu ikorwa ry’ibiribwa bifite intungamubiri. Hashyizweho politiki y’igihugu ihuriweho n’inzego nyinshi ku biribwa n’imirire mu kurwanya kugwingira.”

Mu zindi gahunda, u Rwanda rwashyizeho abajyanama b’ubuzima b’abakorerabushake 58,000 mu midugudu yose bakurikirana abafite ibibazo by’imirire mibi.

Igihugu cyanimakaje gahunda ya Girinka Munyarwanda yatangiye mu 2006, ubu imaze kugeza inka zirenga ibihumbi 330 ku Banyarwanda.

Yakomeje ati “Twashyizeho gahunda y’Inkongoro y’Umwana, kugeza ubu abana bagera ku 75,000 biga mu bice by’icyaro yabagezeho. Twanashishikarije Abanyarwanda gahunda y’Akarima k’Igikoni bashobora kubonamo imboga aho batuye.”

U Rwanda rufite intego ko ruzaba rwaciye burundu inzara no kugwingira kw’abana mu 2025 no kurandura imirire mibi mu 2030.

Nyuma y’iyi nama, Minisitiri w’Intebe, Dr. Ngirente yanakurikiranye umuhango wo gushyira umukono ku masezerano hagati y’Umuyobozi w’Ikigo Mpuzamahanga gishinzwe Ubushakashatsi ku Biribwa (IFPRI), Dr. Shenggen Fan na Minisitiri w’Ubuhinzi n’Ubworozi, Mukeshimana Gérardine.

Minisitiri w’Intebe, Dr Ngirente Edouard_ Visi Perezida wa Zambia, Inonge Wina (ibumoso) na Zinash Tayachew, umugore wa Minisitiri w’Intebe muri Ethiopia, Abiy Ahmed
Minisitiri w’Intebe, Dr Ngirente Edouard yahagarariye isinywa ry'aya masezerano
Umuyobozi w’Ikigo Mpuzamahanga gishinzwe Ubushakashatsi ku Biribwa (IFPRI), Dr. Shenggen Fan na Minisitiri w’Ubuhinzi n’Ubworozi, Mukeshimana Gérardine basinya amasezerano
Minisitiri w’Intebe, Dr Ngirente Edouard, yasobanuye intambwe u Rwanda rumaze gutera mu kurwanya inzara n'imirire mibi
Nyuma y’inama, Minisitiri w’Intebe, Dr Ngirente Edouard yahuye n’Umuyobozi w’Ikigo Mpuzamahanga gishinzwe Ubushakashatsi ku Biribwa (IFPRI), Dr. Shenggen Fan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza