Minisitiri w’Intebe yasabye umushumba mushya w’Abangilikani gushyira imbere imibereho myiza y’abayoboke

Yanditswe na Ferdinand Maniraguha
Kuya 10 Kamena 2018 saa 03:27
Yasuwe :
0 0

Minisitiri w’Intebe, Dr Edouard Ngirente, yasabye umushumba mushya w’Itorero ry’Abangilikani mu Rwanda (EAR), Musenyeri Dr. Laurent Mbanda, guharanira guteza mbere imibereho myiza y’abayoboke yahawe kuyobora.

Yabitangaje kuri iki Cyumweru mu muhango wo kwimika Musenyeri Laurent Mbanda wahawe inkoni yo kuyobora EAR asimbuye Musenyeri Dr. Onesphore Rwaje.

Minisitiri w’Intebe Ngirente yashimiye Musenyeri Mbanda amwizeza ubufatanye bwa Guverinoma mu nshingano nshya yahawe.

Dr. Ngirente yasabye Mbanda gushyira imbere ibiteza imbere abayoboke ba EAR, aharanira ko bagira imibereho myiza.

Yagize ati “Guverinoma y’u Rwanda irashaka gukomeza gufatanya n’amadini gushyira mu bikorwa gahunda za Leta zigamije guteza imbere imibereho myiza y’abaturage ndetse umukirisitu mwiza akaba afite imibereho myiza […] Musenyeri Mbanda ndamwifuriza imirimo myiza.”

Yashimye uruhare rw’Itorero Angilikani mu iterambere ry’abanyarwanda, asaba abayobozi baryo gukomeza gufasha abayoboke kwitabira gahunda za Guverinoma zirimo uburezi, ubuvuzi, ubukungu n’ibindi.

Ati “Mu byo dusaba amadini n’amatorero harimo gushishikariza abayoboke banyu kurushaho kwitabira ibikorwa biteza imbere ubukungu ndetse bibavana mu bukene no kongera umusaruro mu byo bakora byose”.

Musenyeri Dr. Laurent Mbanda w’imyaka 64 wahawe kuyobora Itorero rya Angilikani mu Rwanda na Diyosezi ya Gasabo yahoze ari umushumba wa Diyosezi ya Shyira.

Uyu mugabo wanayoboye umuryango Compassion International Rwanda, yavuze ko azateza imbere itorero by’umwihariko aharanira kwigira kwaryo.

Mu ntego ze z’ibanze, yavuze ko azita ku kurangiza inyubako z’itorero zari zarabuze uko zirangira, gutangiza Kaminuza y’Abangilikani mu Rwanda, gushyira imbere ivugabutumwa, gukwirakwiza amashuri y’incuke n’ibindi.

Yavuze ko ibyo yanyuzemo byose bizamubera isomo n’inkunga mu nshingano nshya yahawe nk’umuyobozi wa EAR.

Ati “Imana yampaye amahirwe yo kugenda mu bihugu byinshi no kwigira mu byo naciyemo byose […] ibyo byose nzabivomamo ibyamfasha gukora umurimo mpawe kandi ngisha inama ngo twubake itorero ryacu kandi tubere umugisha umuryango w’Abangilikani. Ngomba gutekereza kandi nkakora nk’uzahamara imyaka irenze iyo mfite”.

Umwepisikopi ucyuye igihe, Dr. Onesphore Rwaje, yasobanuye uburyo iryo torero ryavuye ahakomeye by’umwihariko nyuma yo kubura bamwe mu bashumba baryo muri Jenoside yakorewe Abatutsi, gusa ashimira Imana aho rigeze uyu munsi.

Dr. Rwaje umaze imyaka isaga 26 ari Musenyeri mu Itorero Angilikani, n’imyaka irindwi n’igice ku buyobozi bwa Angilikani y’u Rwanda, yavuze ko azaba hafi umuyobozi mushya.

Yagize ati “Imigisha igendana n’ibigeragezo kandi ibyo byombi ntabwo bibura mu buzima bw’umuntu no mu murimo wose. Ntabwo byari binyoroheye mu ntangiriro z’uyu murimo mu 1991 ariko iyo Imana itumye umuntu mu murimo wayo imuha ibyangombwa byuzuye kandi ikajyana na we […] Mbasezeranyije ko nzabasengera kuko umurimo wo kuyobora Itorero ku rwego rw’igihugu ntabwo woroshye.”

Nzungize David, Pasiteri mu Itorero Angilikani yavuze ko Mbanda bamusaba by’umwihariko kwita ku bibazo by’uburezi mu itorero.

Yagize ati “Turamwifuzaho gukemura ikibazo cy’uburezi. Mu by’ukuri amashuri makuru twari dufite make, twiteze ko agiye kongera nkuko yabishyize muri gahunda ze. Natwe kandi twiteguye kumufasha”.

Musenyeri Laurent Mbanda ni Umwepisikopi wa Kane utorewe kuyobora Itorero Angilikani mu Rwanda. Yavukiye mu Rwanda ku wa 25 Ukwakira 1954.

Yaje guhunga akiri muto ahungana n’ababyeyi be bajya mu Burundi ari ho yigiye amashuri abanza n’ayisumbuye. Yagarutse kuba mu Rwanda mu mwaka wa 2003 avuye muri Leta Zunze Ubumwe za Amerika. Arubatse afite umugore n’abana batatu.

EAR yageze mu Rwanda mu 1922. Iri torero rigizwe na Diyosezi 11, Paruwasi 406, Amakanisa 2331. Abapasiteri bari mu mirimo ni 460 hamwe n’abarimu 2331, mu gihe abakirisitu barenga miliyoni.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza