00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri w’Intebe Ngirente yasuye aho u Rwanda ruri kumurikira ibikorwa byarwo i Durban

Yanditswe na Iradukunda Serge
Kuya 16 Ugushyingo 2021 saa 03:32
Yasuwe :
0 0

Minisitiri w’Intebe w’u Rwanda, Dr Edouard Ngirente yasuye aho u Rwanda ruri kumurikirana ibikorwa byarwo mu imurikagurisha riri kubera mu Mujyi wa Durban muri Afurika y’Epfo.

U Rwanda ni kimwe mu bihugu byitabiriye Imurikagurisha Nyafurika ry’Ubucuruzi (Intra-African Trade Fair-IATF). Imurikagurisha Nyafurika ry’Ubucuruzi ryitabiriwe n’abasaga 10.000, riri kubera mu Mujyi wa Durban muri Afurika y’Epfo, ahateraniye abamurika 1.000 bo mu bice bitandukanye bya Afurika.

Dr Edouard Ngirente witabiriye umuhango wo gutangiza iri murikagurisha, kuri uyu wa Kabiri tariki 16 Ugushyingo 2021, yagize umwanya wo gusura aho u Rwanda ruri kumurikira ibikorwa byarwo.

Bimwe mu bikorwa yasuye biri kumurikwa n’Abanyarwanda harimo ibijyanye n’ubukerarugendo by’umwihariko gahunda ya Visit Rwanda, gahunda yo kugeza amaraso ku bitaro hifashishijwe indege zitagira abapilote n’ibindi.

Muri iki gikorwa yari ari kumwe kandi na Minisitiri w’Ubucuruzi n’Inganda, Habyarimana Beata ndetse n’abashoramari b’Abanyarwanda batandukanye barimo Sina Gerard.

Imurikagurisha Nyafurika ry’Ubucuruzi ryitabiriwe n’abasaga 10.000, riri kubera mu Mujyi wa Durban muri Afurika y’Epfo.

IATF iri kuba ku nshuro ya kabiri nyuma y’iya mbere yabereye mu Mujyi wa Cairo mu Misiri mu 2018.

Iri murikagurisha riba buri myaka ibiri rigamije guhuriza hamwe sosiyete, inganda, ibihugu n’abandi bacuruzi Nyafurika bagasangira amakuru ku bucuruzi, ishoramari no kunguka abakiliya bashya hagamijwe kongera ubuhahirane hagati y’abatuye Umugabane wa Afurika.

Minisitiri w'Intebe, Edouard Ngirente yerekwa bimwe mu byo u Rwanda ruri kumurika i Durban
Dr Edouard Ngirente yasuye ibice bitandukanye by'aho u Rwanda ruri kumurikira ibikorwa byarwo
Muri iki gikorwa yari aherekejwe na Minisitiri w'Ubucuruzi n'Inganda w'u Rwanda, Habyarimana Beata

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .