Minisitiri w’Intebe Dr Ngirente yasabye Abashinjacyaha bashya kwirinda icyenewabo na ruswa

Yanditswe na Habimana James
Kuya 2 Nyakanga 2019 saa 07:13
Yasuwe :
0 0

Minisitiri w’Intebe Dr Edouard Ngirente, yabwiye abashinjacyaha bashya barindwi ko bagomba kubaha inshingano igihugu cyabahaye, bakirinda ibyaha birimo ruswa n’icyenewabo mu kazi.

Kuri uyu wa Kabiri tariki 2 Nyakanga 2019, mu biro bya Minisitiri w’Intebe habereye umuhango wo kurahiza abashinjacyaha barindwi barimo babiri bo ku rwego rwisumbuye, babiri bo ku rwego rw’ibanze n’abandi batatu bagengwa n’amasezerano.

Aba bashinjacyaha bemejwe n’Inama y’Abaminisitiri yo ku wa 03 Mata 2019.

Nyuma yo kurahirira ko bazubahiriza inshingano bahawe no kwivugira ko nibatabyubahiriza bazabihanirwa n’amategeko, Minisitiri w’Intebe Dr Ngirente yabasabye kuzirikana inshingano ubuyobozi bukuru bw’igihugu bwabahaye.

Ati “Umurimo w’ubushinjacyaha ni umurimo ukomeye usaba ubwitange kandi ugasaba abantu gushyira mu gaciro kubera inshingano ziremereye zo kubahiriza uburenganzira bwa muntu. Ari nayo mpamvu musabwa kuzubahiriza mutabogama, ibikubiye mu ndahiro mwagiriye mu kanya imbere yacu twese hagamijwe gutanga ubutabera bunoze kuri bose nk’uko inshingano zanyu zibibasaba.”

“Hari indangagaciro z’ingenzi zigomba kuranga umushinjacyaha mwiza ari nawe twifuza, kandi bagenzi banyu musanze mu kazi bazabafasha kukinjiramo neza, nzi neza ko izo ndangagaciro mwese musanzwe muzizi ariko ndifuza kugira nke z’ingenzi mbibutsa nko gukora akazi kanyu kinyamwuga, guhora murangwa n’ubunyangamugayo, kwirinda ruswa n’ikimenyane n’ibindi bisa nabyo, kwirinda itonesha mu kazi n’icyenewabo umunsi ku wundi.’’

Yavuze ko amwe mu madosiye akwiye guhora yitabwaho arimo ajyanye n’umutekano w’igihugu, ibyaha bimunga ubukungu bw’Igihugu, ibyaha byambukiranya imipaka, ibyaha by’icuruzwa ry’abantu, ibirebana n’ubujura bw’ibikoresho by’abanyarwanda mu ngo zabo ndetse n’aho bakorera n’ibindi byaha bijyanye n’ubugizi bwa nabi cyane cyane iby’ikoranabuhanga.

Yavuze ko bazakenera ikoranabuhanga ryinshi no kurikoresha umunsi ku wundi nk’uko n’abanyabyaha baba bakurikirana bashobora kurikoresha, kugira ngo ibyaha bitabahama igihe bagomba kubakurikirana.

Umutanguha Marie-Josee warahiye nk’umushinjacyaha ku rwego rwisumbuye, yavuze ko mu nshingano yahawe azibanda ku kuba inyangayo.

Ati “Icyo ngiye gukora harimo gufatanya na bagenzi banjye nsanze mu kazi turusheho kubahiriza inshingano dufite, tuzakoresha kandi umutima nama mu byo tugiye gukora, tukaba inyangamugayo nk’uko indahiro twakoze ibivuga, tuzakorana kandi umwete n’umurava kugira ngo dufashe bagenzi bacu kugera ku nshingano z’ubushinjacyaha.”

Umutanguha yijeje ko bazakoresha ubunyangamugayo batanga ubutabera bunoze kuri buri muturarwanda wese.

Minisitiri w'Intebe yasabye abashinjacyaha bashya kuzirikana inshingano igihugu cyabahaye
Abarahiye basabwe kuzubahiriza inshingano no kwirinda ruswa
Umutanguha Marie-Josée warahiye nk’umushinjacyaha ku rwego rwisumbuye, yavuze ko azaharanira gushyira mu bikorwa inshingano yahawe
Minisitiri w'Intebe Dr Edouard Ngirente mu ifoto y'urwibutso n'abashinjacyaha barahiye, Umushinjacyaha Mukuru Jean Bosco Mutangana na Minisitiri w'Ubutabera, Johnston Busingye
Minisitiri w'Intebe Dr Edouard Ngirente mu ifoto y'urwibutso n'abashinjacyaha bashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza