Minisitiri w’Intebe Dr Ngirente yakiriye Umuyobozi wa UNFPA washimye umwanya w’umugore mu iterambere

Yanditswe na Ishimwe Israel
Kuya 29 Ugushyingo 2019 saa 07:11
Yasuwe :
0 0

Minisitiri w’Intebe Dr Edouard Ngirente yakiriye mu biro bye Umuyobozi Mukuru w’Ikigega cy’Umuryango w’Abibumbye cyita ku Baturage (UNFPA), Dr. Natalia Kanem, wanyuzwe n’uburyo u Rwanda rushyira imbaraga mu kwita ku mibereho y’abaturage.

Dr. Natalia Kanem wakiriwe kuri uyu wa 29 Ugushyingo 2019, ari mu Rwanda aho yitabiriye Inama zirimo n’iya ICASA yiga kuri SIDA n’Indwara zandurira mu Mibonano Mpuzabitsina muri Afurika.

Umuyobozi Mukuru wa UNFPA, Dr. Natalia Kanem, yavuze ko uyu muryango ufitanye umubano mwiza n’u Rwanda.

Yagize ati “Twaganiriye (Minisitiri w’Intebe Dr Ngirente) ku biri gukorwa n’u Rwanda bijyanye n’ishoramari rishyirwa mu rubyiruko, ubuzima bw’imyororokere bw’abagore n’abakobwa no kwita ku bakuze.’’

Dr. Kanem yakomeje avuga ko yishimiye guhura na Madamu Jeannette Kagame ndetse ko UNFPA na Loni mu Rwanda byabonye uburyo bwiza bwo kugera mu bice by’icyaro by’umwihariko.

Yakomeje avuga ko “Turashaka guharanira ko ntawe uzahezwa mu gihe cyo kuringaniza urubyaro. Imbuto Foundation yabaye umufatanyabikorwa wacu w’ingenzi.’’

Kuva mu 2017 Umuryango Imbuto ufatanyije na UNFPA, batangije gahunda y’ubukangurambaga bwo gukumira ko abana bakiri bato baterwa inda aho hahugurwa imiryango ngo iki kibazo gikumirwe.

Dr. Kanem yanashimye kuba u Rwanda rwarahawe kwakira ICASA, afata nk’uburyo bukomeye bwo guhangana na SIDA.

Ati “Ni amahirwe akomeye yo kongera guhura tureba ku kwirinda SIDA. Kwita cyane ku bafite virusi bakeneye imiti, urukundo n’ubufasha ngo babeho neza.’’

Uyu Munya-Panama umaze imyaka isaga ibiri ayoboye UNFPA yihaye intego yo kurangiza ikibazo cy’impfu z’abana, inda zitateguwe binyuze mu kuboneza urubyaro no guhangana n’ihohoterwa rishingiye ku gitsina ririmo no gushyingira abana bitarenze 2030.

ICASA izahuriza hamwe abasaga ibihumbi 10 izabera mu Mujyi wa Kigali ku wa 2-7 Ukuboza 2019.

Umunyamabanga wa Leta muri Minisiteri y’Imari n’Igenamigambi ushinzwe Igenamigambi, Dr Claudine Uwera, yavuze ko Umuyobozi wa UNFPA yashimye imbaraga zishyirwa mu rubyiruko no kuboneza urubyaro.

Yagize ati “Yashimye ubuyobozi bw’u Rwanda umwanya bwahaye umwana w’umukobwa mu iterambere ry’igihugu. Batubwiye ko iyo umugore agize uruhare mu iterambere, ubukungu bw’igihugu buriyongera.’’

Inyigo y’Ikigo cy’Abanyamerika cya McKinsey & Company igaragaza ko abagore bahawe amahirwe yose, byakongera tiliyari $28 ku bukungu bw’Isi mu 2025, ni inyongera ya 26% y’Umusaruro mbumbe wa buri mwaka.

Dr Uwera yavuze ko u Rwanda na UNFPA bikorana neza mu kwita ku baturage no gushyira imbere gahunda zibagenewe.

Ati “Bashimishijwe no gukomeza gukorana n’u Rwanda. Urwego igihugu kigezeho rutanga amahirwe yo gukomeza gufatanya na UNFPA mu iterambere rirambye.’’

U Rwanda rwashyizeho ingamba ziteza imbere umugore mu burezi, ubukungu, imiyoborere n’ibindi dore ko igitsina-gore ari 52% by’abasaga miliyoni 12 barutuye.

Rufite umubare munini w’abagore mu Nteko Ishinga Amategeko, bangana na 61.25%; abagize Guverinoma ni 50% na 40% bari mu nama njyanama z’inzego z’ibanze.

Kuri ubu abagore bafite imirimo mu nzego zirimo urw’ubuzima (53.9%), ubuhinzi (54.6%) mu gihe abagera kuri (53.2%) bari mu mashuri yisumbuye na 52.7% muri kaminuza.

Minisitiri w’Intebe Dr Edouard Ngirente yakiriye mu biro bye Umuyobozi Mukuru w'Ikigega cy'Umuryango w'Abibumbye cyita ku Baturage (UNFPA), Dr. Natalia Kanem

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza