Minisitiri w’Intebe Dr Ngirente yagaragaje ibyo Abanyarwanda bakwiye kwishimira ku munsi w’Umuganura (Amafoto na Video)

Yanditswe na Habimana James
Kuya 2 Kanama 2019 saa 01:19
Yasuwe :
0 0

Minisitiri w’Intebe, Dr Ngirente Edouard, yavuze ko mu gihe hizihizwa Umuganura, ari umunsi ukomeye ku Banyarwanda ngo bishimire ibyiza bagezeho, ariko banafate ingamba zo kunoza ibitaragenze neza.

Kuri uyu wa Gatanu, Minisitiri w’Intebe, Dr Ngirente yifatanyije n’Abanyarwanda mu kwizihiza Umunsi mukuru w’Umuganura, wabereye kuri Stade y’Akarere ka Nyanza mu Ntara y’Amajyepfo.

Yavuze ko Umuganura ari umunsi ngarukamwaka ukomeye mu mateka y’u Rwanda, bikagaragarira mu kwishimira umusaruro w’ibyagezweho uvuye mu maboko y’abana b’Abanyarwanda, bikajyana no kwiyemeza kubishimangira no kubyubakiraho ibindi byinshi.

Ati “Mu kwizihiza Umuganura, turasabana, tugasangira ibyo twejeje ariko kandi tukanafata ingamba zo gukomeza gukora neza, kugira ngo tugere ku majyambere arambye duharanira kwishakamo ibisubizo no kwigira.”

Minisitiri w’Intebe Dr Ngirente yagaragaje bimwe mu byo Abanyarwanda bishimira ko bagezeho, harimo ko igihugu kigeze ku kigero gishimishije cyo gutuburira imbuto imbere mu gihugu, mu rwego rwo kuzigeza ku bahinzi ku bwinshi kandi zihendutse.

Yakomeje ati “Hakomeje gutunganywa amaterasi y’indinganire n’imirwanyasuri mu rwego rwo gufata ubutaka neza. Mu rwego rwo guteza imbere ibikorerwa mu Rwanda, ubu hirya no hino mu Gihugu hari kubakwa ibyanya byahariwe inganda.”

“Mu rwego rw’ibikorwaremezo, hakomejwe gahunda yo gukwirakwiza amashanyarazi mu ngo, aho kugeza ubu ingo nyinshi z’Abanyarwanda zimaze kugerwaho n’amashanyarazi. Mu rwego rwo gufasha abaturage kugeza umusaruro ku masoko, koroshya ubuhahirane n’amahanga, kunoza imiturire no kwihutisha iterambere, hakomejwe kubaka no gusana imihanda yo ku rwego rw’igihugu, imihanda y’uturere n’imijyi n’iy’imigenderano.”

Yagaragaje ko Umuganura wo mu 2019 ari umwanya wo kwishima ariko kandi ni n’umwanya wo gusubiza amaso inyuma no kwisuzuma, hagafatwa ingamba zo kunoza ibitaragenze neza kugira ngo tuzarusheho gutera imbere ejo hazaza.

Yakomeje abwira abitabiriye iki gikorwa ati “Nifuza kubashishikariza kwita ku murimo unoze no kuwukorana umwete. Ndagira ngo ngaruke cyane cyane ku rubyiruko rwo mizero y’igihugu, ko rukwiye kwitabira umurimo ubabyarira inyungu kuko bizabafasha kwiteza imbere.”

“Mukwiye kubyaza umusaruro amahirwe Leta yabahaye harimo gahunda y’imyuga n’ubumenyingiro, kubona igishoro mu rwego rwo guteza imbere imishinga binyuze mu nguzanyo z’ikigega cya BDF, n’ubundi bufasha butandukanye.”

Dr Ngirente yasoje ijambo rye ashimira abateguye ibi birori n’abamuritse ibyo bakora byabahesheje umusaruro ukomeye, urimo ibisubizo by’ibibazo byinshi.

Minisitiri wa Siporo n’Umuco, Nyirasafari Espérance, yavuze ko Kwizihiza Umuganura muri iki gihe byarenze imbibi zo kwita ku musaruro w’ubuhinzi n’ubworozi gusa, bigera no ku kwishimira umusaruro wo mu zindi nzego zose zireba ubuzima n’iterambere by’Abanyarwanda.

Yagize ati "Buri muryango uzarebera hamwe indangagaciro ziwuranga, wishimire ibyo wagezeho kandi ukore n’imihigo y’umwaka utaha. Kwizihiza Umuganura mu muryango, turizera tudashidikanya ko bizafasha abawugize kurushaho kunga ubumwe, bisuzume maze bafate ingamba zo kunoza aho bikenewe.’’

Yavuze ko Umuganura uzabera kandi Abanyarwanda baba mu mahanga umwanya mwiza wo gusabana, gushyikirana no kwimakaza umuco Nyarwanda ari wo murunga ugomba kubaranga no kubahuza.

Umuganura wa 2019 wizihijwe mu nsanganyamatsiko ivuga ko “Umuganura, isôoko y’ubumwe n’ishingiro ryo kwigira”. Biteganyijwe ko uzanizihirizwa mu mashuri yose yo mu Rwanda mu rwego rwo gutoza abana Umuco Nyarwanda bakiri bato.

Amafoto: Muhizi Serge

Video: Hakizimana Alain


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza