Minisitiri Mutimura yijeje ko ibizamini bishingiye ku nteganyanyigisho nshya bizakorwa umwaka utaha

Yanditswe na Ndayishimye Jean Claude
Kuya 13 Mata 2018 saa 10:37
Yasuwe :
0 0

Minisitiri w’Uburezi, Dr Mutimura Eugène, yatangaje ko mu mwaka utaha wa 2019 ari bwo ibizamini bya leta bishingiye ku nteganyanyigisho ishingiye ku bushobozi bizatangira gukorwa.

Ibi bije nyuma y’aho Umunyamabanga wa Leta muri Minisiteri y’Uburezi ushinzwe Amashuri Abanza n’Ayisumbuye, Isaac Munyakazi, amenyesheje Inama y’Abaminisitiri ko ibizamini bya Leta bisoza icyiciro rusange n’iby’Amashuri yisumbuye bizabazwa ku masomo asanzwe nk’uko byakozwe umwaka ushize.

Yavuze ko amasomo y’inyongera yagombaga kubazwa mu kizamini cya Leta hakurikijwe Integanyanyigisho nshya ishingiye ku bushobozi (Competence Based Curriculum) ari yo, Ikoranabuhanga (ICT), Literature in English (Ubuvanganzo mu rurimi rw’Icyongereza, Igifaransa (French) n’Igiswahili (Swahili) mu cyiciro rusange; Imibare (Sub-mathematics) n’Igifaransa (French) mu cyiciro cya kabiri cy’amashuri yisumbuye atazabazwa mu kizamini cya Leta muri uyu mwaka wa 2018 kubera imbogamizi zagaragaye mu ishyirwa mu bikorwa ry’iyi nteganyanyigisho.

Minisitiri Mutimura yavuze ko impamvu yatumye ibi bizamini bidakorwa muri uyu mwaka ari ibitabo bijyanye n’iyo nteganyanyigisho bitagereye ku mashuri ku gihe.

Yagize ati “Turakora uko bishoboka kose kugira ngo umwaka utaha (2019), ibizamini bizakorwe nk’uko biteganyijwe bishingiye kuri iyo nteganyanyigisho ishingiye ku bushobozi; umwaka utaha ndahamya ko tuzaba twabigezeho.”

Yakomeje agira ati “Ayo masomo arigishwa ariko ntiyigishwa ku buryo twifuza, nk’uko nabibagaragarije hari ibitabo byinshi by’integanyanyigisho ishingiye ku bushobozi bigomba kuba byarageze ku mashuri. Ibitabo bikagurwa hanze y’igihugu ntibyandikwe n’abaturarwanda hakagenda amafaranga menshi kandi noneho ntibigere no ku banyeshuri, inyigisho ntizinoge nkuko twifuza, turahamya ko umwaka utaha tuzaba twabigezeho. Ni na yo mpamvu dufata ibyemezo bikomeye, ababifitemo intege nkeya, abadindiza izo porogaramu nk’uko leta yabyiyemeje bazajya babibazwa.”

Ibura ry’ibi bitabo ni imwe mu mpamvu zatumye Guverinoma ihagarika abayobozi batanu b’Ikigo cy’Igihugu cy’Uburezi (REB) ku wa Gatatu.

Imvo n’imvano y’ikibazo

Mu byumweru bibiri bishize, Umuyobozi Mukuru wa REB, Dr. Irenée Ndayambaje, yabwiye IGIHE ko amasoko y’ibitabo atagiye yihuta ku buryo byari biteganyijwe, hari abagiye batsindira amasoko ariko bagatinza itangwa ry’ibitabo, hari n’abantu bazanye ibitabo bakabiheza mu nzira cyangwa mu bubiko bwabo bakabeshya ko babitanze nyuma baza gufatwa.

Hari n’ibitabo kandi byari byarabuze ababipiganira ngo kuko abashoramari bagiye birebera aho isoko rinini riri, bakirebera mu mashuri abanza kuko ari ho hari abanyeshuri benshi.

Yagize ati “Bakavuga bati mu mashuri abanza hari abana benshi reka tube ari ho dupiganira isoko. Bakareka nk’ubuvanganzo n’andi masomo yigwa n’abantu bake. Ubu rero twinjiye mu buryo bwo kwicapira ibitabo duhereye kuri bya bindi bitari byakabona ababikora, ni ibitabo 46 buri kimwe kikagira icya mwarimu n’icy’umunyeshuri.”

Icyo gihe Dr. Ndayambaje yavugaga ko bafatanyije n’abarimu ba kaminuza n’abandi barezi b’intyoza mu mashuri yo mu Rwanda bari bamaze kwandika iby’Igihembwe cya Kabiri ku buryo kizatangira abarimu bamaze kubaha ibyo bazifashisha.

Yanavugaga ko bazakora ku buryo n’Igihembwe cya Gatatu kizajya gutangira bamaze guha abarimu ibyo bazifashisha.

Iyi nteganyanyigisho nshya yatangiye gukoreshwa mu Rwanda mu mwaka wa 2016, REB ikaba ivuga ko izafasha Abanyarwanda guhangana no kugaragaza ubushobozi bwabo ku isoko ry’umurimo, gusa kuva yatangira abarimu batandukanye bakunze kwijujutira ibura ry’ibitabo bijyana na yo.

Minisitiri w'Uburezi, Dr Mutimura Eugène, yaburiye abacunga nabi ibikoresho by’ikoranabuhanga mu mashuri ko bashobora guhagarikwa mu kazi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza