Minisitiri Mutimura yavuze ko abana batojwe gusoma bakiri bato ari bo bakora akazi neza

Yanditswe na Mukwaya Olivier
Kuya 4 Ukwakira 2019 saa 05:04
Yasuwe :
0 0

Minisitiri w’Uburezi mu Rwanda, Dr Eugene Mutimura, yasabye ko abana batozwa gusoma bakiri bato kuko iyo bikozwe bavamo abantu b’ingirakamaro bakaba ari na bo bakora akazi neza iyo bakuze.

Yabisabiye mu Karere ka Rutsiro ubwo hatangizwaga gahunda y’igitabo ku munyeshuri izafasha abanyeshuri biga mu mashuri abanza kwimenyereza gusoma kuva mu mwaka wa mbere kugera mu mwaka wa gatatu.

Minisitiri w’Uburezi Dr Mutimura hamwe n’Ambasaderi wa Leta Zunze Ubumwe za Amerika mu Rwanda, Peter Vrooman, nibo batangije iyi gahunda.

Iyi gahunda ya Soma Umenye igamije ko buri mwana wese w’umunyarwanda kuva mu mwaka wa mbere kugeza mu mwaka wa gatatu agira igitabo cye, bigakuraho ko abana bagisangira ari benshi.

Umuyobozi w’ikigo cy’igihugu gishinzwe uburezi mu Rwanda, Dr Ndayambaje Irénée, avuga ko Soma Umenye irimo kwibanda ku banyeshuri bo mu mashuri atatu abanza, bikaba byifuzwa ko yakomeza no mu myaka ikurikira.

Ati “Turifuza ko twakomezanya urugendo kugira ngo abana bazarangize amashuri abanza bazi neza Ikinyarwanda’’.

Minisitiri w’Uburezi, Dr Eugene Mutimura, avuga ko byagaragaye ko abana batojwe gusoma bakiri bato ari bo batsinda neza ndetse akaba ari nabo bakora akazi neza, asaba ababyeyi gushishikariza abana babo gusoma.

Ati “Iyo abana bize gusoma bakiri bato byaragaragaye ko 80% ubwonko bwabo bukura neza kugeza bageze mu mwaka wa gatatu w’amashuri abanza nibo bakora neza mu kazi, mu mashuri nibo batsinda neza no mu kazi. Turashishikariza ababyeyi gutoza abana gusoma naho abarimu bakigisha abana gufata neza ibitabo”.

Ambasaderi w’Amerika mu Rwanda, Peter Vrooman, uzwiho gukoresha Ikinyarwanda, avuga ko nubwo ari umunyamerika ari umunyeshuri w’ikinyarwanda, akavuga ko abana bagomba gusoma kugira ngo bashobore kumenya.

Ati “Ibikorwa byo gutanga ibitabo miliyoni n’igice byakozwe n’abanyamerika bizakoreshwa kuva mu mwaka wa mbere kugera mu wa gatatu mu mashuri abanza bizafasha abana gukunda gusoma kuko buri mwana azagira igitabo cye’’.

Abana ibihumbi 45 171 nibo biga mu mwaka wa mbere kugera mu wa gatatu mu Karere ka Rutsiro, hakaba haratanzwe ibitabo by’ikinyarwanda bigera kuri ku bihumbi 43 395, naho mu Ntara y’Uburengerazuba hatanzwe ibitabo 274 116 mu mashuri ya leta n’ayakorana na leta, mu gihe mu gihugu hose hatanzwe ibitabo miliyoni n’igice.

Minisitiri Mutimura yumva uko abana basoma
Hatanzwe ibitabo miliyoni n'igice
Umuyobozi Mukuru wa REB Rwanda Dr. Ndayambaje (hagati) yasabye abanyeshuri gufata neza ibyo bitabo no kubibyaza umusaruro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza