Kwamamaza

Minisitiri Mushikiwabo yagiranye ibiganiro na Stéphane Dion mu nama ikomeye muri Canada

Yanditswe kuya 17-09-2016 saa 13:24' na Rabbi Malo Umucunguzi


Minisitiri w’Ububanyi n’amahanga w’u Rwanda, Louise Mushikiwabo yagiranye ibiganiro na mugenzi we wa Canada, Stéphane Dion, aho bombi bitabiriye inama ya Gatanu yateguwe n’Umuryango Global Fund ku kurwanya Sida, Igituntu na Malaria, i Montréal.

Minisitiri Mushikiwabo ari muri Canada aho yanitabiriye Ihuriro ry’Abanyarwandakazi baba mu mahanga ryakoraniye muri uwo Mujyi wa Montréal muri Canada, Rwandan Women Convention 2016.

Yaganiriye na Minisitiri w’Ububanyi n’Amahanga wa Canada ku bufatanye bw’ibihugu byombi mu by’iterambere ry’abagore, amahoro n’umutekano,ubuzima n’imihindagurikire y’ibihe.

Inama Global Fund igamije gukusanya inkunga yo gukoreshwa mu rugamba rwo kurwanya Sida, Igituntu na Malaria ku Isi, yitabiriwe na Minisitiri w’Intebe wa Canada, Justin Trudeau, umuherwe wa Mbere ku Isi, Bill Gates n’umugore we Melinda n’Umuhanzi ukomeye mu itsinda ririmba injyana ya Rock, U2, uzwi nka Paul David Hewson cyangwa ‘Bono’.

Muri iyi nama yatangijwe i Montreal kuri uyu wa Gatanu byitezwe ko hakusanywa miliyari $13 azanyuzwa muri Global Fund mu kurwanya izo ndwara eshatu.

Minisitiri w’Intebe Trudeau yavuze ko Sida, Igituntu na Malaria zica abantu 8 000 buri munsi ku Isi yose, ariko zicyigiza nkana iyo zigeze ku bakobwa n’abagore bo mu bihugu bikiri mu nzira y’amajyambere.

Ati “Iyi nama yo gukusanya inkunga ni igikorwa cy’ingenzi ku batuye Isi uyu munsi. Kandi uburemere bw’iki kibazo burasaba imbaraga zishyize hamwe. Ibihe byapfiriye aho buri gihugu cyari nyamwigendaho. Global Fund ni urugero rwiza rw’ibishobora kugerwaho mu gihe twaba dushyize hamwe duhuje intego ikomeye.’’

Trudeau kandi yavuze ko ibihugu bigomba gukora ibishoboka mu kurwanya ubukene n’impamvu zose zikomeza gutuma abagore n’abakobwa badatanga umusanzu mu iterambere ry’ibihugu.

Iyi nama kandi uretse Bono na Bill Gates, iritabirwa n’Umunyamabanga Mukuru w’Umuryango w’Abibumbye, Ban Ki Moon.

Minisitiri w’Intebe Trudeau yanatangaje ko Canada yemeye gutanga miliyoni $785 muri Global Fund mu kurwanya Sida, Igituntu na Malaria hagati ya 2017 na 2019, aya mafaranga akaba yiyongereyeho 20% ugereranyije n’ayo yatanze ubushize.

Global Fund yatangije urugamba rwo kurwanya izi ndwara eshatu mu 2002 ifite intego yo gushishikariza guverinoma z’ibihugu, imiryango itari iya leta, guhuza amaboko mu kuzihashya.

Biteganyijwe ko izi miliyari $13 ziri gukusanywa zizatabara ubuzima bw’abagera kuri miliyoni umunani ku Isi, akanarinda abandi miliyoni 300 guhura n’ubwandu bushya bw’izo ndwara kugeza mu 2019.

Qatar na yo yemeye gushyira miliyoni $10 muri kki kigega cyishyurwamo hejuru ya 75% by’imiti ikoreshwa mu kuvura Sida, Igituntu na Malaria, ndetse hakabarurwa ko uyu mushinga wa Global Fund umaze kurokora ubuzima bw’abagera kuri miliyoni 20.

Uyu muryango wizera kuba wahashyije izo ndwara bitarenze mu 2030, ariko ngo nubwo haribyinshi bikiri gukorwa, inzira iracyari ndende.

Izi ndwara kandi ziri no mu zihitana kenshi mu Rwanda, kuko nko mu myaka 10 ikurikirana, Abanyarwanda banduye virusi itera Sida ari 3% byabo, ni ukuvuga abagera ku bihumbi 210 bafite iyo virusi na ho abagera ku 5000 ikabica buri mwaka.

Minisitiri w'Ububanyi n'Amahanga w'u Rwanda, Louise Mushikiwabo na mugenzi we wa Canada, Stéphane Dion

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 11 Ukuboza 2016
Copyright © 2009 -2014 - IGIHE Ltd - All Rights Reserved