Kwamamaza

Mushikiwabo mu bayobozi bakoraniye i Yeruzalemu basezera bwa nyuma Shimon Peres

Yanditswe kuya 30-09-2016 saa 08:35' na Rabbi Malo Umucunguzi


Minisitiri w’Ububanyi n’Amahanga w’u Rwanda, Louise Mushikiwabo, yahagarariye Perezida Kagame muri Israel, aho abayobozi batandukanye bakomeye ku Isi bari gusezeraho bwa nyuma Shimon Peres, witabye Imana kuwa Gatatu w’iki cyumweru.

Peres arashyingurwa nk’intwari y’igihugu kuri uyu wa Gatanu, umutekano ukaba wakajijwe mu Murwa Mukuru wa Yeruzalemu hirindwa ko haba igikorwa kiwuhungabanya.

Mu bashyitsi bakoranira muri Israel harimo Perezida wa Palestine Mahmoud Abbas, uraba asuye iki gihugu ku nshuro ya mbere kuva mu 2010, ndetse ikinyamakuru Haaretz kikaba cyatangaje ko Abbas ubwe ariwe wabisabye.

Nk’umuntu wari mu biganiro ku ruhande rw’ishyaka ryaharaniye ubwigenge bwa Palestine, Palestine Liberation Organisation (PLO), Mahmoud Abbas ni umwe mu bashyize umukono ku masezerano ya Oslo mu 1993, yahesheje Peres igihembo cy’amahoro cyitiriwe Nobel hamwe na Perezida wa Palestine, Yasser Arafat na Yitzhak Rabin wari Minisitiri w’Intebe wa Israel, mu 1994.

Umwe mu bayobozi bakomeye muri Palestine yabwiye Associated Press ko Perezida Abbas yashatse “gutanga ubutumwa bukomeye ko Abanyapalestine ari abanyamahoro, no gushima ubwitange bw’abantu baharanira amahoro nka Shimon Peres".

Perezida Barack Obama aravuga ijambo muri uyu muhango , hamwe n’abana batatu ba Shimon Peres, Minisitiri w’Intebe na Perezida ba Israel.

Peres yasize atanze uburyo azashyingurwamo, umurambo we ukaba uri kuruhukira imbere y’Inteko Ishinga Amategeko i Yeruzalemu.

Abapolisi 8000 bashyizwe mu mihanda ngo bacunge umutekano, ndetse ibihumbi by’abaturage baraba bakoranye basezera ku muyobozi ufatwa nk’umubyeyi wa Israel.

Minisitiri w’Ububanyi n’Amahanga w’u Bwongereza, Boris Johnson, Igikomangoma Charles hadasigaye Tony Blair wigeze kuba Minisitiri w’Intebe w’iki gihugu, bose barahurira i Yeruzalemu.

Gushyingura Peres nicyo gikorwa kiraba kiri kuri uru rwego, kuva hashyingurwa Minisitiri w’Intebe w’iki gihugu Yitzhak Rabin, wishwe mu 1995.

Mu bandi bayobozi bakomeye ku Isi bitabira iki gikorwa barimo:

- Minisitiri w’Intebe wa Australia, Malcolm Turnbull

- Minisitiri w’Intebe wa Canada, Justin Trudeau

- Perezida we Chypres, Nicos Anastasiades

- Minisitiri w’ububanyi n’amahanga wa Denmark, Kristian Jensen

- Minisitiri w’Intebe wa Estonia, Taavi Roivas

- Perezida w’Umuryango w’ubumwe bw’u Burayi, Donald Tusk

- Minisitiri w’Intebe wa Finland, Juha Sipila

- Perezida w’u Bufaransa, Francois Holland

- Perezida w’u Budage, Joachim Gauck

- Minisitiri w’Intebe w’u Butaliyani, Matteo Renzi,

- Minisitiri w’Ingabo w’u Buyapani, Gen Nakatani

- Perezida wa Latvia, Raimonds Vejonis

- Perezida wa Lithuania, Dalia Grybauskaite

- Perezida wa Mexique, Enrique Pena Nieto

- Umunyamabanga Mukuru wa OTAN, Jens Stoltenberg

- Minisitiri w’Intebe w’u Buholandi, Mark Rutte

- Minisitiri w’ububanyi n’amahanga wa Norvege, Borge Brende

- Perezida wa Pologne, Andrzej Duda

- Perezida wa Romania, Klaus Iohannis

- Perezida wa Sena y’u Burusiya, Valentina Matviyenko,

- Umwami Felipe VI wa Espagne

- Minisitiri w’Intebe wa Suede, Stefan Lofven

- Umunyamabanga Mukuru w’Umuryango w’Abibumbye, Ban Ki-moon

Shimon Peres yafashwe n’indwara yo kuva amaraso mu bwonko mu byumweru bibiri bishize, yitaba Imana kuwa Gatatu w’iki cyumweru ku afite imyaka 93. Yaguye mu bitaro biri mu Mujyi wa Tel Aviv.

Peres yavutse mu 1923 muri Wisniew muri Pologne, ubu hitwa Vishnyeva ndetse haherereye muri Belarus. Yimukiye muri Palestine mu 1932, ari naho hatangirira inkuru ye mu mateka ya Israel.

Yatorewe bwa mbere kwinjira mu Nteko Ishinga Amategeko ya Israel, Knesset, mu 1959; ayobora muri guverinoma 12, harimo imwe yayoboye nka Perezida n’izindi ebyiri nka Minisitiri w’Intebe.

Bill Clinton wahoze ayobora Leta Zunze Ubumwe za Amerika asezera kuri Peres
Perezida wa Israel, Reuven Rivlin asezera kuri Peres
Yari umuntu ufatwa nk'intwari ya Israel
Abantu benshi bitabiriye gusezera Peres
Umutekano wakajijwe cyane muri uyu muhango
Benjamin Netanyahu ashyira indabo ku isanduku ya Peres
Minisitiri w'Intebe wa Israel,Benjamin Netanyahu yasezeye bwa nyuma Shimon Peres
Minisitiri w'Ububanyi n'Amahanga w'u Rwanda, Louise Mushikiwabo ubwo yari kumwe na Shimon Peres mu myaka yashize

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved