Minisitiri Mukeshimana yahamagariye abikorera gushora imari mu buhinzi n’ubworozi

Yanditswe na Iradukunda Serge
Kuya 20 Kamena 2019 saa 02:03
Yasuwe :
0 0

Minisitiri w’Ubuhinzi n’Ubworozi, Dr Mukeshimana Geraldine, yavuze ko guteza imbere ubuhinzi n’ubworozi buhangana n’isoko mpuzamahanga, bisaba ko abikorera bashora imari muri ibi bikorwa hagamijwe kongera umusaruro wabyo mu bwiza no mu bwinshi.

Ku nshuro ya 14, Minisiteri y’Ubuhinzi n’Ubworozi (Minagri), guhera kuri uyu wa Gatatu kugeza kuwa 26 Kamena, yahurije hamwe abahinzi n’aborozi n’abandi bafite aho bahuriye nabyo mu imurikabikorwa riri kubera ku Mulindi mu Karere ka Kicukiro.

Iri murika rifite insanganyamatsiko igira iti “Duteze Imbere Ubuhinzi n’Ubworozi Buhangana n’Isoko Mpuzamahanga”.

Ryitabiriwe n’abahinzi n’abarozi, abatanga serivisi z’inyongera musaruro, abatanga serivisi zijyanye n’ibikoresho byo kuhira imyaka, abakusanya n’abacuruza umusaruro uturuka ku buhinzi n’ubworozi, abakora ubushakashatsi ku’iyamamaza buhinzi n’ubworozi ndetse n’ibigo by’imari n’ubwishingizi.

Nyuma yo gusura ibikorwa ibikorwa by’Ubuhinzi n’Ubworozi binyuranye biri muri iri murikagurisha, Minisitiri Mukeshimana, yavuze ko bigaragaza ibyagezweho muri gahunda yo kuvugurura ubuhinzi n’ubworozi bishingiye ku ntego Guverinoma y’ u Rwanda yihaye yo kongera umusaruro w’Ubuhinzi n’Ubworozi mu bwinshi no mu bwiza.

Yavuze ko “Hakenewe kandi ko, hiyongera ishoramari mu bikorwa by’ububinzi n’ubworozi cyane cyane iry’abikorera”.

Yakomeje avuga ko ‘Ikoreshwa ry’ikoranabuhanga (ICT) ni ingenzi mu iterambere ry’ubuhinzi n’ubworozi. Muri iri murikabikorwa, harimo ibikorwa bitandukanye bigaragaza ikoranabuhanga mu buhinzi n’ubworozi’.

Minisitiri Mukeshimana yavuze ko hari byinshi bimaze gukorwa, aho ku bufatanye n’Ibigo by’Imari, hagiyeho uburyo bw’ikoranabuhanga (Smart Nkunganire) mu itangwa ry’inyongeramusaruro muri gahunda ya nkunganire ndetse n’uburyo bwiswe ikofi buzafasha koroshya gukorana n’ibigo by’imari.

Leta y’u Rwanda ifatanyije n’abafatanyabikorwa batandukanye, yashyize imbere gahunda yo guhuza abahinzi n’isoko, hashorwa imari mu bikorwa remezo, gushishikariza abahinzi n’aborozi gukorana n’ibigo by’imari ndetse no kongera ibikowa by’ubwishingizi mu rwego rw’ubuhinzi n’ubworozi.

Habiyaremye Wellars, Umuyobozi wa koperative KOTIBANYA, ihinga ikanacuruza imboga avuga ko iri murikabikorwa ari umwanya wo kwerekana aho bageze ariko bakanaryigiramo byinshi.

Ati “Kwitabira iri murikabikorwa ni ukugira ngo twerekane ibyo dufite, ibyo tumaze kugeraho ariko kandi tunagire n’ibindi twigira ku bandi bahinzi baturutse hirya no hino nk’imbuto igezweho cyane cyane ko turi kubona ibigo bikora imirama hano ari byinshi”.

Muri iri murikabikorwa, Banki ya Kigali, iramurika serivisi nshya y’imari yise IKOFI, yitezweho gufasha abahinzi bagorwaga no kubona serivisi z’imari, ikazajya ibafasha kwizigama, kohereza amafaranga no kuyabikuza ku buntu, kwishyura serivisi nk’ubwiteganyirize bw’igihe kirekire, inyongeramusaruro n’ibindi.

Umukozi wa Banki ya Kigali, Mutangana Felix, yavuze ko nk’ikigo cy’imari bazi neza ko ubuhinzi ari bwo bukungu bw’u Rwanda, ari nayo mpamvu bazanye gahunda bise IKOFI.

Ati “Ikofi serivisi twashyiriyeho abahinzi, kugira ngo ifashe abahinzi ibateza imbere mu buryo bwo kuba bagura imbuto n’inyongera musaruro igihe bagiye gutangira ibikorwa byabo by’ubuhinzi, ni uburyo bwo kubafasha kwiteganyiriza, kwizigamira, igihembwe cy’ihinga cyajya gutangira bakaba bafite igishoro gihagije”.

Iyi serivisi y’imari ikoreshwa kuri telefoni, umuhinzi akiyandikisha akoresheje *334*2# na nimero y’indangamuntu, akegera umucuruzi w’inyongeramusaruro ugomba kubyemeza.

Minisitiri Mukeshimana, Parfait Busabizwa na Minisitiri Shyaka basobanurirwa byinshi ku mata ya Mukamira
Ubworozi bugezweho bw'ingurube nabwo bwamuritswe
Ubworozi bw'amafi mu byitabiriye iri murikabikorwa
Umutahira ari kuvuga amazina y'inka
Inyambo zamurikiwe abari bitabiriye iri murikabikorwa
Ihema ririmo kumurikirwamo na BK ifite serivisi nshya ya IKOFI
Abakozi ba Banki ya Kigali barimo gusobanura IKOFI
Itorero Inganzo Ngari risusurutsa abitabiriye imurikabikorwa ry'ubuhinzi n'ubworozi
Minisitiri Mukeshimana yasabye abikorera kwitabira gushora imari mu buhinzi n'ubworozi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza