Minisitiri Mukeshimana yagaragaje ko kawa ari igihingwa gifatiye runini ubukungu bw’u Rwanda

Yanditswe na Habimana James
Kuya 19 Kamena 2019 saa 04:04
Yasuwe :
0 0

Minisitiri w’Ubuhinzi n’Ubworozi, Dr Mukeshimana Geraldine yavuze ko ubuhinzi bwa kawa bufitiye umumaro ukomeye u Rwanda kuko rutanga umusanzu ku bukungu bw’igihugu no gutanga akazi kuri benshi.

Dr Mukeshimana yabigarutseho kuri uyu wa Kabiri ubwo yafunguraga ku mugaragaro inama mpuzamahanga yiswe ‘Let’s Talk Coffee Rwanda’ irimo kuba guhera tariki 17 kugeza tariki ya 19 Kamena 2019 muri Kigali Serena Hotel.

Let’s Talk Coffee Rwanda ni inama yahuje inzobere mu buhinzi bw’ikawa, abahinzi, abaguzi, inzego za leta ndetse n’abandi bafite aho bahuriye n’uruhererekane nyongeragaciro rw’ikawa.

Babifashijwemo n’Umuryango Bloomberg Philanthropies na Sustainable Harvest Coffee Importers, iyi nama yahuje abaguzi n’abahinzi kugira ngo harebwe uko bagera ku masoko mpuzamahanga.

Irimo kandi abantu baturutse mu makoperative atandukanye y’ikawa bahuguwe n’umuryango Sustainable Growers Rwanda, bakaba bahagarariye abagore barenga 32,000 bo mu Rwanda no muri Repubulika Iharanira Demokarasi ya Congo basanzwe bahinga ikawa.

Dr Mukeshimana yashimye uruhare rukomeye rukorwa n’umuryango Sustainable Growers Rwanda mu guhugura abahinzi ba kawa, kuko kuva batangira aka kazi muri 2014 hari umusanzu ukomeye batanze.

Yavuze ko ubuhinzi bwa kawa bukorwa n’ingo zigera 355,771. Ibiti bya kawa bigera kuri 89,726,809 nibyo bitewe mu Rwanda bikaba bihinze ku ubuso bungana na hegitari 35,891.

Dr Mukeshimana yavuze ko u Rwanda rufite ikirere cyiza, imitere myiza, ubutaka bwo mu misozi bwiza n’izuba ryiza ndetse n’ahantu hatuma ikawa iba nziza ikaba yujuje ubuziranenge.

Yagize ati “Kugira ngo umusaruro wa kawa ukomeze kwiyongera mu bwiza no mu bwinshi hari ibigomba kwitabwaho nko gukomeza kuyifata neza mu murima ndetse kongera ubwiza bwayo. Guverinoma kandi yashyizeho gahunda nziza zigamije gushyigikira urwego rwa kawa nko gukorana n’amakoperative hongerwa amahugurwa ku banyamuryango bayo, gufasha abahinzi n’amakoperative kongera ubwiza bwa kawa n’ibindi.”

Dr Mukeshimana yashishakarije urubyiruko gushakira amahirwe y’akazi muri kawa cyane cyane mu kuyongerera agaciro no gushaka amasoko yayo.

Umuyobobozi Mukuru wa Sustainable Growers mu Karere, Christine Condo, yavuze ko muri iyo nama abayirimo baganirira hamwe bimwe mu bibazo bikigaragara mu buhinzi bwa kawa ariko bakarebera hamwe n’amahirwe arimo.

Yashimiye leta y’u Rwanda na Repubulika Iharanira Demokarasi ya Congo ku bufatanye bakomeza kugirana, Bloomberg Philanthropies na Michael Bloomberg muri rusange.

Mukamurigo Alvera waturutse mu karere ka Gicumbi, Umurenge wa Muko usanzwe ari umuhinzi wa Kawa, yavuze ko umushinga Sustainable Growers ukiza washyize abagore mu matsinda, ubigisha gukorera kawa kuva itewe, isoromwe kugeza mu ku ruganda n’uko itegurwa.

Yagize ati “Uyu muryango uduha amahugurwa, gukorera kawa no gukora izindi gahunda za leta, ubu umudamu wo mu cyaro ntacyumva ko kawa ari iy’abagabo gusa ahubwo twese dufatanya kuyivanamo umusaruro ufasha urugo.”

Ikawa ni kimwe mu bihingwa bifatiye runini ubukungu bw’u Rwanda. Ikigo cy’Igihugu gishinzwe kohereza mu Mahanga ibikomoka ku Buhinzi n’Ubworozi (NAEB) cyatangaje ko umwaka ushize hoherejwe toni ibihumbi 24 za kawa mu mahanga, havamo amafaranga agera kuri miliyoni 67 z’amadorali. Uyu mwaka hari intego yo kugeza kuri miliyoni 75 z’amadorali avuye muri kawa.

Iyi nama kandi yitabiriwe n'abayobozi bavuye muri Repubulika Iharanira Demokarasi ya Congo
Inzobere mu buhinzi bwa kawa ziraganira uko iki gihingwa cyarushaho kugezwa ku isoko mpuzamahanga
Dr Mukeshimana yashimye uruhare rukomeye rukorwa n’umuryango Sustainable Growers Rwanda mu guhugura abahinzi ba kawa
Abanyamahanga bazobereye mu buhinzi bwa Kawa bitabiriye iyi nama
Let’s Talk Coffee Rwanda ni inama yahuje inzobere mu buhinzi bw’ikawa, abahinzi, abaguzi
Minisitiri w’ubuhinzi n’ubworozi yagaragaje ko kawa ari igihingwa gifatiye runini ubukungu bw’u Rwanda
Umuyobobozi Mukuru wa Sustainable Growers mu Karere, Christine Condo, yavuze ko muri iyi nama abayirimo baganirira hamwe bimwe mu bibazo bikigaragara mu buhinzi bwa kawa ariko bakarebera hamwe n’amahirwe arimo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza