00:00:00 IGIHE NETWORK KN KINYARWANDA EN ENGLISH FR FRANCAIS

Minisitiri Mukeshimana yagaragaje ko amafaranga abahinzi b’ikawa bahabwa akiri make

Yanditswe na Iradukunda Serge
Kuya 16 Ugushyingo 2021 saa 02:44
Yasuwe :
0 0

Minisitiri w’Ubuhinzi n’ubworozi, Dr Gérardine Mukeshimana yagaragaje abahinzi ba kawa nk’abadakwiye kwirengagizwa ngo bahabwe amafaranga make ku musaruro wabo, mu gihe abayicuruza yamaze gutunganywa bayikuramo akayabo.

Ibi Minisitiri Mukeshimana yabigarutseho kuri uyu wa Kabiri tariki 16 Ugushyingo 2021, ubwo hatangizwaga imirimo y’Inteko Rusange ya 61 y’Ihuriro Nyafurika ry’Ibihugu bihinga Kawa, IACO anabereye umuyobozi.

Iri huriro ryashinzwe mu 1960, ritangirana n’ibihugu 11 kuri ubu ribarizwamo ibihugu bigera kuri 25 bihinga bikanatunganya kawa birimo n’u Rwanda.

Ni inama yitabiriwe n’abayobozi bo mu rwego rw’ubuhinzi n’ubucuruzi bwa kawa baturutse hirya no hino ku Mugabane wa Afurika kugira ngo barebere hamwe uko ubuhinzi bwa kawa bwarushaho gutezwa imbere kuri uyu mugabane kandi bukagirira inyungu ababukora.

Minisitiri Mukeshimana yagaragarije abitabiriye iyi nama ko ikawa ari kimwe mu bihingwa byinjiriza u Rwanda amafaranga menshi mu byo rwohereza mu mahanga.

Ikigo cy’Igihugu gishinzwe guteza imbere iyoherezwa mu mahanga ry’ibikomoka ku buhinzi n’ubworozi, NAEB, cyatangaje ko mu mwaka wa 2020/2021, ibikomoka ku buhinzi byoherezwa mu mahanga bivuye mu Rwanda byinjije arenga miliyoni 444,8$, ni ukuvuga abarirwa muri miliyari 447 Frw.

Mu 2020/21, u Rwanda rwohereje mu mahanga ibilo miliyoni 16,8 by’ikawa byinjije asaga miliyoni 61,5$, ni ukuvuga ko ari miliyari 62.2Frw, akaba yariyongereyeho 1,83% ugereranyije na miliyoni 60,4$, zinjijwe mu bilo miliyoni 19,7 by’ikawa byoherejwe mu mahanga mu mwaka wabanje.

Nubwo bimeze gutya ariko, kimwe na handi muri Afurika, Minisitiri Mukeshimana yagaragaje ko amafaranga umuhinzi wa kawa ahabwa ku kilo akiri hasi.

Ati “Abaturage bahinga ikawa muri Afurika usanga akenshi bayigurisha ikiri ibitumbwe, bakayigurisha ku biciro bitari byiza, noneho ugasanga abantu babona inyungu ari abakora imirimo iri hejuru y’iyo umuturage uhinga uhinga ikawa aba yakoze.”

“Iki ni ikibazo cyugarije Afurika ariko turebye nk’ibyo dukora mu Rwanda dutekereza ko dukeneye gukomeza gukora uko dushoboye kose igiciro cy’ikawa y’igitumbwe kikagenda kizamuka.”

Yakomeje agaragaza ko u Rwanda rugenda rukora ibishoboka byose kugira ngo amafaranga umuhinzi wa kawa ahabwa ku kilo yiyongere.

Yifashishije ingero, yagaragaje ko ubu umuhinzi wa kawa ahabwa 248 Frw avuye kuri 80 Frw yahabwaga mu 2015.

Minisitiri Mukeshimana yavuze ko bidakwiye kuba umuhinzi wa kawa yakwishyurwa amafaranga make mu gihe abayicuruza bayikuramo akayabo.

Ati “Bivuze ko umuhinzi atari we wagakwiye kubona inyungu nto abandi bakagenda bagakira kuko tuzi ko agakombe k’ikawa kaba gahenze cyane.”

Yavuze ko kugira ngo amafaranga abahinzi ba kawa bahabwa ku musaruro wabo akomeze kwiyongera, hari ibikwiye gukorwa birimo kuzamura ubwiza bw’umusaruro n’ubwinshi, gutera ibiti bishya no guhinga bwoko bwa kawa bugezweho.

Umunyamabanga Mukuru wa IACO, Solomon Rutega yagaragaje ko Isoko Rusange rya Afurika, African Continental Free Trade Area (AfCFTA) riherutse gutangizwa, rikwiye kuba amahirwe yo guteza imbere ubucuruzi bwa kawa kuri uyu mugabane binyuze mu guhahirana.

Hailemariam Desalegn wabaye Minisitiri w’Intebe wa Ethiopie kuri ubu akaba akuriye iri huriro Nyafurika ry’Ibihugu bihinga Kawa, yibukije abitabiriye iyi nama ko niba ibihugu bya Afurika biri mu bucuruzi bw’ikawa bishaka gutera imbere, bikwiye gutahiriza umugozi umwe mu kongerera agaciro iki gihingwa.

Ati “Nka Afurika, dufite ubushobozi bwo gutuma urwego rwa kawa rumera uko tubishaka, IACO izatuma ikawa ya Afurika ibasha guhangana ku isoko, mu gihe tuzaba twatahirije umugozi umwe mu gukemura ibibazo uru rwego rufite uyu munsi.”

U Rwanda ni kimwe mu bihugu bya Afurika bihinga kandi bikanatunganya kawa nziza ifite umwihariko w’uburyohe bukundwa n’amahanga.

Ibarura rya kawa ryakozwe mu 2015, ryagaragaje ko ikawa ihingwa n’abahinzi bangana na 355 ,751 mu Rwanda. Umusaruro wa kawa u Rwanda rweza uri hagati ya toni 20,000 na toni 24,000 za kawa itonoye.

Minisitiri w’Ubuhinzi n’ubworozi, Dr Gérardine Mukeshimana yagaragaje abahinzi nk’abadakwiye kurenzwa ingohe mu bucuruzi bwa kawa bwinjiza akayabo
Iyi nama yari yitabiriwe n'abantu batandukanye bafite aho bahuriye n'ubuhinzi n'ubucuruzi bwa kawa
Abitabiriye iyi nama bafashe ifoto y'urwibutso

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .