Minisitiri Mujawamariya yahawe igihembo cyo guteza imbere umubano w’u Rwanda n’u Burusiya

Yanditswe na Evariste Nsengimana
Kuya 23 Ugushyingo 2019 saa 09:05
Yasuwe :
0 0

Minisitiri w’Ibidukikije, Dr Jeanne d’Arc Mujawamariya, wari Ambasaderi w’u Rwanda mu Burusiya, yahawe igihembo n’icyo gihugu mu kumushimira umuhate yagize mu guteza imbere no gusigasira umubano mwiza hagati y’ibihugu byombi.

Iki gihembo yagishyikirijwe ku wa 22 Ugushyingo 2019 n’Intumwa yihariye ya Perezida w’u Burusiya [Vladimir Putin] mu Burengerazuba bwo Hagati na Afurika, akaba na Minisitiri wungirije w’Ububanyi n’Amahanga, ML Bogdanov.

Minisitiri Mujawamariya iki gihembo cy’ishimwe yagishyikirijwe ubwo yasezeraga ku mirimo yari ashinzwe muri iki gihugu guhera 2013 nyuma yo kugirwa Minisitiri w’Ibidukikije.

Ku wa 4 Ugushyingo 2019, nibwo Perezida Kagame yakoze amavugurura muri Guverinoma yasize Jeanne d’Arc Mujawamariya wari Ambasaderi w’u Rwanda mu Burusiya abaye Minisitiri w’Ibidukikije, asimbura Dr Biruta Vincent wayiyoboraga wagizwe uw’Ububanyi n’Amahanga n’Ubutwererane.

Ubwo yamushyikirizaga icyo gihembo, Bogdanov yaguze ko igihugu cye cyashimishijwe n’umusaruro Dr Mujawamariya yatanze mu guteza imbere imikoranire y’ibihugu byombi, by’umwihariko mu rwego rw’ubucuruzi, ubukungu n’ishoramari.

Dr Mujawamariya yavuze ko “Bashimye umubano mwiza uri hagati y’u Rwanda n’u Burusiya kuva Ambassade yacu yakongera gufungura imiryango i Moscow mu 2013 kugeza magingo aya.”

“Bijeje gukomeza imigendekere myiza y’umubano mu nzego zose z’ubuzima bw’igihugu harimo n’urwego rw’ibidukikije, aho bigaragarira buri wese ko u Rwanda rwateye intambwe igaragara.”

Umubano w’u Rwanda n’u Burusiya muri iyi minsi uhagaze neza aho bigaragarira mu masezerano y’ubufatanye impande zombi ziheruka gushyiraho umukono.

Mu kwezi gushize u Rwanda n’Ikigo cya Leta y’u Burusiya gishinzwe Ingufu (Rosatom) byasinyanye amasezerano y’ubufatanye mu mushinga wo kubaka mu Rwanda Ikigo cy’Ubushakashatsi ku bumenyi bw’Ingufu za Nucléaire n’Ikoranabuhanga (Center for Nuclear Science and Technology).

Ubwo bushakashatsi buzajya bukorwa n’icyo kigo bugamije gushaka ibisubizo biganisha ku iterambere. Izi ngufu zifashishwa mu bikorwa bya gisivili birimo iby’ubuvuzi nko kuvura indwara za kanseri hifashishijwe uburyo bwo kuyishiririza (radiothérapie).

Aya masezerano kandi yasinyiwe igihe kimwe n’andi y’ubufatanye mu by’ubucukuzi bw’amabuye y’agaciro, Peteroli na Gaz akubiyemo gukora ubushakashatsi bw’imitungo kamere iri mu butaka no gutanga ibikoresho na serivisi byo kwifashisha mu bucukuzi bw’amabuye, peteroli na gaz.

Minisitiri w’Ibidukikije, Dr Jeanne d’Arc Mujawamariya, wari Ambasaderi w’u Rwanda mu Burusiya, yashimiwe umuhate mu gusigasira umubano mwiza hagati y’ibihugu byombi
Dr Mujawamariya yahagarariye inyungu z'u Rwanda mu Burusiya kuva mu 2013

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza