Hagaragajwe bimwe mu bibazo bizonga iterambere ry’udukiriro

Yanditswe na Kanamugire Emmanuel
Kuya 3 Ukwakira 2016 saa 01:48
Yasuwe :
0 0

Mu nama yahuje inzego zitandukanye zifite aho zihuriye na gahunda ya Hanga Umurimo, hagarutswe ku bibazo byugarije ‘Agakiriro’ nk’imwe mu nzira zitezweho gufasha u Rwanda guhanga imirimo myinshi idashingiye ku buhinzi.

Iyi nama yabereye i Kigali kuri uyu wa 3 Ukwakira, yari ihuje Minisiteri y’Ubucuruzi n’Inganda, Minisiteri y’Abakozi ba Leta n’Umurimo, Ikigo gishinzwe guteza imbere imyuga n’Ubumenyingiro, WDA, BDF, Ikigo cy’Igihugu gishinzwe iterambere,RDB n’izindi.

Muri iyi nama, Minisitiri w’Ubucuruzi n’Inganda, François Kanimba yavuze ko ubwo yasuraga Agakiriro k’Akarere ka Bugesera, kamwe mu tw’icyitegererezo mu gihugu, yatunguwe no gusanga umuyobozi wako ari umunyabukorikori usanzwe.

Ati”Aba bantu b’abanyabukorikori duhamagara, dukangurira kuza mu Gakiriro bagombye kuhagera bakahasanga umunyamwuga ushinzwe mu by’ukuri kubafasha; kubahuza n’inzego zitandukanye za Leta ari izibaha amahugurwa nka za WDA kugira ngo bagirane gahunda, izi za BDF zitanga inkunga kugira ngo bashobore kubona ibikoresho, akarere ubwako gashinzwe ishyirwa mu bikorwa ry’umushinga.”

Yakomeje avuga ko iyo ugeze mu Gakiriro uhasanga uwo bita perezida ariko udafite ubumenyi buhagije ndetse utanafite uburyo bw’imikorere busobanutse.

Kanimba wagarutse no ku kibazo cy’imicungire y’ibikoresho ndetse n’uburyo imisoro ikusanywa mu dukiriro ikoreshwa mu kubisigasira, asaba ko buri karere gakwiye gushyiraho umuntu w’umunyamwuga uzajya ubicunga.

Minisitiri Kanimba kandi yanagarutse ku micungire y’amafaranga yishyurwa n’abakorera mu Dukiriro avuga ko Ikigo cy’Imisoro n’Amahoro kiyakusanya kikayashyikiriza Uturere, nyamara bishoboka ko haramutse hagize ikibazo kiba [nk’agakiriro kagashya], hataboneka uburyo bwo kugikemura mu buryo bwihuse.

Ati” Uko bimeze ubu ngubu turi mu byago byo kuzagenda ugasanga ibikorwaremezo byashyizwe hariya ntibikora kandi abantu barimo bacibwa amafaranga, bitana bamwana, ugasanga ibyo twari dutegereje kugeraho ntabwo biri kugerwaho neza.”

Minisitiri w’umurimo, Judith Uwizeye na we yavuze ko akurikije uburyo Agakiriro gasigaye kaba kubatse ndetse n’ibikoresho biba birimo bikwiye ko hashyirwaho umuntu ufite ubumenyi buhagije wo kugenzura ibikorerwamo byose.

Ati” Abantu bafite ubwo bumenyi turabafite, ntabwo ari abo twenda kujya gushaka hanze. Ikibazo ni ukubareba aho bari ndetse no kubaha inshingano bagomba gukora”

Muri iyi nama, Umuyobozi mukuru wa BDF, Innocent Burindi,yagaragaje ko umwaka ushize bari bihaye intego yo guhanga ibihumbi 23 ariko babashije kugera ku bihumbi 18, aho amafaranga yose bakoresheje, miliyari 4.4 z’amafaranga y’u Rwanda ariyo yavuye muri NEP/Kora Wigire andi akaba yaravuye muri leta n’abandi baterankunga.

Yakomeje avuga ko ariko bahuye n’imbogamizi ikomeye y’uko inguzanyo bakwa y’ibikoresho byabarangije amasomo y’imyuga n’ubumenyingiro iri hejuru ugereranyije n’ubushobozi baba bafite ndetse ugasanga n’ababisaba batabifiteho ubumenyi buhagije.

Ikigo cy’Igihugu gifite mu nshingano amashuri y’imyuga n’ubumenyingiro, WDA, nacyo cyagaragaje ikibazo cy’uko bikigoye kuba wagera mu gakiriro ukahabona imashini wakwifashisha mu guha umuntu amahugurwa.

Mu bindi bibazo byagaragajwe n’uko hakiri uturere dusa n’ututarumva neza akamaro ko kubaka udukiriro n’ahandi turi ariko ugasanga imikorere yatwo itari ku rwego rwemewe aho usanga dukorera no mu mazu y’abantu.

Gahunda yo guhanga imirimo mishya idashingiye ku buhinzi, NEP n’imwe mu nkingi za EDPRS II, n’iy’Icyerekezo 2020. Yibanda ku gufasha abagore n’urubyiruko kubona igishoro cyo guhangana imirimo bahabwa ingwate cyangwa inkunga ku mishinga bateguye kugeza kuri 75%.

Intego ya NEP ni uko buri mwaka hahangwa imirimo ibihumbi 200 na ho 2020 ikazagera hamaze guhangwa imirimo miliyoni 3,2.

Minisitiri w'Ubucuruzi n'Inganda, François Kanimba na Minisitiri w'Abakozi ba Leta n'Umurimo, Judith Uwizeye
Bamwe mu bitabiriye inama yagaragaje ibibazo bikibangamiye Udukiriro hirya no hino mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza