Kwamamaza

Minisitiri Kanimba yasabye ko haba impinduka mu guteza imbere inganda mu karere

Yanditswe kuya 6-09-2016 saa 17:00' na Rabbi Malo Umucunguzi


Minisitiri w’Ubucuruzi n’Inganda mu Rwanda, François Kanimba, yasabye ko akarere kashyira hamwe mu guteza imbere inganda, nk’uko byagiye bigenda ku zindi gahunda zigamije gufasha mu kwihuza nk’akarere zirimo nk’isoko rusange.

Ishoramari muri Afurika n’imbogamizi zikibangamiye ba rwiyemezamirimo, byahawe umwanya uhagije mu nama yiga ku Ishoramari muri Afurika, The Gobal Investment Summit, TGAIS, imaze iminsi ibiri ibera i Kigali.

Mu kiganiro cyayobowe na Peter Ndoro, Umunyamakuru mu kigo cy’igihugu cy’Itangazamakuru muri Afurika y’Epfo, SABC; Minisitiri Kanimba hamwe n’Umunyamabanga Mukuru wa COMESA, Dr. Sindiso Ndema Ngwenya; Umuyobozi Mukuru w’Urugaga rw’Abikorera PSF; bagaragaje ko hari intambwe yatewe n’ubwo inganda zitaragera ku rwego rwifuzwa.

Minisitiri Kanimba yavuze ko mu Muyango wa Afurika y’u Burasirazuba (EAC) n’Umuryango w’Ubukungu bw’Ibihugu bya Afurika y’u Burasirazuba, COMESA, kwishyira hamwe biri kwihuta ndetse ababirebera hafi bahamya ko EAC yo iri imbere cyane muri Afurika.

Ati “Hari ibintu twabashije kugeraho mu koroshya ubucuruzi, mu kugabanya ikiguzi bisaba mu gukora ubucuruzi mu mihora inyuzwamo ibicuruzwa, turi no mu biganiro bikomeye ngo tunoze urujya n’uruza rwa serivisi kandi biri gukorwa binyuze muri gahunda y’Umuhora wa ruguru, uhuza u Rwanda, Uganda, Kenya na Sudani y’Epfo, aho muri bimwe twamaze gufata ibyemezo nko mu itumanaho, aho turi gushyira imbere akarere ko guhamagaranamo kandi ubu biri gukora.”

Yakomeje agira ati “Iyo bigeze ku bufatanye mu by’inganda, numva ko tubivuga mu nama ariko ntitugire uburyo bigomba gukorwamo. Turacyabona aho mu bikorera muri ibi bihugu buri umwe aba akora ibintu bye, agerageza uburyo yabasha guhangana n’abo bakora bimwe mu gihugu baturanye, kandi imikorere nk’iyi uko mbibona ntabwo ifasha mu gushyiraho inganda zikomeye mu karere.’’

Umunyamabanga Mukuru wa COMESA, Dr Sindiso Ngwenya, yavuze ko inganda zikeneye gutezwa imbere hadasigaye inyuma ibigo bito n’ibiciriritse kuko aribyo bifata bibiri bya gatatu by’umusaruro mbumbe w’Isi ungana na tiriyari zisaga 77 z’amadolari ya Amerika.

Umuyobozi w’Urugaga rw’abikorera, Benjamin Gasamagera, yavuze ko ibihugu bikwiye gushyira imbaraga hamwe, ndetse ingamba zifatwa zigashyirwa mu bikorwa.

Ati “Dukeneye kumva ko ibintu byihutirwa, nta mpamvu yo kujya tuvuga buri gihe ibintu bimwe ariko ntibikorwe. Nibyo hazabaho impamvu, turi hano ngo dukemure ibyo bibazo, ariko iyo urebye uburyo dukoresha ibiri ku isoko ryacu hagati ya 15%-20% dufite ubushobozi bwo kubyikorera.”

“Mu gutunganya ibikomoka ku buhinzi harimo amahirwe menshi. Uzabona ibintu biva mu Burayi, Malaysia, kandi ni ukubyongerera agaciro wenda no kubifunga neza. Hari ukumva ko abandi bantu bafite ubushobozi kuturusha. Tugomba guhindura iyo myumvire.”

Iyi nama ya TGAIS ibaye ku nshuro ya gatatu yitabiriwe n’abantu bagera ku 1000 bo muri Afurika no hanze yayo, barimo abikorera n’abo mu nzego za Leta. Inama ebyiri ziheruka, iyo mu 2014 na 2015 zabereye i Londres mu Bwongereza.

Minisitiri Kanimba yasabye ko haba impinduka mu guteza imbere inganda mu karere

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved