Minisitiri Kamayirese yasabye impunzi guharanira umuco wo kwigira

Yanditswe na Prudence Kwizera
Kuya 21 Kamena 2019 saa 04:06
Yasuwe :
0 0

Minisitiri w’Ibikorwa by’Ubutabazi, Kamayirese Germaine, yasabye impunzi zahungiye mu Rwanda gutangira gutekereza ku muco mwiza wo kwigira kuko inkunga zigenerwa n’abaterankunga zatangiye kugabanuka.

Yabivuze kuri uyu wa Kane ubwo yitabiraga igikorwa cyo kwizihiza umunsi mpuzamahanga w’impunzi mu Nkambi ya Kigeme iherereye mu Karere ka Nyamagabe.

Muri iyo nkambi icumbikiye impunzi z’Abanye-Congo zigera ku bihumbi 20 ni ho umunsi mukuru wizihirijwe ku rwego rw’igihugu.

Yavuze ko bishimira ko impunzi zasubira mu bihugu byabo ariko abasaba ko mu gihe bitaragerwaho nabo bagomba kugira icyerekezo , baharanira guhangana n’ibibazo bahura nabyo.

Ati “Mu gihe gutaha bitaragerwaho twifuza ko mwagubwa neza kuko Leta y’u Rwanda yashyizeho gahunda zitandukanye kugira ngo mukomeze mugire ubuzima bwiza, abana bige, abarwaye muri mwebwe bavurwe abantu bakore biteze imbere.”

Yakomeje avuga ko nabo nk’impunzi bagomba kugendera ku mategeko y’u Rwanda nk’igihugu bahungiyemo ariko hari n’ibyo basabwa gukora kugira ngo imibereho yabo imere neza.

Ati “Mu Rwanda dufite umuco wo kwigira; impunzi ku Isi zigenda ziba nyinshi ibyo bigatuma inkunga iva ku baterankunga igenda igabanuka, ibyo rero biradusaba ko dutekereza ku bundi buryo budasanzwe nk’uko abanyarwanda bari kwiga kwigira namwe mugatangira mugatekereza ku byo kwigira.”

Bamwe mu mpunzi bacumbitse mu nkambi ya Kigeme bavuga ko ubuzima babayemo bugoye kuko bafite ibibazo birimo kutabona imiti y’indwara zikomeye nk’umwijima, amacumbi n’amashuri adahagije.

Bifuza ko leta y’u Rwanda yabakorera ubuvugizi umutekano ukagaruka mu gihugu cyabo bagasubira ku ivuko.

Perezida w’inkambi ya Kigeme, Munyakarambi Sebutozi Edison yagize ati “Umuti w’ubuhunzi ni ugutaha. Ibyo byose byasubizwa ari uko umuntu asubiye iwabo; naho igihe cyose tukiri mu nkambi ntibizabura kubaho. Turifuza ko umutekano waboneka iwacu muri Congo tugataha.”

Basabye kandi ko u Rwanda rwabakorera ubuvugizi abayobozi bo muri Repubulika iharanira Demokarasi ya Congo bakajya baza kubasura bakababwira amakuru ndetse n’ikiri gukorwa ngo umutekano ugaruke batahe.

Kuri ubu mu Rwanda habarurwa impunzi zigera ku bihumbi 150. Izigera kuri 51% zituruka muri Repubulika Iharanira Demokarasi ya Congo naho 48% ziva mu Burundi. Bose bacumbitse mu nkambi zigera kuri esheshatu.

Insanganyamatsiko y’uyu mwaka yo kwizihiza umunsi mpuzamahanga w’impunzi igira iti ‘Duterane intambwe n’impunzi’.

Bizihije umunsi mpuzamahanga w'impunzi mu mbyino ziranga umuco wabo
Babyinnye indirimo zo muri Repubulika Iharanira Demokarasi ya Congo
Minisitiri Kamayirese ashimira Umuryango uherutse gusezerana kandi ukuze
Bamwe bize kudoda imyenda nk'uburyo bubafasha kubaho
Umwe mu miryango iherutse gusezerana byemewe n'amategeko wahawe impano
Bimwe mu byo Impunzi zicumbitse mu nkambi ya Kigeme zikora
Impunzi zo mu Nkambi ya Kigeme zishakisha umwuga zikora kugira ngo zibashe kwibeshaho

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza