Minisitiri Kaboneka yashimiye itorero ry’Inkomezabigwi ryubatse ibikorwa bya miliyoni 142 Frw

Yanditswe na Hakizimana Jean Paul
Kuya 14 Kamena 2018 saa 04:19
Yasuwe :
0 0

Minisitiri w’Ubutegetsi bw’Igihugu, Kaboneka Francis, yasoje itorero ry’urugerero ruciye ingando, icyiciro cy’Inkomezabigwi, ku wa 5 Gicurasi 2018, ashimira abaryitabiriye ibikorwa by’iterambere bakoresheje amaboko yabo.

Iri torero ryitabirwa n’abarangije kwiga amashuri yisumbuye bahagarariye abandi muri buri kagari ko mu Ntara y’Iburasirazuba, ryarimo abagera kuri 503; abakobwa 176 n’abahungu 327.

Mu gihe cy’iminsi 38 iri torero ryamaze, urubyiruko rwaryitabiriye rwakoze ibikorwa bifite agaciro ka 142 654 480 Frw; hubatswe inzu ebyiri zituzwamo imiryano ine, ine; bagejeje amazi meza ku miryango 12 y’ingabo zavuye ku rugamba; hasibuwe imihanda ihwanye na kilometero 1.5 ; bubatse ubusitani ku midugudu; ubwiherero umunani ku nzu z’abatishoboye; bubatse ibiraro bitatu ndetse banakurungira inzu umunai z’abaturage.

Umubyeyi w’abana batatu uri mu miryango yatujwe, Kayitesi Ernestine, yabwiye IGIHE ko ntaho yagiraga ho kuba, ashimira urubyiruko rwamwubakiye.

Yagize ati “Ubusanzwe mbana n’ubumuga, mfite ibikomere bya jenocide, hari igihe cyageraga nkajya mu bitaro ngasiga abana mu ikode nkumva nta mahoro mfite ariko uru rubyiruko rwanyubakiye inzu nziza, ndishimye cyane kandi ndanashimira Perezida Kagame washyizeho iri torero."

Minisitiri Kaboneka yashimiye izi ntore ku bikorwa zakoze mu gihe gito, anashimira abaturage n’abatoza b’intore bafatanyije nazo mu bikorwa byose bakoranye.

Uretse ibikorwa by’amaboko bakoze, Minisitiri Kaboneka yabasabye ko bafasha urundi rubyiruko rw’aho baturuka guharanira kwigira no kwihesha agaciro, bakanarwanya icyatandukanya Abanyarwanda cyose.

Yagize ati “Mujyane inshingano zo guhindura urundi rubyiruko muturanye, mugende mube imboni aho mutuye, mwubake ubumwe bwo gukorera hamwe muri ubyiruko, mudufashe guhindura imyumvire ya bamwe mu babyeyi nubwo ari bake bagifite ingengabitekerezo mudufashe kubahindura."

Yanabasabye ko baba imboni ya Leta mu kurwanya ibiyobyabwenge n’inda zitateguwe .

Komiseri muri Komisiyo y’Igihugu y’Itorero, Mutuyeyezu Marie Josée, yavuze ko uru rugerero rufasha urubyiruko kwibuka indangagaciro na kirazira biranga Abanyarwanda.

Mu gihugu hose hatojwe intore 2470 muri uru rugerero ruciye ingando.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza