Kwamamaza

Minisiteri zisobanuye imbere y’Abadepite ku ikoreshwa ry’amafaranga ya ‘Kora-wigire’

Yanditswe kuya 6-10-2016 saa 08:05' na Philbert Hagengimana


Amafaranga atarakoreshejwe muri Gahunda ya ‘Kora-wigire’ (NEP/National Employment Program) n’andi yakoreshejwe muri gahunda ariko ntizirangire, ni yo abadepite bagize PAC batumirije Minisiteri zidandukanye.

Iyi gahunda ya NEP ‘Kora wigire’ ni imwe mu nkingi za gahunda y’Igihugu y’Imbaturabukungu, EDPRS II, n’iy’Icyerekezo 2020, ikaba yibanda ku gufasha abagore n’urubyiruko kubona igishoro cyo guhanga imirimo, bahabwa ingwate cyangwa inkunga ku mishinga bateguye kugeza kuri 75%.

Raporo y’Umugenzuzi Mukuru w’Imari ya Leta mu mwaka wa 2014/2015, igaragaza ko mu ntangiriro z’iyo gahunda hagiye hakorwa amakosa yo kudakoresha amafaranga ayigenewe mu nzego zimwe na zimwe, aho Abadepite banavuze ko “izo nzego zabonye ayo mafaranga nka ‘Manu’ zitari ziteguye kubona.”

Umunyamabanga Uhoraho muri Minisiteri y’Abakozi ba Leta n’Umurimo, Mulindwa Samuel, yasobanuriye Abadepite ko ayo mafaranga atakoreshejwe kuko yabonetse umwaka w’ingengo y’imari wenda kurangira, akaba yarakoreshejwe mu mwaka wakurikiyeho.

Ati “Amafaranga atarakoreshejwe ni igice cy’ayo twakuye mu baterankunga, ashyikirizwa izo nzego zigomba gushyira iyo gahunda mu bikorwa mu kwezi kwa gatatu (Werurwe) kandi ubusanzwe ingengo y’imari ya Leta ifungwa ku itariki 15 z’ukwezi kwa gatanu (Gicurasi). Mu by’ukuri hari amezi abiri yonyine yo gushyira mu bikorwa izo gahunda zari zarateguwe.”

Kuba mbere yo gukoresha amafaranga ya Leta binyura mu nzira ndende, ni byo byatumye inzego zimwe na zimwe zayahawe zarahisemo kutayakoresha aho kuzatungwa agatoki ko zayakoresheje nabi.

Muri izo nzego havuzwe Minisiteri y’Uburinganire n’Iterambere ry’Umuryango (MIGEPROF) itarakoresheje amafaranga yahawe muri gahunda yo gufasha abangavu batwaye inda zitateganyijwe, ngo bihangire imirimo; Minisiteri y’Urubyiruko n’Ikoranabuhanga (MYICT) yari yahawe amafaranga yo kugurira ibikoresho urubyiruko rwasoje amasomo mu myuga mu kigo cya Iwawa.

Icyakora ngo nyuma y’itariki 30 Kamena 2015, ayo mafaranga yakoreshejwe ibyo yari agenewe, ku buryo ibyari byagaragajwe nk’ikibazo byose byari byamaze gukemurwa.

Ayakoreshejwe imishinga ntirangire nk’uko yateganyijwe, inzego zihuriye kuri gahunda ya NEP zemeye ko habayeho ubukererwe, ariko na yo ikaza kurangira, aho batanze urugero nk’uruganda ‘Iwacu’ rutunganya umusaruro w’amata ndetse n’uw’ibirayi ruri mu Karere ka Nyabihu.

Raporo y’Umugenzuzi Mukuru w’Imari ya Leta yagaragaje ayo makosa yatumye izo nzego zitumizwa, yarangiye kuwa 30 Mata uyu mwaka, MIFOTRA ikaba yasobanuye ko ibyayigaragajwemo byamaze gutunganywa, ariko Abadepite bakaba bahise bayisaba inyandiko zibigaragaza.

Amavu n’amavuko ya NEP n’amakosa yayigaragayemo

Gahunda ya NEP ‘Kora wigire’ yatangiye mu mwaka w’ingengo y’imari wa 2014/2015. Yashyizweho nyuma y’igenzura ryakozwe rikagaragaza ko hari abafatanyabikorwa batandukanye bari mu bikorwa bifitanye isano no guhanga umurimo, aho wasangaga nta genabikorwa bari barashyiriweho bitewe n’uko wasanga buri Ministeri yifitiye abayo kandi bafite utuntu duto duto ku buryo nta bufatanye bwari buhari.

Ubwo iryo genzura ryakorwaga, byagaragaye ko hari gahunda zigera kuri 25 zikora ibijyanye no guhanga umurimo, ariko ugasanga ari imishinga mito.

Gahunda ya NEP ‘Kora wigire’ ikorwa ku bufatanye bwa MIGEPROF, MINICOM, MYICT, MINEDUC, MINALOC, RDB, LODA, WDA, NIRDA, NYC, NWC, NCPD, RCA, NCBS, BDF na PSF; izo nzego zose zikarebererwa na Minsiteri y’Abakozi ba Leta n’Umurimo nk’umuhuzabikorwa.

Ubwo gahunda ya NEP ‘Kora wigire yari imaze amezi abiri gusa itangiye, Guverinoma ya Suède (Swedish Governement Agency) yahise yegera Leta y’u Rwanda muri Nzeri, igaragaza ko yashimye ibyo bikorwa, maze kuwa 20 Ugushyingo 2014 basinya amasezerano y’ubufatanye, itanga amafaranga 9,300,000,000 z’amanyarwanda, yagombaga gukoreshwa mu myaka itatu.

Mulindwa akomeza avuga ko ayo masezerano yavugaga ko buri mwaka hari ibyo u Rwanda rugomba kubanza kuzuza kugira ngo iki gihugu gitange andi.

Ayo masezerano kandi yavugaga ko mu mwaka wa mbere hazatangwa amafaranga 3,600,000,000 akazatangira gukoreshwa ari uko yashyizwe mu ngengo y’imari ya Leta, kuba ingengo y’imari isubiwemo muri uwo mwaka yari yaremejwe kuwa 25 Gashyantare. Aho ni ho haturutse ubukererwe bwo kugeza amafaranga ku bagombaga gushyira mu bikorwa gahunda ya NEP ‘Kora wigire’, aha hakaba ari na ho haturutse ibibazo byose PAC yahamagariye izo nzego zose.

N’ubwo gahunda ya NEP ‘Kora wigire’ yagiye igaragaramo utubazo dutandukanye, Abadepite bashimye ko intego yo guhanga imirimo 200.000 yari yihawe yagezweho, aho MIFOTRA yagaragaje ko hahanzwe imirimo 203.000.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved