00:00:00 IGIHE NETWORK KN KINYARWANDA EN ENGLISH FR FRANCAIS

Minisiteri y’Ubucuruzi n’Inganda yasohoye ibiciro ntarengwa by’ibirayi

Yanditswe na Mukwaya Olivier
Kuya 12 Ugushyingo 2021 saa 11:22
Yasuwe :
0 0

Nyuma y’icyumweru abahinzi b’ibirayi bagaragaje ikibazo cy’igiciro cy’ibirayi kiri hasi bitajyanye n’ingufu baba bashoye, Minisiteri y’Ubucuruzi n’Inganda yasohoye ibiciro ntarengwa ku musaruro w’ibirayi.

Ni mu itangazo rya Minisitiri w’Ubucuruzi n’Inganda ryagiye hanze kuri uyu wa 11 Ugushyingo, aho amenyesha abantu bose ko guhera ku itariki ya 12 Ugushyingo 2021, ibiciro cy’ibirayi ku musaruro w’igihembwe cya 2022 A.

Nk’uko bigaragara muri iri tangazo igiciro cy’ibirayi bya Kinigi ku muguzi wa nyuma ntikigomba kujya hasi y’amafaranga 300 Frw. Ibirayi bya Kuruseke bigomba kugura amafaranga 255Frw.

Ubwoko bwa Kirundo bigomba kugura 260 Frw, Rwagume/Rwamashaki na Nyirakarayi 240 Frw naho ubwa Peko bukagura 230Frw.

Perezida wa Koperative y’abahinzi b’ibirayi mu Murenge wa Busasamana, Kanyesoko Pierre Celestin, yavuze ko bishimiye ibi biciro ariko bagomba gufata ingamba mu gucunga umusaruro.

Ati “Reta yadufashije kuko ubu nka hano Busasamana duhinga Peko yari igeze ku mafaranga 120 none bayishyize kuri 230, urumva ko hiyongereyeho arenga 100. Turashima leta ubu igisigaye ni ugucungana n’umusaruro kuko nukomeza kuba mwinshi igiciro kizagwa byaba bicye kikazamuka.”

Muri iri tangazo Minisiteri y’Ubucuruzi n’Inganda yibukije abanyarwanda ko umusaruro wose w’ibirayi ugomba gucuruzwa unyujijwe ku makusanyirizo yashyizweho muri buri Karere gahinga ibirayi.

Buri modoka yose itwaye umusaruro w’ibirayi ngo igomba kwitwaza ibyangombwa bigaragaza koperative umusaruro waturutsemo kandi izijyana umusaruro mu mujyi wa Kigali ziwuvanye mu Ntara y’Iburengerazuba n’Amajyaruguru zishobora kuwunyuza mu isoko rirangurizwamo imyaka riherereye mu Nzove cyangwa zikawerekeza ku yandi masoko aho abaguzi baherereye.

Abahinzi bibukijwe ko amakusanyirizo yose agomba gukoresha iminzani yujuje ubuziranenge kandi inzego z’ibanze zikagira uruhare rufatika mu kugenzura ko byubahirizwa.

Minisiteri y'Ubucuruzi n'Inganda yashyizeho ibiciro ntarengwa by'ibirayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .