Mininfra yasabye abatwara abagenzi kwihutira gushyira ’Speed Governors’ mu modoka zabo

Yanditswe na Jean Pierre Tuyisenge
Kuya 26 Nzeri 2016 saa 08:59
Yasuwe :
0 0

Minisiteri y’Ibikorwaremezo, Mininfra, yasabye abashoferi b’imodoka zitwarira hamwe abagenzi,kwihutira gushyira utumashini tugabanya tukanacunga umuvuduko (Speed Governor) mu modoka zabo, kugira ngo hirindwe impanuka zaturukaga ku muvuduko ukabije.

Kuri uyu wa 26 Nzeri 2016, hatangijwe ku mugaragaro ikoreshwa ry’utwo tumashini tugabanya umuvuduko.

Umunyamabanga wa Leta muri Minisiteri y’Ibikorwaremezo, ushinzwe gutwara abantu n’ibintu, Dr Nzahabwanimana Alexis muri uwo muhango yasabye abashoferi kwihutira kudushyira mu modoka, no kubahiriza imikoreshereze yatwo.

Yagize ati “ Turasaba rwose abashoferi batwarira abagenzi hamwe n’abafite imodoka zitwara imizigo kwihutira gushyiramo utu tumashini. Ibi twabikoze kuko twabona impanuka ziri kudutwara abantu benshi.”

Dr.Nzahabwanimana yasabye abafite imodoka zitarebwa n’icyo cyemezo kutabigira urwitwazo ngo bagendere ku muvuduko ukabije. Yavuze ko nk’ibisanzwe uzarenga ku muvuduko ugenwa n’amategeko azabihanirwa.

Umuyobozi w’Ishami rya Polisi y’u Rwanda rishinzwe kubungabunga umutekano wo mu muhanda. Commissioner of Police (CP) George Rumanzi yasabye abatwara imodoka kutarenza 60 iteganywa n’itegeko.

Utumashini dushinzwe kugabanya umuvuduko mu modoka twari twaratangiye gukoreshwa ariko uyu munsi akaba aribwo twatangijwe ku mugaragaro, hakaba hanagaragajwe uko tuzakoreshwa n’uko tuzagenzurwa.

Ikoreshwa ryatwo rikubiye mu iteka rya Perezida wa Repubulika ryasohotse mu igazeti yo ku wa 26 Gashyantare 2015. Ni iteka ritegenya ko imodoka zitwarira abantu hamwe n’izitwara imizigo zigomba gutunga Speed Governor ndetse ntizirenze umuvuduko ungana na kirometero 60 mu isaha.

Nubwo bamwe mu bashoferi bagiye bumvikana bavuga ko icyo cyemezo kibabangamiye, Ruhamya waganiriye na IGIHE yadutangarije ko nyuma yo gusobanurirwa imikorere y’ako kuma ashima ingamba Leta ifata zo kurengera ubuzima bw’abaturage.

Yagize ati “Twari tuzi ko ari ibije kutubuza kugenda uko dushatse, ariko biragaragara ko Leta yacu izi gutekereza ibifiteye igihugu akamaro kuko ibi bikozwe hirindwa impanuka. Aho kugira ngo wihute ntugereye, wakwemera ugakerererwa ariko ukagerayo.”

Umunyamabanga wa Leta muri Minisiteri y’Ibikorwaremezo MININFRA ushinzwe gutwara abantu n’ibintu, Dr Nzahabwanimana Alexis
Umuyobozi w’Ishami rya Polisi y’u Rwanda rishinzwe kubungabunga umutekano wo mu muhanda Commissioner of Police (CP) George Rumanzi
Imashini ya 'Speed Governor'
Abayobozi bakuru ba Polisi bari bitabiriye uwo muhango

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244