Minisante yasobanuye impamvu itemeje ikoreshwa ry’ibiyobyabwenge nk’umuti w’ububabare

Yanditswe na Nshimiyimana Jean Baptiste
Kuya 10 Nzeri 2018 saa 10:30
Yasuwe :
0 0

Mu bihugu bimwe bemera ko ibiyobyabwenge bikoreshwa nk’umuti cyane ku barwaye indwara zitera ububabare bukomeye.

Urugero ni nko mu Bwongereza bemera ko urumogi rwo mu bwoko bwa Cannabis ari umuti ugabanya uburibwe, ariko rugacuruzwa muri farumasi ku izina rya Sativex.

Urubyiruko rwiganjemo abo mu Ntara y’Uburengerazuba, rwanakoresheje ibiyobyabwenge rwumvikanye rwifuza ko ibiyobyabwenge byakoreshwa nk’umuti mu Rwanda.

Mu kiganiro ku kurandura ibiyobyabwenge cyaciye kuri Televiziyo y’Igihugu kuri uyu wa 9 Nzeri 2018, Umunyamabanga wa Leta muri Minisiteri y’Ubuzima ushinzwe ubuzima rusange n’ubuvuzi bw’ibanze yavuze ko u Rwanda rwahisemo kutabikoresha kuko byagira ingaruka mbi ugereranyije n’uburyo bukoreshwa mu kugabanyiriza abarwayi uburibwe.

Ati “Muri iki gihe hari ibihugu tubona bifungura ibintu bimwe na bimwe. Cyane cyane bavuga ngo abantu barwaye indwara ikomeye cyane kandi ibabaza turabafunguriye bajye bakoresha ubwoko bw’iki kiyobyabwenge kandi akaba ari n’umuti.”

Yunzemo ati “Ariko ibihugu byinshi bihitamo inzira bishaka […] igihugu cyacu rero cyahisemo ubuzima bwiza bw’abaturage n’iterambere. Iyo ushyize ku munzani ukareba icyo ibyo bizana n’ibyo byo gufungura usanga nta mahuriro.”

“Ibyo kuvura ububabare dufite ubundi buryo tubikora, aho tubikorera, dufite n’abaganga babizobereyemo.”

Dr Ndimubanzi yanavuze ko Minisiteri y’Ubuzima yafashe abana bato bakora mu tugari baherekeza abantu bafite ububabare bukomeye, bakajya iwabo bakabasura bakanabagemurira imiti.

Ati “Iyo nzira niyo twe twahisemo aho kugira ngo ibyo bintu bishobora kwangiza urubyiruko n’igihugu cyacu bikomeze gukwirakwira mu gihugu hose.”

Ubushakashatsi bwa Minisiteri y’Urubyiruko na Kaminuza y’u Rwanda bwo mu 2012 bwagaragaje ko abari hagati y’imyaka 14 na 35 bangana na 52% bagerageje gukoresha ibiyobyabwenge.

Muri bo 92% bakomeje kubikoresha, 7% baba imbata y’inzoga, 5% baba imbata ya nicotine naho 2% baba imbata y’urumogi.

Imibare igaragazwa n’ibitaro bivura indwara zo mu mutwe bya Ndera, yerekana ko abahivurije batewe ibibazo n’ibiyobyabwenge bari 994 mu 2010, baba 1432 mu 2015, mu 2016 babaye 2804 naho mu 2017 bagabanukaho gato baba 1960.

Umunyamabanga wa Leta muri Minisante, ushinzwe ubuzima rusange n'ubuvuzi bw'ibanze, Dr Ndimubanzi Patrick, yavuze ko hari ingaruka nyinshi zaterwa no gukoresha ibiyobyabwenge nk'umuti

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza