Minisante yasabye uturere kwihutisha kugeza ivuriro rito muri buri Kagari

Yanditswe na Evariste Nsengimana
Kuya 19 Werurwe 2017 saa 07:45
Yasuwe :
0 1

Minisitiri w’Ubuzima, Diane Gashumba, yavuze ko hakiri abanyarwanda bakora urugendo rw’amasaha menshi bajya kwivuza asaba abayobozi b’uturere kwihutisha gahunda yo kugira ivuriro (postes de santé) muri buri Kagari.

Ubu butumwa Minisitiri Gashumba yabutangiye mu Karere ka Gicumbi, kuwa 18 Werurwe 2017, mu muhango wo gusoza icyumweru cy’ubuzima, agaragaza ko nubwo abajyanama b’ubuzima n’abandi batanga serivisi z’ubuzima bakora uko bashoboye mu kwegereza ubuvuzi abaturage, hakiri abakora urugendo rw’amasaha atatu.

Yagize ati “Ndashima impeshakurama (abaganga bavuye mu itorero) kuri gahunda yo kwegera abaturage kuko ibigo nderabuzima biri kure. Hari abaturage bagenda amasaha atatu. Ndabasaba ko gahunda yo gufasha abajyanama b’ubuzima ko mwayikomeza. Ikindi nsaba ubuyobozi bw’uturere, ni ugukomeza gahunda yo kubaka za (postes de santé) kuri buri Kagari kuko ni zo zizadufasha kwegera abaturage.”

Yakomeje anasaba Abanyarwanda guha agaciro ubuzima bwabo, bakanakoresha serivisi z’ubuzima bahabwa ku buntu. Yavuze ko bitumvikana ukuntu umuntu yahabwa inzitiramubu y’ubuntu ariko ntayiraremo.

Yanagarutse kandi ku kibazo cy’imirire mibi iri hirya no hino mu miryango aho yasabye ko ibikorwa byakozwe muri iki cyumweru cyatangiye ku wa 13 Werurwe, byo kurwanya imirire mibi byakomeza no mu minsi iri imbere.

Uyu muhango waranzwe no guha ishimwe (certificate) ikigo nderabuzma cy’icyitegererezo mu gutanga serivisi nziza z’ubuvuzi, aho icya Mutenderi cyo muri Ngoma ari cyo cyayihawe na ho ku bitaro zihabwa ibya Remera-Rukoma n’ibya Byumba.

Abajyanama b’ubuzima bo muri Nyagatare na Gicumbi kandi batangirijweho igikorwa cyo guhabwa icyemezo cy’ishimwe, ikarita z’akazi, umwenda w’akazi n’ibindi byangombwa byo kubafasha mu kazi kabo kikazakomereza no mu gihugu hose.

Hanakozwe ibikorwa bitandukanye harimo gupima kanseri y’inkondo y’umura ku bana b’abakobwa no gutanga ifu ya ‘Shisha Kibondo’ yo kuzahura imirire mu bana n’ababyeyi.

Bazikuvuga Cyprien, utuye mu murenge wa Rukomo muri Gicumbi akaba n’umujyanama w’ubuzima yavuze ko hakozwe byinshi mu kwegereza ubuvuzi abaturage aho zimwe muri serivisi bakenera bazigezwaho n’abajyanama b’ubuzima bidasabye ko bagomba kujya kwa muganga.

Yakomeje avuga ko kuba abajyanama bahawe ibibaranga bizaborohereza gukora ahantu hose bageze kuko bizaba byerekana ko ibyo bakora, gusa avuga ko bikiri imbogamizi kuko nta nsimburamubyizi bahabwa.

Iki cyumweru cy’ubuzima cyatangiye kuwa 13 Werurwe gisozwa kuwa 18 Werurwe, kikaba cyari gifite insanganyamatsiko igira iti “kwirinda biruta kwivuza”.

Abajyanama b'ubuzima bashyikirizwa imyambaro y'akazi mu Karere ka Gicumbi
Abajyanama b'ubuzima bashimiwe serivisi z'ubuzima batanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza


Warning: mysqli_query(): (HY000/1194): Table 'spip_jobs' is marked as crashed and should be repaired in /home/lex94/public_html/ecrire/req/mysql.php on line 244