Kwamamaza

MINISANTE yakuyeho urujijo ku kibazo cy’ababura imiti bikitirirwa Mitiweli

Yanditswe kuya 27-09-2016 saa 08:04' na Philbert Hagengimana


Mu gihe henshi mu bigo Nderabuzima n’ibitaro bitandukanye bya Leta hajya havugwa ikibazo cy’uko abakoresha ubwisungane mu kwivuza hari imiti badahabwa, igahabwa abakoresha ubundi bwishingizi bw’indwara, Minisiteri y’Ubuzima yemeye ko biterwa n’igenamigambi ridahwitse aho kuba ubwisungane bw’uwivuza.

Kuri uyu wa 26 Nzeri 2016, ni bwo Minisiteri y’Ubuzima yitabye Komisiyo ishinzwe gukurikirana ikoreshwa ry’imari n’umutungo bya Leta mu Nteko Ishinga Amategeko y’u Rwanda (PAC), ngo yisobanure ku makosa n’ibindi byagaragajwe muri raporo y’Umugenzuzi w’imari ya Leta mu mwaka wa 2014/2015.

Byinshi mu bibazo MINISANTE yabajijweho, bishingiye ku mikorere n’imikoranire y’inzego, ndetse n’igenamigambi ridahwitse.

Serivisi zihabwa abakoresha ubwisungane mu kwivuza (Mitiweli) ni kimwe mu byatinzweho cyane n’abadepite bagize PAC, aho batanatinye kunenga iyo Minisiteri kuba iri mu zifite inzobere nyinshi (zigera kuri 12), ariko ikaba ari intangarugero mu gukoresha nabi umutungo wa Leta no guha Serivisi mbi abagenerwabikorwa bayo.

Depite Karenzi Theoneste, Visi Perezida wa PAC, yagaragaje ko icyo kibazo kimaze gufata intera ndende kandi kikibasira cyane abakoresha ubwisungane mu kwivuza.

Ati “Bigenda bite kugira ngo imiti ikenewe ibure kandi abarwayi baba bayikeneye cyane, cyane abivuriza kuri ‘Mutuelle de Sante’ hari umuyobozi ubishinzwe?”

Mu gihe cy’amasaha hafi ane (4) Itsinda rigari rya MINISANTE ryari rirangajwe imbere na Dr.Nyemazi Jean Pierre, Umunyamabanga Uhoraho, ryamaze imbere ya PAC, hatinzwe ku kibazo cya miliyoni zigera kuri 89 zoherejwe mu bitaro adafitiwe ibisobanuro, ikiguzi cy’imiti kidasobanutse n’ibindi bibazo bishingiye ku gucunga umutungo nabi bigenda bivugwa muri iyi Minisiteri.

Nyuma yo guhatwa ibibazo no kugirwa inama yo kwihutisha ishyirwa mu bikorwa ry’ingamba zitandukanye zigamije kubikemura, Dr.Nyemazi yasobanuriye Abanyamakuru ko ikibazo cy’ibura ry’imiti hari inzira nyinshi zimaze iminsi zigeragezwa ngo gikemuke, zirimo kurushaho gutegura imiti ikenewe, kurushaho kunoza uburyo imiti igurwa kandi ikagezwa mu bigo Nderabuzima.

Ati “Hari umushinga mugari turimo gutegura, tuzanakorana n’ibitaro na byo bikajya bimenya hakiri kare imiti ikenewe, kandi tukagira uburyo izajya igera ku barwayi.”

Yakomeje ahakana ko ikibazo kijya kivugwa cy’uko abarwayi bamwe badahabwa imiti hitwajwe ko bivuriza ku bwisungane bwa make.

Ati “Nta miti yagenewe aba mituweli, nta n’iyagenewe abandi, imiti iyo ihari ihabwa umuntu, ntabwo ihabwa ubwishingizi runaka.”

Akomeza avuga ko ikibazo cy’ibura ry’imiti ku barwayi bamwe na bamwe giterwa n’igenamigambi riba ritakozwe neza.

Ati “Burya iyo dutegura imiti tuzagura, akenshi tugendera ku mibare tuba tubona cyane y’imyaka yashize, aho tureba ngo umusonga byari bimeze bite, malariya byari bimeze bite. Iyo rero ubiteguye hakabaho kunyurana, hari igihe ugira ikibazo cy’imiti. Bisaba rero kuba ufite ubundi buryo bwo guhita utumiza indi miti mu buryo bwihuse.”

Yakomeje kandi avuga ko ibyo ntaho bihuriye no gutinda kwishyura ubwisungane mu kwivuza nk’uko bikunda kuvugwa, kuko ngo imiti itumizwa mu mafaranga asanzwe mu kigega, ubundi umurwayi akajya yishyura imiti ahawe.

Ibyo kandi ngo binashimangirwa n’uko umuntu atavuzwa n’amafaranga aba yishyuye Mitiweli, ko habaho ubwisungane.

Depite Nkusi Juvenal, Umuyobozi wa PAC, yemeranya na Dr.Nyemazi, akavuga ko nta wahamya ko ikibazo cy’imiti cyaba gifitanye isano n’ubwisungane mu kwivuza, akagaragaza ko ahubwo biterwa n’amakosa aba yakozwe mu igenamigambi, ari na cyo batanzemo inama ngo gikemuke.

Yagize ati “Ni ikibazo cy’igenamigambi, uburyo bazagura imiti n’uko bazayikwirakwiza mu bitaro, ni ikibazo cy’imikorere mu kigo kimwe cya MPPD (cyahoze ari CAMERWA), no kuba kidashobora gusubiza ubusabe bw’ibitaro biba byagisabye imiti, bagomba kwiga uburyo icyo kibazo kigomba guhita gikemuka.”

Mu bindi bibazo MINISANTE yisobanuyeho ndetse PAC ikagaragaza ko ari imbogamizi ikomeye ikeneye ko Minisiteri y’Ubuzima ifatanya na Minisiteri y’Ubutegetsi bw’igihugu ngo gikemuke, ni ikibazo cy’imiterere y’abakozi mu bitaro no mu bigo Nderabuzima.

Kuri iki kibazo, MINISANTE yagaragaje ko abo bakozi baba mu byiciro bitatu, aho usanga hari aba Leta, ab’imishinga nterankunga cyangwa abafatanyabikorwa, hakaba n’ab’uturere cyangwa ibitaro.

Aha usanga ikibazo kizamo ari uko nka Minisiteri y’Ubuzima ikoresha amafaranga mu guhemba bamwe muri aba bakozi mu gihe habayemo gutinda kubahemba ku babashinzwe, mu gihe mu igenamigambi rya Minisiteri ibi biba bitarimo.

Ibi ngo bishamikiye kuri Politiki yo kwegereza ubuyobozi abaturage, ari na yo mpamvu Depite Nkusi Juvenal yasabye ko izo Minisiteri zombi zafatanya kigakemuka mu nyungu z’abanyarwanda bose.

Dr Nyemazi avuga ko badatanga imiti bagendeye ku bwisungane ahubwo ko kubura kwayo ari igenamigambi ribi baba bakoze
Abakozi ba MINISANTE batandukanye bari bagiye gusobanurira abadepite iby'amakosa yagaragaye muri raporo y'umugenzuzi w'imari ya Leta
Abagenzi b'imari bagaragaje amakosa basanze muri Minisiteri y'ubuzima

Amafoto: Luqman Mahoro


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 7 Ukuboza 2016
Copyright © 2009 -2014 - IGIHE Ltd - All Rights Reserved