Minisante igiye gukoresha uburyo bushya mu kwica imibu itera malariya

Yanditswe na Iradukunda Desire
Kuya 21 Kamena 2018 saa 07:13
Yasuwe :
1 0

Minisiteri y’Ubuzima (Minisante) yatangaje ko igiye gutera imiti yica imibu itera malariya mu bice bitandukanye haba mu bishanga no mu bihuru, hagamijwe gusenya indiri z’imibu aho ziva zikagera.

Nyuma y’uko bigaragariye ko mu gihe cy’izuba usanga indwara ya malariya yiyongera ku buryo bukabije, Minisiteri y’Ubuzima yagaragaje ko mu turere twa Bugesera na Ngoma mu Burasirazuba, Nyanza na Huye mu Majyepfo ari tumwe mu turere twiganjemo malariya kurusha ahandi mu gihugu.

Nk’uko Radio Rwanda yabitangaje, Minisitiri w’Ubuzima, Dr. Diane Gashumba, yavuze ko ikibazo cya malariya bagiye kugihagurukira bahindura uburyo bwo gutera imiti yica imibu, bikarenga gutera mu nzu gusa bakagera no hanze aho imibu yororokera.

Yagize ati “Tuzagera igihe dukoresha iyi miti ikorerwa iwacu ahantu hose. Ni ubwa mbere tuzaba tugiye gukurikira umubu n’amagi yawo aho uri hose. Ubundi twajyaga dutera mu nzu gusa, tuzajya no mu bishanga, mu bishanga tuzaba dukurikiye amagi y’udukoko dutera malariya, dutere hanze mu bihuru, turabizi ko ariho imibu yihisha.”

Iyi miti izaterwa mu bishanga ni ikorerwa mu Rwanda ikomoka ku bireti kandi ngo nta ngaruka igira ku buzima bw’abantu n’amatungo kuko yo yica udusimba duto gusa.

Minisiteri y’ubuzima isaba abaturage kwirinda imibu basiba n’ibidendezi by’amazi no kumena injyo n’ibindi byose byarekamo amazi bikaba indiri y’imibu.

Imibare ya Minisiteri y’Ubuzima igaragaza ko mu mwaka wa 2017, abantu bagera kuri miliyoni 4 n ’ibihumbi 700 barwaye malariya.

Minisitiri w'Ubuzima, Dr Diane Gashumba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza