Kwamamaza

Mininfra itangaza ko mu mwaka wa 2030 gutekesha amakara bizaba ari amateka

Yanditswe kuya 1-11-2016 saa 14:38' na Jean Pierre Tuyisenge


Minisiteri y’Ibikorwa remezo,Mininfra, itangaza ko bitarenze mu mwaka wa 2030, Abanyarwanda bose bazaba batagikoresha inkwi n’amakara kuko amashanyarazi azaba yarageze kuri buri wese.

Ni nyuma y’aho uyu munsi ku wa 1 Ugushyingo 2016, iyi Minisiteri ifatanyije n’Ikigo cy’Igihugu gishinzwe gukwirakwiza amashanyarazi, REG, batangije gahunda bise “ Amashanyarazi kuri bose” igamije kugeza umuriro kuri buri munyarwanda.

Nkuko Minisitiri w’Ibikorwaremezo, James Musoni yabitangaje, ngo nta kizakoma mu nkokora iyi gahunda kuko Leta yatangije uburyo bwinshi buzafasha mu kubona amashanyarazi aturuka mu bintu bitandukanye, ndetse hakazabaho no kugabanya ibiciro by’umuriro.

Yagize ati “Iyi gahunda izagerwaho ndetse nkurikije imishinga u Rwanda ruyifitemo, mbona tutazategereza kugera muri uwo mwaka, igiciro cy’umuriro gisa n’ikiri hejuru ariko mu ntego twihaye ni uko mu kwezi kwa mbere ku mwaka utaha tuzaba dufite ibiciro bishya by’amashanyarazi kandi twizera ko bizaba biri hasi, binogeye inganda n’abandi.”

Minisitiri yavuze ko ibi bizagerwaho hakoreshejwe uburyo bwo kugabanya igiciro cy’amashanyarazi, ndetse n’icya gaz ku buryo buri muntu wese abasha kukigiraho ubushobozi.

Umuyobozi Mukuru wa REG, Jean Bosco Mugiraneza yavuze ko hari ibimaze gukorwa kugira ngo kugeza amashanyarazi kuri bose bigerweho.

Yagize ati “ Amafaranga aba yagiye mu ngengo y’imari mu gihugu bigaragaza imbaraga Leta iba yashyize muri uru rwego kuko ari rumwe mu misingi iterambere rishingiyeho. Ku bijyanye n’amashanyarazi, ubu tumaze kugira Megawatt 190, kandi hakaba hari n’indi mishinga iri gutangira.”

Muri iyo mishinga harimo uwa Rusumo wo kubyaza amazi amashanyarazi, uwo gufata Nyiramugengeri ikayibyazwa amashanyarazi iri hafi gutangira, n’undi wo gukura amashanyarazi muri gaz Methane, ibi byose akavuga ko bizatuma amashanyarazi arushaho kwiyongera mu gihugu.

REG, ivuga ko muri gahunda yo kugeza amashanyarazi mu cyaro bageze kuri 27%, aho 25% ituruka ku miyoboro minini na ho 2% bigaturuka ku mirasire y’izuba.

Mu nama igamije kureba icyakorwa kugira ngo gahunda Umuryango w’Abibumbye washyizeho yo kuba mu mwaka wa 2030 abaturage bose b’Isi bazaba bagerwaho n’amashanyarazi ahendutse kandi anogeye buri wese, inzego zibishinzwe mu Rwanda zatangaje ko hashingiwe ku kuba u Rwanda rukomeje kuza ku isonga mu korohereza ishoramari, ngo nta kabuza ko abandi bashoramari bazarushaho gushora imari yabo muri uru rwego.

Iyi gahunda u Rwanda rwatangije ije yuzuza icyerekezo rwari rwarihaye yo kuba mu mwaka wa 2020 Abanyarwanda bose bazaba bacaniwe, na ho 2030 bakaba bafite umuriro bose kandi udacikagurika.

Minisitiri w'Ibikorwaremezo, James Musoni na Jean Bosco Mugiraneza, Umuyobozi wa REG
Abayobozi bakuru bitabiriye inama isuzuma uburyo abaturage bagezwaho amashanyarazi ahendutse

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Thursday 8 Ukuboza 2016
Copyright © 2009 -2014 - IGIHE Ltd - All Rights Reserved