Minijust yashyikirijwe ububasha bw’iyahoze ari Minisiteri y’Umutekano

Yanditswe na Kanamugire Emmanuel
Kuya 12 Ukwakira 2016 saa 10:48
Yasuwe : XX
0

Sheikh Musa Fazil Harerimana wahoze ari Minisitiri w’Umutekano, yahererekanije ububasha na Jonston Busingye nyuma y’aho inshingano za Mininter zishyizwe muri Ministeri y’Ubutabera.

Kuwa 4 Ukwakira 2016, ni bwo Perezida Kagame yashyizeho Guverinoma nshya ndetse n’abayobozi ku rwego rw’Intara mu itangazo ryashyizweho Umukono na Minisitiri w’Intebe Anastase Murekezi.

Ayo mavugurura muri Guverinoma ni yo yasize inshingano za Mininter zimuriwe muri Minijust, ari na yo mpamvu mu gitondo cy’uyu wa 12 Ukwakira habayeho Umuhango w’ihererekanyabubasha.

Mu ijambo rye, Sheikh Harerimana yunze mu rya Perezida Kagame mu muhango wo kwakira indahiro y’abayobozi bashya binjiye muri Guverinoma, aho yasobanuye ko amavugurura nk’ayo asobanura ko igihugu hari aho kiba kivuye n’aho kigana.

Yavuze ko kuba inzego zari ziri muri Mininter zimukiye muri Minijust atari ikidasanzwe kuko n’ubundi imirimo myinshi bayikoreraga hamwe, ati “Gereza ni ‘Omega’ y’ubutabera, Polisi ni ‘Alpha’, ubwo hagati harimo ubutabera, ubu rero bigiye hamwe kandi n’ubundi byari ikintu kimwe.”

Ububasha Sheikh Harerimana yashyikirije Minisitiri Busingye bukubiye muri Politiki y’igihugu y’umutekano yemejwe, ingamba zatuma igerwaho n’amategeko agenderwaho mu kuyishyira mu bikorwa.

Harimo n’imihigo, aho yagize ati “Imihigo irakomeza, yaba iya Minisiteri y’Umutekano, iya Polisi, n’iy’Urwego rw’Igihugu Rushinzwe Imfungwa n’Abagororwa (RCS).”

Mu bindi kandi hari amadosiye agikomeza n’andi yari yaramaze gutegurwa agikeneye kunozwa, harimo inyandiko z’umutungo n’ibyemezo byazo, ubufatanye n’izindi nzego zo mu gihugu cyangwa hanze yacyo, harimo kandi uburyo Mininter yakoranaga na RECSA, Umuryango mpuzamahanga urwanya intwaro ntoya n’iziciriritse mu karere u Rwanda ruherereyemo.

Minisitiri w’Ubutabera Johnston Busingye yijeje ko nubwo inshingano ziyongereye muri iyo Ministeri, nta mpungenge biteye, cyane ko buri muyobozi wese uyirimo akwiye kwiyumvisha ko umubare w’abo yakoreraga wikubye inshuro nyinshi, bityo umurava n’amasaha bakoreshaga mu kazi na byo bikaba bikwiye kwiyongera.

Yakomeje avuga ko intambwe ya mbere mu gushyira mu bikorwa inshingano iyo Minisiteri yahawe ari ukwiga, cyane ko inzego zayijemo baziziho bike ugereranyije n’izo bakwiye kumenya.

Minisitiri w'Ubutabera, Johnston Busingye na Sheikh Musa Fazil Harerimana mu muhango w'ihererekanyabubasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza