Mineduc yungutse umushinga witezweho kuzamura umusaruro w’ubuhinzi

Yanditswe na Kanamugire Emmanuel
Kuya 29 Nzeri 2016 saa 09:53
Yasuwe :
0 0

Ikigo gishinzwe Uburezi cya Leta y’u Buholandi (NUFFIC) cyatangije umushinga ugamije kongerera ubushobozi abiga ibijyanye n’ubuhinzi mu Rwanda,witezweho kuzagaragaza umusaruro uhagije.

Umushinga ‘SEAD’ (Strengthening Education for Agricultural Development),ni umushinga wa leta y’u Buholandi ugamije gutera inkunga ubumenyi mu buhinzi bwo mu Rwanda, ukorana bya hafi na Minisiteri y’Uburezi mu Rwanda ndetse n’Ikigo cy’Igihugu gishinzwe kongerera ubushobozi ibigo bya leta n’iby’abikorera(NCBS).

Mu burezi uyu mushinga uzakorera mu makoleji ya Kaminuza y’u Rwanda afite aho ahurira n’ubuhinzi.

Umunyamabanga Uhoraho muri Minisiteri y’Uburezi, Dr Ntivuguruzwa Celestin avuga ko uje kongerera abanyarwanda ubumenyi mu bijyanye n’ubuhinzi bw’umwuga.

Dr Ntivuguruzwa yagize ati “Uyu mushinga uje kubongerera ubumenyi mu bijyanye n’ubuhinzi, aho kugira ngo dusarure ibyo gushyira mu nkono gusa. Ku rubyiruko biratuma habaho kongera ubushakashatsi kandi uyu mushinga ufite n’igice cyo kugura ibikoresho bizafasha mu kwigisha muri Kaminuza ndetse n’amashuri y’ubumenyingiro ariko mu bijyanye n’ubuhinzi.”

Dr Ntivuguurzwa yemeje ko kugira ngo umushinga wa SEAD ugere ku ntego hazabaho gahunda yo guhindura integanyanyigisho yakoreshwaga cyane cyane ku biga amasomo afite aho ahurira n’ubuhinzi.

Ati “Mwabonye ko umushinga uzageza muri 2021, ubwo rero integanyanyigisho ziri buhinduke bijyanye n’icyifuzwa kugerwaho mu buhinzi muri iyi mwaka itanu iri imbere.”

Gahunda zose zizakorwa muri uyu mushinga zizaba zigamije gufasha u Rwanda kwihaza mu biribwa,guhanga imirimo mishya ndetse no gushaka isoko ryagemurwaho umusaruro.

Ikigo cy’Igihugu gishinzwe kubaka ubushobozi bw’Ibigo bya leta n’abikorera (NCBS) kugira ni cyo kizagenzura imikorere n’imikoresherezwe y’amafaranga yawo kuko ari umushinga uzita ku kongera ubushobozi kandi na cyo akaba ari byo gishinzwe.

Mutoro Antonia uyobora NCBS,yagize ati “SEAD ni umushinga dufashwamo na guverinema y’Ubuholandi, uzakora ibijyanye no gufasha amashuri Makuru n’ayigisha imyuga n’Ubumenyingiro ndetse n’inzego z’abikorera nka Kaminuza ya INES-Ruhengeri kugira ngo bubake ubushobozi bwabo mu bijyanye n’ubuhinzi n’ubworozi.”

Mu buhinzi n’Ubworozi, uyu mushinga (SEAD) uzongerera ubushobozi abafasha mu kunoza amakaragiro y’amata, ubworozi bw’inkoko no kongera umusaruro w’ibigori, ibirayi n’imboga mu rwego rwo gufasha u Rwanda kwihaza ku musaruro w’ubuhinzi n’ubworozi.

Uyu mushinga uzamara imyaka itandatu;watangiye gukora mu mwaka ushize, ariko watangijwe ku mugaragaro kuri uyu wa 29 Nzeri 2016.Uterwa inkunga na Guverinoma y’u Buholandi ingana na miliyoni icumi z’amayero.

Umunyamabanga Uhoraho muri Minisiteri y’Uburezi, Dr Ntivuguruzwa Celestin
Mutoro Antonia,Umuyobozi wa NCBS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza