MINEDUC yemereye amashuri yigenga gukomeza kwigisha mu ndimi z’amahanga yigishagamo

Yanditswe na Twarabanye Venuste
Kuya 2 Ukuboza 2019 saa 03:32
Yasuwe :
0 0

Minisiteri y’Uburezi yemereye amashuri yigenga kwigisha mu ndimi z’amahanga asanzwe yigishamo ahubwo akareba uburyo yagerageza gushimangira urw’Ikinyarwanda ndetse iyizeza kuyafasha mu bikorwaremezo no kutazongera gufunga ibigo byayo ahubwo hakongerwa uburyo bwo kujya inama.

Minisitiri w’Uburezi, Dr Eugene Mutimura, yabitangarije mu biganiro nyunguranabitekerezo ku itegurwa ry’umwaka w’amashuri wa 2020 byahuje iyi Minisiteri n’abafite ibigo byigenga.

Ibi bibaye mu gihe hari hashize iminsi mike amashuri yigenga guhera mu mashuri y’incuke kugeza mu mwaka wa gatatu w’amashuri abanza asabwe gutanga amasomo mu rurimi rw’Ikinyarwanda.

Minisitiri Mutimura yagize ati "Umurongo utanzwe ni uko mwigisha nkuko mwigishaga mu mashuri y’incuke n’abanza [...] Dushingiye ku byo mwasabye ku biganiro mwavuze ni byiza ko tutahuzagurika ni byiza ko twakwigisha mu rurimi rw’Icyongereza kuva mu wa mbere kugeza mu wa Gatandatu."

Umuyobozi w’ishuri rya Bright Happy Nation Academy riherereye mu Karere ka Nyanza, Nsengiyumva Eliphaz, yavuze ko kwemererwa kwigisha mu ndimi basanzwe bigishamo byabanejeje kuko bifungura imiryango yo kugera ku byo abandi bagezeho.

Ati “Kwigisha twibanze ku rurimi rwacu ni byiza icyo ni kimwe twashimye. Icya kabiri ni uko twemerewe kongera gushimangira no kwigisha neza indimi z’amahanga kuko ni amarembo yagutse atuma tubasha kubona ubumenyi abandi badutanze tukabwinjiza mu muco wacu noneho tukarushaho kubaka umuco ufite ireme kandi utuma abana bacu bazarushaho gusohoka bakamenya ibiri hanze bakabizana kubaka, cyane ubuvumbuzi, ubushakashatsi n’ubutabire kuko biri mu ndimi z’amahanga. Tutabyigishije neza rero twagumana ibyo dusanzwe dufite gusa ariko udushya ntitutubone kuko imiryango yo gufungura no kugera ku byo abandi bagezeho yaba ifunze.”

Yavuze ko kuba bagiye kujya bahabwa ibindi byangombwa bihabwa amashuri ya leta nabyo ngo ni intambwe ikomeye ku ireme ry’uburezi.

Nsengiyumva yavuze ko byaberetse ko ari amashuri atihariye ahubwo ari mu nzira imwe n’aya leta yo kubaka iterambere rirambye ry’abaturage.

Mukarutesi Julienne ufite ishuri ryitwa La Fraternite ry’ i Gasogi, yavuze ko guhindura bakigisha mu Kinyarwanda gusa byari bibangamiye abanyeshuri n’ababyeyi.

Ati “Twishimiye ko Minisitiri yaje akatumara impungenge kubera ko guhindura ururimi umwana yahoraga yigamo mu Cyongereza hanyuma akiga mu Kinyarwanda, ni ibintu bikomeye cyane kandi byari bikomereye ababyeyi. Ababyeyi banga abantu bahindura batigeze bavugana, ibi nabyo birahumuriza ababyeyi."

Yavuze ko bazakomeza guteza imbere ubundi buryo butuma abana bakomeza kumenya ururimi rw’Ikinyarwanda, birimo amatorero.

Minisitiri w’Uburezi Dr Mutimura yavuze ko amashuri yigenga azajya afashwa gushaka ibyangombwa kandi atazajya afungwa ahubwo akagirwa inama z’ibyo yahindura.

Ati “Turabizeza ko tuzajya tubafasha kubona ibyangombwa. Ikindi tubizeza ntabwo tuzajya tubafungira amashuri keretse tubonye hari ibyago yateza abana b’abanyarwanda. ”

MINEDUC yatangaje ko igiye gufasha ayo mashuri muri gahunda yo kugaburira abana, kubaha imfashanyigisho, gusurwa no kujya inama. Izabafasha kubona abaterankunga aho bishobotse n’ibindi byaba ngombwa ko bakenera kugira ngo barusheho gutanga ireme ry’uburezi ku buryo bworoshye.

Muri ibyo biganiro nyunguranabitekerezo hashyizweho urubuga rwo guhuza amashuri yigenga na Minisiteri y’Uburezi ruzafasha guhana amakuru no gutanga ibitekerezo mu mirimo yabo ya buri munsi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza