Mineduc yavuze ku cyatumye ishuri rya Gakoni rifungwa nyuma y’imyigaragambyo

Yanditswe na Hakizimana Jean Paul
Kuya 11 Gashyantare 2021 saa 09:27
Yasuwe :
0 0

Minisiteri y’Uburezi yavuze ku mpamvu zatumye hafungwa by’agateganyo ikigo cy’ishuri cya Gakoni Adventist College cyo mu Murenge wa Kiramuruzi mu Karere ka Gatsibo, ivuga ko byatewe n’imyitwarire idahwitse abanyeshuri biga kuri iryo shuri bagaragaje mu ijoro ryo ku itariki ya 07 Gashyantare 2021.

Mu mpera z’icyumweru gishize nibwo muri iki kigo abanyeshuri bigaragambije bamenagura ibirahure by’amashuri bigiramo, aho barara ndetse no ku biro by’ishuri, ibi ngo babiterwaga na mugenzi wabo wari warananiranye wirukanwe n’ikigo akanga kukivamo hakitabazwa Polisi n’inzego z’ibanze.

Mu kuhagera ngo uyu musore yambitswe amapingu abandi banyeshuri bitambika imodoka ya Polisi bamwe banayitera amabuye bayimena ikirahure cy’imbere. Ibi byakurikiwe n’imyigaragambyo yagejeje kuwa Mbere ubwo ubuyobozi bw’Akarere bwajyagayo hagafatwa umwanzuro w’uko abanyeshuri bose baba basubiye mu rugo by’agateganyo.

Mu itangazo Minisiteri y’Uburezi ryasohotse kuri uyu wa Kane tariki ya 11 Gashyantare 2021 ryashjyizweho umukono na Minisitiri w’uburezi Dr Uwamariya Valentine, ryasobanuye ko icyatumye iri shuri rifungwa byaturutse ku myitwarire mibi y’abanyeshuri.

Rigira riti “ Uyu mwanzuro wafashwe nyuma y’uko abo banyeshuri bagaragaje imyitwarire mibi irimo kwangiza ibikorwaremezo by’ishuri no kubangamira ubuyobozi bw’ishuri na Polisi baje guhosha izo mvururu. Abanyeshuri 16 bayoboye abandi muri ibi bikorwa bari mu maboko ya Polisi, mu gihe abandi bose basubijwe mu miryango yabo.”

Minisiteri y’Uburezi n’izindi nzego zibishinzwe ziracyakurikirana icyateye iki kibazo.

Ubuyobozi bw’Akarere ka Gatsibo ubwo bafungaga iri shuri yari bwabwiye IGIHE ko muri iri shuri mu banyeshuri 372 baryigagagmo abagera kuri 288 bose ari impunzi zaturutse mu nkambi ya Nyabiheke na Gihembe, aba ngo bakaba bakunda gukorera ikintu cyose mu bumwe kuburyo binakekwa ko aribo bateje imigaragambyo kuko uwirukanywe yari umwe muri bo.

Bimwe mu birahuri by'ishuri abanyeshuri bangije bari mu myigaragambyo
Ishuri ryabaye rifunzwe by'agateganyo mu gihe hagikorwa iperereza ku byateje imyigaragambyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .