MINEDUC yashimye igitabo gishya kivuga ku buzima bw’imyororokere

Yanditswe na Twarabanye Venuste
Kuya 12 Ugushyingo 2019 saa 10:57
Yasuwe :
0 0

Minisiteri y’Uburezi yashimye igitabo kivuga ku buzima bw’imyororokere cyitwa “Sobanukirwa Ubuzima bw’Imyororokere” cyitezweho gufasha abangavu mu rugendo rwo guhangana no kwirinda inda zitateganyijwe.

Muri iki gitabo umwanditsi Noheli François yakubiyemo ubutumwa asobanura imikurire n’imihindagurikire y’umubiri w’umwangavu, zamurinda abamugusha kugwa mu bishuko.

Cyashyizwe ahagaragara mu muhango wabereye mu Mujyi wa Kigali ku wa Gatanu w’icyumweru gishize; ni igikorwa cyitabiriwe n’inzego zitandukanye zirimo Inteko Nyarwanda y’Ururimi n’Umuco n’Urugaga rw’Abanditsi mu Rwanda.

Igitekerezo cyo kwandika icyo gitabo Noheli yakigize nyuma yo kubona ingaruka zigera ku bangavu baterwa inda bakiri bato, abikuye mu mushinga wafashaga abakobwa batewe inda zitifuzwa yakoragamo.

Raporo y’Ikigo cy’Igihugu cy’Ibarurishamibare ku Miturire n’Ubuzima (RDHS) yerekanye ko abangavu baterwa inda bavuye kuri 6.1% mu 2010 bagera kuri 7.3% mu 2015. Nibura umwe mu bakobwa batanu abyara atarageza imyaka 19 y’amavuko. Abana b’abakobwa batewe inda bangana na 49.6% basamye bafite imyaka iri hagati ya 12 na 17.

Imibare yo mu 2016 ya Minisiteri y’Uburinganire n’Iterambere ry’Umuryango igaragaza ko abangavu 17,500 bari hagati y’imyaka 15-17 batewe inda, bivuze ko nibura abana 47 bavukaga buri munsi.

Ubushinjacyaha Bukuru bwo bwagaragaje ko kuva muri Nyakanga 2017 kugeza muri Kamena 2018, bwakiriye dosiye zigera ku 2996 z’abasambanyije abana.

Noheli yavuze ko yifashishije inyandiko nka bumwe mu buryo bwo gutanga umusanzu ku kibazo cy’abangavu baterwa inda zitateganyijwe.

Yakomeje agira ati “Kije kuba kimwe mu bisubizo byo gukemura ikibazo cy’inda zitifuzwa ziterwa abangavu.”

Umuyobozi ushinzwe Ubuzima no kurwanya Virusi itera Sida muri Minisiteri y’Uburezi, Tuyishimire Frodouard, yavuze ko icyo gitabo kizafasha urubyiruko kuko cyanditse mu rurimi rw’Ikinyarwanda benshi bumva.

Yagize ati “Mu bigo by’amashuri niho habarizwa abantu benshi kandi b’urubyiruko, tubona rero iki gitabo ari imfashanyigisho nziza twungutse mu burezi.”

Yashimiye Noheli kuri uwo musanzu yatanze mu burezi kuko yanditse ku ngingo ikenewe, afata nk’irindi soko y’amakuru ku buzima bw’imyororokere.

Noheli wanditse igitabo yise “Sobanukirwa Ubuzima bw’Imyororokere”, afite imyaka 25. Ni icya kabiri yanditse nyuma y’icyo yamuritse mu 2018 yise “Ubuzima nyakuri.’’

Iki gitabo gisobanura ubuzima bw’imyororokere gikubiyemo ubumenyi mu bya siyansi, iyobokamana n’umuco byose bigamije gusobanura imikurire n’imihindagurikire y’ubuzima bw’imyororokere.

Noheli yize Ibinyabuzima n’Iyobokamana ndetse yakoze igihe kirekire mu bijyanye n’ubuzima bw’imyororokere mu mushinga w’abakobwa babyariye iwabo, ari naho yakuye igitekerezo cyo kwandika icyo gitabo yatunganyije mu myaka ibiri.

Noheli François asobanura ibikubiye mu gitabo cye
Iki gikorwa cyitabiriwe n'abantu batandukanye
Umuyobozi w'Ihuriro ry’amatorero atandukanye mu Rwanda, Bishop Dr Gahungu Bunini, yitabiriye iki gikorwa
Abasomye igitabo gishya kivuga ku buzima bw'imyororokere batanze ibitekerezo
Noheli François (uwa kabiri iburyo) yari agaragiwe n'abaje kumushyigikira
Hafashwe ifoto y'urwibutso nyuma y'iki gikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza