Kwamamaza

MINEDUC yijeje ko nta munyeshuri uzakopezwa ikizamini cya Leta

Yanditswe kuya 1-11-2016 saa 09:07' na Uwishyaka Jean Louis


Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Munyakazi Isaac yatangaje ko mu bizamini bya leta bizakorwa uyu mwaka nta kibazo cyo gukopeza abanyeshuri kizagaragara bitewe n’uko Leta yafashe ingamba zikomeye zo kubikumira.

Mu bihe bishize hakunze kuvugwa umuco wo gukopeza abanyeshuri ibizamini mbere y’uko bikorwa, rimwe na rimwe ugasanga biteje umwuka mubi mu banyeshuri babaga batabibonye.

Ubwo yatangizaga ku mugaragaro ikorwa ry’ikizamini cya Leta gisoza amashuri abanza mu Rwunge rw’Amashuri rwa Sainte Famille, kuri uyu wa Kabiri, tariki ya 1 Ugushyingo 2016, Munyakazi yavuze ko iki kibazo kitazigera kigaragara, gusa ngo n’uwo byagaragaraho yabihanirwa.

Yagize ati “ Natanze ubutumwa bwihariye ku bijyanye n’icyo kibazo. Icya mbere icyo bavuga ko ari ugukopeza bitewe n’itegurwa ry’ibizamini n’uburyo bikurikiranye, n’umutekano usesuye, biragoye cyane kuvuga ko byakorwa. Hari ababikoraga ari ukurangaza abana, rimwe na rimwe babishakamo amaronko, ariko dufatanyije na polisi y’igihugu twavuze ko abana babanza kumenya ko ibyo ari ibibatesha umwanya, icya kabiri n’uwo byagaragaraho wese yahanwa by’umwihariko kuko ibyo ari ibintu tudashyigikiye. Nabizeza ko ibyo ntabiriho, nta n’ibyo muzumva kuko twafashe ingamba zikomeye zo gukumira icyo ari cyo cyose cyagaragaramo uburiganya cyangwa se ibyo gukopera ibizamini."

Munyakazi yasabye abanyeshuri bari gukora ibizamini kwigirira icyizere biyumvamo ko bashoboye, ndetse ko n’igihugu cyabo kibari inyuma.

Yagize ati “Ubutumwa bwa mbere ni ukubabwira ko bageze kuri uru rwego bashoboye kuko kugira ngo umwana atangire umwaka wa mbere agere aho agera mu mwaka wa gatandatu anemererwe gukora ikizamini cya leta, ubwabyo byakabaye bimushyiramo icyizere cy’uko ashoboye. icya kabiri ni ukumva ko twese tubari inyuma nk’ubuyobozi bw’igihugu, ababyeyi, abarezi babo. Bose bakoze ibyo bashoboye bityo nabo iki ni cyo gihe cyo kubishyura babagaragariza ko ibyo babakoreye na bo hari byinshi bagiye kubaha. Nababwiye ko bakwiye kwitwara neza mu bizamini kuko nubwo baba bagiye kubazwa, hari n’uburere bwiza baba bagomba kugaragaza.”

Yavuze kandi ko abanyeshuri bari bifitemo imyumvire y’uko batsinda batatsinda mu ishuri bagomba kwimuka bakaba bakora n’ibizamini bya leta, ngo ibyo ni ukwibeshya bitewe n’uko umunyeshuri uzajya wemererwa gukora iki kizamini ari uzaba agaragaza ubushobozi bwo kugikora.

Ati "Ntabwo dushobora kurera umwana tumutegura kuzamujyana ku isoko, ngo twumve ko ari utsinda n’utsindwa azakomeza, hariho amabwiriza agena umwana ushoboye, niyo mpamvu aba bana baje hano gukora ibizamini ni uko bujuje ibyangombwa bibemerera gukora ibizamini. Umwarimu wamureze niwe wenyine ugomba kugena niba umwana akwiye kwimuka cyangwa se niba akeneye gufashwa akaba yasibira. Uwo niwo murongo mugari ntabwo tureka abana ngo bazakora ibizamini batsinda, batsindwa ntabwo ibyo ari ko bimeze. Hagomba kwimuka ushoboye, ukora ikizamini ni uwateguwe neza."

Minisiteri y’Uburezi yatangaje ko mu mashuri abanza umwaka ushize wa 2015 abanyeshuri bakoze ibizamini bya Leta bari 168 290 uyu mwaka bakaba ari 194 679. Biyongereyeho 26 389 bingana na 16%, abakobwa biyongereye kuri 13%, abahungu biyongera ku kigero cya 19%.

Mu bindi Minisiteri y’Uburezi yakoze mu korohereza abana gukora ibizamini bya leta mu buryo bunoze, harimo ibyo kongera umubare w’ibigo byakorerwagaho ibyo bizamini mu rwego rwo korohereza abaturukaga kure y’aho bari bubikorere ndetse ngo n’amasaha ikizamini gitangiriraho afasha umunyeshuri uturuka kure gato gukora ikizamini yamaze kuruhuka.

Umunyamabanga wa Leta ushinzwe amashuri abanza n'ayisumbuye, Isaac Munyakazi ahumuriza abana bagiye gukora ibizamini bya leta
Isaac Munyakazi atangiza ku mugaragaro ibizamini bya leta bisoza amashuri abanza
Munyakazi yavuze ko hafashwe ingamba zituma nta munyeshuri uzakopezwa ikizamini cya leta

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved