Mineduc yabajijwe ku bayobozi b’amashuri babika imfashanyigisho ntibazihe abanyeshuri

Yanditswe na Evariste Nsengimana
Kuya 9 Ukwakira 2018 saa 04:27
Yasuwe :
0 0

Abasenateri babajije Minisiteri y’uburezi (Mineduc), ingamba ifitiye abayobozi b’amashuri bafata imfashanyigisho zihabwa ibigo bayobora, bakazitindikira aho kuziha abanyeshuri ngo bazigireho.

Kuri uyu wa Kabiri Abasenateri bagize Komisiyo y’imibereho myiza y’abaturage, uburenganzira bwa muntu n’ibibazo by’abaturage baganiriye n’Ubuyobozi bw’ishami rya Mineduc rishinzwe integanyanyigisho.

Ni ibiganiro byibanze ku ishyirwa mu bikorwa rya gahunda y’integanyanyigisho zishingiye ku bushobozi mu mashuri abanza n’ayisumbuye.

Abakozi ba Mineduc bagaragaje ko iyi gahunda yagiye ihura n’imbogamizi zirimo umubare munini w’abanyeshuri mu cyumba, abarimu bamwe batazi indimi, abata ishuri n’imfashanyigisho zidakoreshwa uko bikwiye.

Ibi nibyo Abasenateri bahereyeho bagaragaza ko ari ikibazo gikwiye gufatirwa ingamba kuko kigira ingaruka zikomeye ku ireme ry’uburezi.

Senateri Laurent Nkusi yavuze ko ‘gahunda y’ubugenzuzi harimo ikibazo’. Yavuze ko ‘bukwiriye gukorwa hakiri kare harebwa uko imfashanyigisho zikoreshwa n’ubishinzwe ndetse n’ubibazwa igihe byagize ikibazo.’

Visi Perezida wa Komisiyo, Senateri Nyagahura Margaret, yavuze ngo “Kubona Umuyobozi w’ikigo afata ibitabo nka biriya (berekanye mu mashusho) akabirunda ahantu kuriya atabihaye agaciro. Njye nibaza niba ukuntu nk’uriya niba ari mu mwuga akwiye kuba awurimo!”

Bavuze ko igitabo n’izindi mfashanyigisho ari ikintu gikomeye abarimu baba bakwiye gusigasira, basaba Mineduc kugaragaza ingamba ifite.

Umugenzuzi Mukuru muri Minisiteri y’Uburezi, Kageruka Benjamin, yababwiye ko bazakomeza ingamba zashyizweho zirimo ubugenzuzi n’ubukangurambaga bukorwa mu mashuri buri gihembwe.

Bugamije kugenzura imyigire, imicungire y’amashuri, imitungo yayo, imfashanyigisho n’ibindi bigira ingaruka ku ireme ry’uburezi.

Kageruka yanavuze ko ‘Mineduc ari urwego rumwe mu zifite ubugenzuzi bukora neza kandi ko butahura ibibazo byinshi, byinshi ngo bikemuka nta n’umuntu ubimenye.’

Iyi nteganyanyigisho nshya imaze imyaka itatu ishyirwa mu bikorwa, hari ibyo Mineduc yakoze ngo igere ku ntego birimo guhugura abarimu b’amashuri y’incuke, abanza n’ayisumbuye n’ibindi.

Abasaga ibihumbi 37 bo mu abanza n’ayisumbuye bahawe amahugurwa mu bihumbi 41 bateganijwe kuyahabwa naho mu y’incuke, abayahawe ni 2202.

Amashuri asaga 70o yamaze guhabwa mudasobwa zirenga ibihumbi 68, abarezi bamaze kuzihabwa basaga 3000 naho amashuri 420 afite internet arenga 100.

Visi Perezida wa Komisiyo, Senateri Nyagahura Margaret, yavuze ko bibabaje kubona Umuyobozi w’ikigo afata ibitabo by'imfashanyigisho akabibika
Umugenzuzi Mukuru muri Minisiteri y’Uburezi, Kageruka Benjamin, avuga ko bazakomeza gukora ubugenzuzi mu mashuri no guhwitura abayobozi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza