Kwamamaza

Minaloc yashyizeho nyirantarengwa yo kunoza ibyiciro by’Ubudehe

Yanditswe kuya 23-11-2016 saa 19:55' na Jean Pierre Tuyisenge


Kuvugurura ibyiciro by’Ubudehe byatangiye gukorwa kuva muri Kanama 2014, bikorwa mu turere twose kuva muri Gashyantare 2015, kikaba cyari icyemezo cyafashwe hagamijwe kujya byifashishwa mu igenamigambi mu nzego zitandukanye za leta.

Ibyiciro bya mbere byari bifite amazina yabiranganga nk’abahanya, abatindi n’ayandi, nyuma biza kugirwa bine ndetse bihindurirwa amazina benshi mu banyarwanda batishimiraga.

Muri uko kubihindurira amazina yafatwaga nk’ibitutsi kuri bamwe, yarahindutse ndetse n’amwe mu mahame yagenderwagaho mu kugena ibyiciro by’ubudehe arahinduka hagenderwa ku yandi mashya.

Hari abatari bake bacikanwe bitewe n’impamvu zitandukanye zirimo kuba byaragenwe badahari, hari n’abandi bibuze ku ntonde bitewe n’udukosa twagiye tugaragara mu iyandika ry’amazina n’abasabye guhindurirwa ibyiciro bitewe n’impamvu imwe cyangwa nk’uko Minisiteri y’Ubutegetsi bw’Igihugu ibitangaza.

Nyuma yo kubura aho babarizwa kwa bamwe mu baturage, Minisiteri y’Ubutegetsi bw’Igihugu ivuga ko bitarenze Mutarama 2017, buri munyarwanda azaba azi neza icyiciro cy’Ubudehe abarizwamo, ndetse n’ibitaranoga bikazaba byaranogejwe.

Minisitiri w’Ubutegetsi bw’Igihugu Francis Kaboneka mu kiganiro na Isango Star mu gitondo cyo kuri uyu wa 23 Ugushyingo 2016, yavuze ko bizagera muri Mutarama 2017, abataribona mu byiciro by’Ubudehe babarizwamo barabimenye.

Yagize ati “ Hari abantu batari bibona mu byiciro by’Ubudehe, bitarenze ukwezi kwa Mutarama 2017 bazaba baramaze kubimenya. »

Minisitiri Kaboneka yaboneyeho kwibutsa abantu kureka gukora amanyanga mu byiciro by’Ubudehe. Ati “ Hari abakora amanyanga bagafata abana babo bakajya kubandikisha mu yindi miryango kugira ngo bakunde babone ubufasha.”

Mu nama yahuje Minaloc n’abayobozi b’uturere twa Nyarugenge , Gasabo na Kicukiro bareba uko gahunda za VUP zihagaze, uko gukosora amakuru y’ibyiciro by’ubudehe bihagaze, ibibazo mu misanzu ya mituweli, ingamba zo gukangurira abaturage kubaka imisarane n’itangwa ry’inzititiramibu yabaye kuri uyu wa 21 Ugushyingo 2016, Umunyamabanga wa Leta muri Minaloc ushinzwe imibereho myiza no kurengera abaturage, Dr Alvera Mukabaramba na we yagarutse kuri aya manyanga.

Dr Mukabaramba yasabye abakora amakosa yo gusaba gushyirwa mu byiciro by’Ubudehe bitababereye ko baba bishyira mu bibi.

Ati “ Hari abantu bakora amanyanga bagasaba gukurwa mu cyiciro cya gatatu cyangwa icya kane ngo bashyirwe mu cya mbere, nyamara ntibazi ko hari amahirwe baba bivukije arimo kuba baba badashobora kubona inguzanyo mu bigo by’imari.”

Dr Mukabaramba yavuze ko gutinda kurangira kwa gahunda yo gushyira mu byiciro by’Ubudehe abaturage byatewe n’uko abasabye gushyirwa mu cyiciro cya mbere bari mu byo hejuru, bisaba ko bikoranwa ubushishozi.

Raporo ku ishyirwaho ry’ibyiciro by’Ubudehe, igaragaza ko abenshi bari mu cyiciro cya gatatu. Mu cyiciro cya mbere harimo ingo 376,192 zigizwe n’abantu 1 480 167. Ni ukuvuga ko ari 16% by’Abanyarwanda bose.

Icyiciro cya kabiri cy’Ubudehe kirimo ingo 703 461 zigizwe n’abantu 3 077 816 bangana na 29.8% by’Abanyarwanda bose.

Icyiciro cya gatatu cy’Ubudehe cyo kirimo ingo 1 267 171 zituwe n’Abanyarwanda 5 766 506 bangana na 53.7% by’Abanyarwanda bose, mu gihe icya Kane kirimo ingo 11,664 zituwe n’Abanyarwanda 58,069, bahagarariye 0.5% by’abatuye igihugu cyose.

Imibare igaragaza ko mu Mujyi wa Kigali ariho hari abantu benshi bifashije kuko 57.6% by’abari mu cyiciro cya kane ni ho babarizwa.


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved